ບໍ່​ແກ້ວ​ເປັນ​ອີກ​ແຂວງ​ໜຶ່ງ​ທາງພາກ​ເໜືອ​ຂອງ​ລາວ​ທີ່​ມີ​ຊາຍ​ແດນ​ຕິດກັບ​ບັນ­ດາ​ແຂວງ​ພາຍ​ໃນ ແລະ​ ປະ­ເທດໃກ້​ຄຽງ​ເປັນ­ຕົ້ນ​ແມ່ນ​ມີ​ຂົວ​ມິດ­ຕະ­ພາບລາວ-ໄທ​ແຫ່ງ​ທີ 4 ຕັ້ງ​ຢູ່ອັນ​ໄດ້​ກາຍ­ເປັນເງື່ອນ­ໄຂ ແລະ​ ທ່າ­ແຮງ​ທີ່​ດີ​ແກ່​ການ​ທຳມາ​ຄ້າ­ຂາຍສະ­ເພາະ​ໃນ 6 ເດືອນ​ຕົ້ນ​ສົກປີ​ນີ້ ແຂວງ​ດັ່ງ­ກ່າວ​ໄດ້​ບັນ­ລຸ​ຍອດ​ມູນ​ຄ່າການ​ສົ່ງ​ອອກ​ສິນ­ຄ້າ​ລວມ​ທັງ​ໝົດ​ແລ້ວ 451,71 ຕື້​ກີບ ໃນ​ນັ້ນ​ ໝາກ­ກ້ວຍ​ຫອມຫຼາຍ​ກວ່າ​ໝູ່​ມີ​ມູນ​ຄ່າ 427,2 ຕື້​ກວ່າ​ກີບ ກວມ​ເອົາ 94,57% ຂອງ​ມູນ​ຄ່າ​ການສົ່ງ​ອອກ​ທັງ​ໝົດຂະ­ນະ​ທີ່​ປະຈຸ​ບັນ ​ທາງ​ແຂວງ​ໄດ້​ຫ້າມ​ຂະຫຍາຍ​ເນື້ອ­ທີ່​ທັງ​ໂຈະ​ການ​ອະນຸ​ຍາດ​ລົງ­ທຶນ​ປູກ​ກ້ວຍ​ແລ້ວ.

ແຂວງ​ບໍ່​ແກ້ວ​ຕັ້ງ​ຢູ່​ທິດ​ຕາເວັນ​ຕົກ​ສ່ຽງ​ເໜືອ​ຂອງ​ປະເທດ​ລາວ, ມີ​ເນື້ອ­ທີ່ 6.196 ກີ​ໂລ​ຕາ​ແມັດຊຶ່ງ​ເນື້ອ­ທີ່​ສ່ວນໃຫຍ່​ເປັນ​ເຂດ​ພູ​ດອຍ​ກວມ 70% ຂອງເນື້ອ­ທີ່​ທົ່ວ​ແຂວງປະ­ກອບ​ດ້ວຍ 5 ເມືອງ​ຄື: ເມືອງ​ຫ້ວຍ​ຊາຍ, ຕົ້ນ​ເຜິ້ງ, ຜາອຸ­ດົມ, ປາກ​ທາ ແລະ​ເມືອງເມິງ ປະ­ຈຸ​ບັນ​ມີ​ປະ­ຊາ­ກອນ​ທັງ ໝົດ 1,73 ແສນ​ຄົນ, ຍິງ 86,7 ພັນ​ຄົນ, ມີ 31,2 ພັນ​ຄົວ​ເຮືອນ, 262 ບ້ານໃນ​ແຂວງ​ມີ 13 ຊົນ­ເຜົ່າ​ແຕ່​ລະ​ຊົນ­ເຜົ່າ​ມີ​ຮີດຄອງ​ປະ­ເພ­ນີ​ອັນ​ຫຼາກ​ຫຼາຍທີ່​ມີ​ຄວາມ​ແຕກ​ຕ່າງ​ກັນ, ມີ​ວັດ­ທະ­ນະທຳ​ການ​ດຳ­ລົງ​ຊີ­ວິດ ແລະ​ ຮູບ​ແບບ​ການທຳ​ມາ​ຫາ​ກິນ​ທີ່​ເປັນ​ເອ­ກະ­ລັກ​ຂອງ​ເຜົ່າ​ຕົນ.

