ວິທີດູແລໃສ້ບື້ເດັກນ້ອຍເກີດໃໝ່ ແນວໃດບໍ່ໃຫ້ອັກເສບ ແລະ ຕິດເຊື້ອ ວັນນີ້ລາວໂພສຕ໌ມີເຄັດລັບໜ້າຮູ້ດີໆມາຝາກ ພ້ອມແລ້ວເຮົາໄປຮູ້ຈັກວິທີກັນເລີຍ

ດູແລຂັ້ນທຳອິດ

ໃນເວລາທີ່ໃສ້ບືຍັງບໍ່ຫຼຸດອອກ ຜູ້ເປັນພໍ່ແມ່ມັກດູແລຄວາມສະອາດເປັນຢ່າງດີ ໝໍຈະພະຍາຍາມສອນວິທີເຊັດ ແລະ ດູແລກ່ອນພໍ່ແມ່ຈະອຸ້ມລູກນ້ອຍກັບເຮືອນ ແຕ່ຈະຂໍຢ້ຳອີກວ່າ ຕ້ອງໃຊ້ແອລກໍຮໍ 70% ແລະ ສຳລີສະອາດ ຕ້ອງຊັດພຽງຄັ້ງດຽວແລ້ວຖິ້ມເລີຍ ຫ້າມເຊັດໄປເຊັດມາ ໃຫ້ເຊັດທາງດຽວແລ້ວຖິ້ມ ແລະ ຖ້າໃສ້ບືຫຼຸດແລ້ວ ຍັງຄົງຕ້ອງໃຊ້ແອລກໍຮໍເຊັດຕໍ່ໄປຈົນເຫັນວ່າໃສ້ບືລູກແຫ້ງດີແລ້ວ

ອາການແບບໃດຕ້ອງຟ້າວໄປພົບແພດ

ບໍ່ວ່າໃສ້ບືລູກຈະຫລຸດອອກແລ້ວ ຫຼື ບໍ່ ຖ້າເກີດອາການບວມ, ແດງ, ມີໜອງ, ມີກິ່ນ, ມີນ້ຳຊຶມ ຫຼື ມີຕິ່ງເນື້ອຢື່ນອອກມາ ຕ້ອງໃຫ້ແພດສະເພາະເດັກກວດຫາສາເຫດ ເພາະບາງຄັ້ງບໍ່ໄດ້ເກີດຈາກການທຳຄວາມສະອາດກໍ່ອາດເປັນໄປໄດ້ ດັ່ງນັ້ນຢ່ານິ້ງນອນໃຈ

ສ່ວນສາເຫດທີ່ເຮັດໃຫ້ໃສ້ບືເກີດມີບັນຫາເກີດໄດ້ຫຼາຍສາເຫດເຊັ່ນ

1. ຕິດເຊື້ອ, ເຮັດໃຫ້ເຊື້ອໂຣກເຂົ້າສູ່ກະແສເລືອດ ລູກຈະມີອາການໄຂ້ບໍ່ສະບາຍຕາມມາ

2. ທໍ່ຕໍ່ລະຫວ່າງກະເພາະປັດສະວະກັບໃສ້ບືລະລາຍຕົວບໍ່ໝົດ (ຫຼັງໃສ້ບືຫຼຸດອອກແລ້ວ) ຈຳເປັນຕ້ອງໄດ້ຮັບການຮັກສາ ບໍ່ດັ່ງນັ້ນຈະເກີດອັກເສບຂຶ້ນເລື່ອຍໆ

3. ສຳລັບເດັກທີ່ໃຫຍ່ຂຶ້ນມາເລັກໜ້ອຍ ອາດຈະແກະ, ເກົາ, ຈົນເຮັດໃຫ້ເກີດບາດແຜບໍລິເວນໃສ້ບືໄດ້

ເມື່ອໃສ້ບືລູກແຫ້ງດີແລ້ວບໍ່ຈຳເປັນຕ້ອງໃຊ້ແອລກໍຮໍເຊັດອີກຕໍ່ໄປ ກໍ່ອາບນ້ຳຖູສະບູຕາມປົກກະຕິ ແຕ່ບໍ່ຕ້ອງເຊັດເຂົ້າໄປຮອດດ້ານໃນ ແລະ ບໍ່ຄວນໂຮຍແປ້ງໃສ່ ເພາະເມື່ອແປ້ງເຂົ້າໄປສະສົມກໍ່ຈະເປັນແຫຼ່ງເພາະພັນຂອງເຊື້ອພະຍາດໄດ້ເປັນຢ່າງດີ

ທີ່ມາ: http://baby.kapook.com/