ຂປລ. ໃນໂອກາດການ ສະເຫລີມສະຫລອງ ວັນສິ່ງແວດລ້ອມໂລກ ແລະ ວັນປູກຕົ້ນໄມ້ແຫ່ງຊາດ ທີ່ຈະມາເຖິງໃນມໍ່ໆນີ້, ເມືອງໄຊຍະບູລີ ແຂວງໄຊຍະບູລີ ມີແຜນຈະປູກໄມ້ ແລະ ຟື້ນຟູປ່າແບບທຳມະຊາດ ໃຫ້ໄດ້ 1.774 ເຮັກຕາ ເພີ່ມຂຶ້ນຈາກປີຜ່ານມາ 6 ເຮັກຕາ.
ທ່ານ ຄຳພັນ ພັນທະວົງ ຫົວໜ້າຫ້ອງການ ຊັບພະຍາກອນ ທຳມະຊາດ ແລະ ສິ່ງແວດລ້ອມ ເມືອງໄຊຍະບູລີ ໄດ້ໃຫ້ສຳພາດຕໍ່ຜູ້ສື່ຂ່າວ ເມື່ອບໍ່ດົນນີ້ວ່າ: ຕາມແຜນການໃນປີ 2016 ນີ້ ເມືອງໄຊຍະບູລີ ຈະຟື້ນຟູປ່າແບບທຳມະຊາດ ໃຫ້ໄດ້ໃນເນື້ອທີ່ 1.700 ເຮັກຕາ ແລະ ປູກໄມ້ໃຫ້ໄດ້ 74 ເຮັກຕາ ໃນຈຳນວນເບ້ຍໄມ້ 22.300 ເບ້ຍ ທີ່ໄດ້ຮັບການປະກອບສ່ວນ ຈາກພາກສ່ວນທຸລະກິດ ແລະ ຜູ້ປະກອບການຕ່າງໆ ຢູ່ພາຍໃນເມືອງ. ຄາດວ່າພິທີປູກ ທາງການຈະໄດ້ຈັດຂຶ້ນ ໃນວັນທີ 1 ມິຖຸນາທີ່ສວນອຸດທິຍານຊາວໜຸ່ມ (ຫລັກ 7) ເມືອງໄຊຍະບູລີ, ສ່ວນເບ້ຍໄມ້ ທີ່ຈະນຳມາປູກ ປະກອບມີ: ໄມ້ແຕ້ຄ່າ 2.000 ເບ້ຍ, ໄມ້ສັກ 20.000 ເບ້ຍ ແລະ ໄມ້ປະດັບ 300 ເບ້ຍ.
ສ່ວນຢູ່ເມືອງທ່າແຕງ ແຂວງເຊກອງ ກໍມີແຜນຈະປູກຕົ້ນໄມ້ ໃຫ້ໄດ້ 150 ຕົ້ນ, ໃນນັ້ນ ມີຕົ້ນໄມ້ຍາງ, ຕົ້ນໄມ້ດູ່, ຕົ້ນໄມ້ຂະຍຸງ, ຕົ້ນໄມ້ແຄນ ແລະ ຕົ້ນໄມ້ອື່ນໆ.
ຂະນະດຽວກັນ, ພະແນກຖະແຫລງຂ່າວ, ວັດທະນະທຳ ແລະ ທ່ອງທຽ່ວ ແຂວງສາລະວັນ ກໍໄດ້ສ້າງຂະບວນການ ປູກເບ້ຍໄມ້ໃຫ້ຮົ່ມ ແລະ ໄມ້ໃຫ້ໝາກ ໃນນັ້ນມີໄມ້ຂະຍຸງ 50 ຕົ້ນ ແລະ ໝາກມ່ວງ ພັນຂຽວ ສະເຫວີຍ 20 ຕົ້ນ ເພື່ອຄຳນັບຮັບຕ້ອນ ວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ 2016 ນີ້.
ແຫລ່ງຂ່າວ:
ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!