ອີງ​ຕາມ​ຂໍ້​ມູນ​ຈາກ​ພະ​ແນກ​ອຸດ​ສາຫະ​ກຳ ແລະ​ການ​ຄ້າ​ແຂວງ​ບໍ່​ແກ້ວເປີດ ເຜີຍ​ຕໍ່​ທີມ​ຂ່າວ​ໜັງ­ສື­ພິມ​ເສດ­ຖະ­ກິດ-ສັງຄົມເມື່ອ​ບໍ່​ດົນ​ມາ​ນີ້​ຮູ້​ວ່າ: ໃນ 6 ເດືອນຕົ້ນ​ສົກ​ປີ 2015-2016 ນີ້ ແຂວງ​ບໍ່​ແກ້ວນຳ​ເຂົ້າ​ສິນ­ຄ້າ​ລວມ​ທັງ​ໝົດ​ແລ້ວ 21,2 ລ້ານ​ໂດ​ລາ ທຽບ­ໃສ່​ແຜນ­ການ​ປີ​ປະ­ຕິ­ບັດ ໄດ້ 48,22% ສາ­ເຫດ​ແມ່ນ​ຍ້ອນ​ຄວາມຕ້ອງ­ການ​ກໍ່­ສ້າງ​ຫຼຸດ​ລົງ​ບັນ­ດາ​ໂຄງ­ການຫຼາຍ​ແຫ່ງ​ໄດ້​ສຳ­ເລັດ ໃນ​ນັ້ນ ​ມີ​ມູນ​ຄ່າ​ນຳເຂົ້າ​ຈໍ​ລະ​ຈອນ 9,54 ລ້ານ​ໂດ​ລາ; ຮັບ​ໃຊ້ໂຄງ­ການ​ລົງ­ທຶນ 3,43 ລ້ານ​ໂດ​ລາ; ຮັບໃຊ້​ໃຫ້​ແຕ່​ອົງ​ການ­ຈັດ­ຕັ້ງ 1,21 ລ້ານ​ໂດລາ ແລະ​ຂັ້ນ​ກະ­ຊວງ​ອະ­ນຸ­ຍາດ 14,19 ລ້ານ​ໂດ​ລາທີ່​ສ່ວນ​ໃຫຍ່​ແມ່ນ​ມາ​ຈາກ​ປະເທດ​ໄທ.

ສ່ວນ​ການ​ສົ່ງ​ອອກ​ສິນ­ຄ້າ​ໃນ​ຊ່ວງດຽວ​ກັນ​ພະ​ແນກ​ອຸດ­ສາ­ຫະ­ກຳ ແລະ ການ​ຄ້າ​ແຂວງ​ບໍ່​ແກ້ວ​ໃຫ້​ຮູ້​ວ່າ: ລວມມີ​ທັງ​ໝົດ 56,46 ລ້ານ​ໂດ​ລາ ຫຼື ປະມານ 451,71 ຕື້​ກີບ ທຽບ­ໃສ່​ແຜນ­ການປີ​ປະ­ຕິ­ບັດ​ໄດ້ 100,83% ທຽບ­ໃສ່​ປີ ກ່ອນ​ເພີ່ມ​ຂຶ້ນ 186,04% ສາ­ເຫດ​ຍ້ອນ ເປັນ​ໄລ­ຍະ​ການ​ຜະ­ລິດ, ອີກ​ດ້ານ​ໜຶ່ງແມ່ນ​ການ​ເກັບ​ກຳ​ສະ­ຖິ­ຕິ​ການ​ສົ່ງ​ອອກກ້ວຍ​ຫອມ​ໄດ້​ຢ່າງ​ຊັດ​ເຈນ​ເພາະ​ຕັ້ງ​ຈຸດກວດ­ກາ​ສະ­ເພາະໂດຍ​ສົ່ງ​ໄປ ສປ ຈີນ ຫຼາຍກວ່າ​ໝູ່.

