ນັກສຶກສາລາວຈຳນວນ 6 ຄົນ ເຊິ່ງໃນນັ້ນ 5 ທ່ານ ຈະໄດ້ເດີນທາງໄປສຶກສາຮຽນຕໍ່ຂັ້ນປະລີນຍາໂທຂອງທຶນ (ຟູລໄບຣ) ແລະ 1 ທ່ານ ຈະໄດ້ໄປຍົກລະດັບວິຊາສະເພາະຂອງທຶນ (ຮາມຟຣີ) ຢູ່ທີ່ສະຫະລັດອາເມຣິກາ ພາຍໃຕ້ທຶນການສຶກສາ Fulbright Program ຂອງກະຊວງການຕ່າງປະເທດ ແຫ່ງ ສະຫະລັດ ອາເມຣິກາ.
ການພົບປະລະຫວ່າງ ນັກສຶກສາ ກັບ ທ່ານ ແດນຽວ ເອ. ຄລູນ ເອກອັກຄະລັດຖະທູດສະຫະລັດອາເມຣິກາ ປະຈຳ ສປປ.ລາວ ໃນວັນທີ 23 ພຶດສະພາ 2016 ຜ່ານມາທີ່ນະຄອນຫຼວງວຽງຈັນ ທ່ານ ຄລູນ ໄດ້ກ່າວສະແດງຄວາມຊົມເຊີຍຕໍ່ບັນດານັກສຶກສາລາວທີ່ໄດ້ປະສົບຜົນສຳເລັດໃນຄັ້ງນີ້ ທ່ານຍັງໄດ້ຊຸກຍູ້ໃຫ້ບັນດານັກສຶກສາຈົ່ງນຳໃຊ້ໂອກາດອັນສຳຄັນທີ່ສຸດນີ້ເພື່ອສ້າງຜົນປະໂຫຽດຕໍ່ການພັດທະນາອາຊີບຂອງພວກເຂົາ ແລະ ຕໍ່ການຮັດແໜ້ນສາຍພົວພັນ ລະຫວ່າງ ສປປ.ລາວ ແລະ ສະຫະລັດອາເມຣິກາ ນັກສຶກສາທີ່ໄດ້ທຶນຮວມມີ ນາງ ມະໂນລີ ສີສະຫວັນ ເຊິ່ງຈະໄປສຶກສາຕໍ່ຂັ້ນປະລິນຍາໂທດ້ານການພັດທະນາສາກົນ ຢູ່ມະຫາວິທະຍາໄລ ຄອນແນວ ນາງ ມານີເພັດ ແພງສະຫວັດດີ ຈະໄປສຶກສາຕໍ່ຂັ້ນປະລິນຍາໂທດ້ານການບໍລິຫານຈັດການທຸລະກິດ ລົງເລິກການສ້າງທຸລະກິດທີ່ຍືນຍົງເພື່ອສັງຄົມ ຢູ່ທີ່ມະຫາວິທະຍາໄລ ໂຄໂລຣາໂດ ນາງ ສຸລິຍາ ຈັນນາວົງ ຈະໄປສຶກສາຕໍ່ຂັ້ນປະລິນຍາໂທດ້ານສາທາລະນະສຸກ ທີ່ມະຫາວິທະຍາໄລມິຊີແກນ ນາງ ແສງເພັດ ລັດຕະນະວົງ ຈະໄປຕໍ່ຂັ້ນປະລິນຍາໂທດ້ານການພັດທະນາສາກົນ ຢູ່ມະຫາວິທະຍາໄລອາເມຣິກາ ນາງ ມາຍຸລິ ພົມມາທັນສີ ຈະໄປຮຽນຕໍ່ຂັ້ນປະລິນຍາໂທດ້ານການເງິນ ທີ່ມະຫາວິທະຍາໄລ ອີລີນອຍ-ຊີຄາໂກ ແລະ ນາງ ປະກາຍພອນ ສີໂພໄຊ ຈະໄປຮຽນຕໍ່ຍົກລະດັບວິຊາສະເພາະດ້ານການເງິນການທະນາຄານ ທີ່ມະຫາວິທະຍາໄລ ບອສຕັນ ແມຊາຊູແຊັດ ທຶນການສຶກສາດັ່ງກ່າວ ກວມຮວມເອົາຄ່າທຳນຽມການສິດສອນທຸກຢ່າງ ປີ້ຍົນໄປ-ກັບ ແລະ ເບ້ຍລ້ຽງຈົນກວ່າຮຽນຈົບ.
ທຶນການສຶກສາ Fulbright ເປັນທຶນການສຶກສາທີ່ສຳຄັນທີ່ສຸດ ແລະ ເປັນໂຄງການແລກປ່ຽນການສຶກສາລະຫວ່າງປະເທດທີ່ສຳຄັນທີ່ສຸດຢູ່ໃນໂລກ ແລະ ທຶນການສຶກສາດັ່ງກ່າວສ້າງຂຶ້ນເພື່ອສ້າງຄວາມເຂົ້າໃຈຮ່ວມກັນລະຫວ່າງປະຊາຊົນຊາວສະຫະລັດອາເມຣິກາ ແລະ ປະຊາຊົນຢູ່ປະເທດອື່ນໆ ໂດຍມີເຈົ້າໜ້າທີ່ລາວເກືອບ 100 ທ່ານ ທີ່ເຄີຍໄດ້ໄປສຶກສາຕໍ່ຊັ້ນປະລິນຍາໂທຈາກມະຫາວິທະຍາໄລແຫ່ງຕ່າງໆຂອງສະຫະລັດອາເມຣິກາ ແລະ ມີເກືອບ 30 ທ່ານ ທີ່ເຄີຍໄດ້ໄປສຶກສາຕໍ່ເພື່ອຍົກລະດັບວິຊາສະເພາະຈາກມະຫາວິທະຍາໄລແຫ່ງຕ່າງໆຂອງສະຫະລັດອາເມຣິກາ ຜ່ານທຶນການສຶກສາດັ່ງກ່າວນີ້.
ຂ່າວ/ພາບ: ພອນສະຫວັນ ສັງສົມບູນ