ໜັງສືພິມ​ອັລ-ອາ​ຣານຂອງ​ທາງ​ການ​​ເອ​ຢິບ​ລາຍ​ງານ​ອ້າງ​ເຈົ້າ​ໜ້າ​ທີ່​ທ່າ​ອາ​ກາດ​ສະຍານ​ວ່າ​ນັກບິນ​ບໍ່​ໄດ້​ສົ່ງ​ສັນຍານ​ແຈ້ງ​ເຫດ​ຮ້າຍ​ໃດໆ ກ່ອນ​ທີ່​ເຮືອບິນ​ຫາຍ​ໄປ​ຈາກ​ຈໍ​ເລ​ດາ.

ດ້ານ​ກອງ​ທັບ​ເອ​ຢິບຖະ​ແຫຼ​ງວ່າ ​ໄດ້​ສົ່ງ​ເຮືອບິນ ​ແລະ ​ເຮືອ​ອອກ​ໄປ​ຄົ້ນ​ຫາ​​ເຮືອບິນ​ເອຢິບ​ແອ​ໂດຍ​ຮ່ວມ​ມື​ກັບ​ເກຣກ ຊຶ່ງ​ສົ່ງ​ເຮືອບິນ 2 ລຳ​ໄປ​ຮ່ວມ​ປະຕິບັດ​ການ​ຄົ້ນ​ຫາ ​ເຈົ້າໜ້າ​ທີ່​ເອຢິບ​​ແອ​ລະບຸ​ວ່າ ການ​ຄົ້ນຫາ​ຖ້ຽວບິນ MS804  ທີ່​ເດີນທາງ​ອອກ​ຈາກນະຄອນຫຼວງ​ປາຣີຂອງຝຣັ່ງ​ໄປ​ຍັງ​ນະຄອນ​ໄຄ​ໂຣ ມຸ່ງ​ໄປ​ຍັງ​ບໍລິ​ເວນ​ທະ​ເລ​ໃນ​ພື້ນ​ທີ່​ຕອນ​ເໜືອ​ຂອງ​ເອ​ຢິບ ​ແລະ ວ່າ ນັກ​ບິນ​ເຮືອບິນ​ລຳ​ດັ່ງກ່າວ​ມີ​ຊົ່ວ​ໂມງ​ບິນ 6.000 ຊົ່ວ​ໂມງ ​ແລະ ຕິດ​ຕໍ່​ຄັ້ງ​ຫຼັງ​ສຸດ​ມີ​ຂຶ້ນ​ກ່ອນ​ທີ່​ເຮືອບິນ​ຫາຍ​ໄປ​ກວ່າ 10 ນາທີ.

ມີ​ລາຍ​ງານ​ວ່າ ຄອບຄົວ​ຂອງ​ຜູ້​ໂດ​ຍສານ​ຖ້ຽວ​ບິນ​ດັ່ງກ່າວ​ເດີ​ນທາງ​ເຖິງ​ສະໜາມ​ບິນ​ນະຄອນ​ຫຼວງ​ໄຄ​​ໂຣ ​ໃນ​ບັນດາ​ຜູ້​ໂດຍ​ສານ 56 ຄົນ​ທີ່ຢູ່​ເທິງ​ເຮືອບິນ ມີ​ຊາວ​ເອຢິບ 30 ຄົນ ຝຣັ່ງ 15 ຄົນ ອີຣັກ 2 ຄົນ ນອກ​ນັ້ນ​ເປັນ​ຊາວ​ແບ​ນຊິກ ອັງກິດ ​ກູ​ເວດ ຊາ​ອຸ​ດິອາຣະ​​ເບຍ ຊູ​ດານ ຊາດ ປອກຕຸຍ​ການ ​ແອ​ລຈີ​ເຣຍ ​ແລະ ກາ​ນາ​ດາ ຊາດ​ລະ 1 ຄົນ ນອກຈາກ​ນີ້ ຍັງ​ມີ​ເດັກນ້ອຍ 1 ຄົນ ​ແລະ ທະຫານ​ອີກ 2 ຄົນ ​ແລະ ມີ​ລູກ​ເຮືອ 10 ຄົນ.

ກ່ອນ​ໜ້າ​ນີ້ ​ເມື່ອ​ເດືອນ​ມີນາ ​ເຮືອບິນ​ຂອງ​ເອຢິບ​ແອ​ກໍ​ຖືກ​ຈີ້​ໄປ​ລົງ​ຢູ່​ໄຊ​ປຣັສ ​ໂດຍ​ຜູ້​ກໍ​ເຫດ​ຮຽກ​ຮ້ອຍ​ຂໍ​ພົບ​ພັນ​ລະ​ຍາ​ເກົ່າ ​ແລະ ​ເມື່ອ​ເດືອນ​ຕຸລາ​ປີ​ທີ່​ຜ່າ​ນມາ ກຸ່ມຣັດອິສະລາມ ຫຼື ​ໄອ​ເອ​ສ ອ້າງ​ລະ​ເບີດ​ເຮືອບິນ​ຂອງຣັສ​ເຊຍ​ນຳ​ນັກ​ທ່ອງ​ທ່ຽວ​ກັບ​ຈາກ​ເມືອງ​ຊາມ​ເອລ​ເຊັກ​ໃນ​ເອຢິບ ​ເຮັດ​ໃຫ້​ມີ​ຜູ້​ເສຍ​ຊີວິດ​ໝົດ​ລຳ ຈຳນວນ 224 ຄົນ.