ຂະ­ນະ​ທີ່​ສິນ­ຄ້າ​ຜ່ານ​ແດນ​ມີທັງ​ໝົດ 127,14 ລ້ານ​ໂດ​ລາໃນ​ນີ້ ໝວດ​ສິນ­ຄ້າ​ຫຼັກ​ໄດ້­ແກ່​ໝວດ​ສະ­ບຽງ​ອາ­ຫານ 60,52 ລ້ານ​ໂດ​ລາ, ຜະ­ລິດ​ຕະ​ພັນ​ກະ­ສິ­ກຳ ແລະ ສັດ­ລ້ຽງ 40,66 ລ້ານ​ໂດ​ລາ, ນໍ້າ­ມັນ ແລະ ເຊື້ອ​ໄຟ 18,47 ລ້ານ​ໂດ​ລາ.

ແນວ­ໃດ​ກໍ​ດີສຳ­ລັບ​ຕົວ​ເລກ​ສິນ­ຄ້າສົ່ງ​ອອກ​ຂອງ​ແຂວງ​ບໍ່​ແກ້ວ​ໃນ 6 ເດືອນຜ່ານ​ມາ​ນັ້ນ​ຫຼາຍ​ກວ່າ​ໝູ່​ແມ່ນ​ໝາກ­ກ້ວຍ ຫອມ​ກວມ​ເອົາ 94,57% ຂອງ​ມູນ​ຄ່າສົ່ງ​ອອກ​ລວມມີ​ມູນ​ຄ່າ 427,20 ຕື້​ກີບ ຈາກ​ຈຳ­ນວນ​ໝາກ­ກ້ວຍ 1,23 ແສນ ໂຕນ​ໄດ້​ສົ່ງ​ອອກ ທຽບ­ໃສ່​ໄລ­ຍະ​ດຽວ​ຂອງ​ປີ​ກ່ອນ​ເພີ່ມ​ຂຶ້ນ​ເທົ່າ​ຕົວ ໂດຍ​ປະ­ຈຸບັນ​ທົ່ວ​ແຂວງ​ມີ​ເນື້ອ­ທີ່​ປູກ​ກ້ວຍ​ທັງ​ໝົດ 11.265 ເຮັກ­ຕາ​ໃນ​ນີ້​ປູກ​ຫຼາຍ​ແມ່ນ​ຢູ່ ເມືອງ​ຕົ້ນ​ເຜິ້ງ ທັງ​ໝົດ​ນັ້ນ​ແມ່ນ​ເປັນ​ນັກ ທຸ­ລະ​ກິດ​ຈາກ ສປ ຈີນ ມາ​ເຊົ່າ​ດິນ​ຂອງປະ­ຊາ­ຊົນ​ປູກ​ໃນ​ລາ­ຄາ​ປະ­ມານ 1,75 ລ້ານ​ກີບ​ຕໍ່​ໄລ່​ຕໍ່​ປີຂະ­ນະ​ທີ່​ຂໍ້​ມູນ​ມີ​ລະ­ບຸ ຕື່ມ​ອີ​ກວ່າ: ຂະ­ນະ​ນີ້​ທາງ​ອຳ­ນາດ​ການ ປົກ­ຄອງ​ແຂວງ​ແມ່ນ​ໄດ້​ອອກ​ແຈ້ງ​ການ ໃຫ້​ຢຸດ​ເຊົາ​ການ​ຂະ­ຫຍາຍ​ເນື້ອ­ທີ່ ພ້ອມໂຈະ​ການ​ອະ­ນຸ­ຍາດ​ລົງ­ທຶນ​ການ​ປູກ​ກ້ວຍ​ຫອມ​ພາຍ​ໃນ​ແຂວງ​ບໍ່​ແກ້ວ​ເປັນ​ທີ່​ຮຽບຮ້ອຍ​ແລ້ວ.

ທີ່ມາ: