ຂໍ້ມູນຍີ່ປຸ່ນລະບຸວ່າ ພາກການສົ່ງອອກຂອງຍີ່ປຸ່ນຫຼຸດລົງໃນເດືອນເມສາພາຍຫຼັງມີລາຍງານເມື່ອອາທິດທີ່ຜ່ານມາພົບວ່າ ເສດຖະກິດ-ຍີ່ປຸ່ນທີ່ມີຂະໜາດໃຫຍ່ອັນດັບສາມຂອງໂລກລອດຈາກພາວະຖົດຖອຍໄດ້ແບບຫວຸດຫວິດໃນໄຕມາດທຳອິດ.
ຕົວເລກທີ່ຫຼຸດລົງຢູ່ໃນພາກສົ່ງອອກລົດ ແລະ ເຫຼັກກ້າໄປຕ່າງປະເທດ ຂະນະທີ່ຜູ້ຜະລິດລາຍໃຫຍ່ເຊັ່ນ ໂຕໂຢຕ້າເຕືອນວ່າ ການທີ່ຄ່າເງິນເຢນສູງຂຶ້ນສົ່ງຜົນຕໍ່ການສົ່ງອອກ ທ່າມກາງພາວະຫຼຸດຜ່ອນການຂະຫຍາຍຕົວໃນຈີນ ແລະ ການພື້ນຕົວທາງເສດຖະກິດອື່ນໆ, ນັກເສດຖະສາດບໍລິສັດເອສເອັມບີຊນິກໂກ ກ່າວວ່າ ແຜ່ນດິນໄຫວຮຸນແຮງທາງພາກໃຕ້ຂອງຍີ່ປຸ່ນເມື່ອເດືອນທີ່ຜ່ານມາ ຊຶ່ງເຮັດໃຫ້ຕ້ອງປິດການຜະລິດຕາມໂຮງງານທ້ອງຖິ່ນຊົ່ວຄາວສົ່ງຜົນຕໍ່ພາກການຜະລິດ ລັດຖະບານຍີ່ປຸ່ນໄດ້ອະນຸມັດເງິນ 778.000 ລ້ານເຢນ ຊຶ່ງເປັນງົບປະມານພິເສດເພື່ອຟື້ນຟູຜົນກະທົບຈາກໄພພິບັດ.