ຂປລ. ໃນວັນທີ 18 ພຶດສະພາ ນີ້ ທີ່ກະຊວງ ການຕ່າງປະເທດ ໄດ້ມີການພົບປະ ສອງຝ່າຍລະ ຫວ່າງ ທ່ານ ແສງເພັດ ຮຸ່ງບຸນຍວງ ຮອງລັດຖະມົນຕີ ກະຊວງການຕ່າງປະເທດ ແຫ່ງ ສປປ ລາວ ແລະ ທ່ານນາງ Tone skogen ຮອງລັດຖະມົນຕີ ກະຊວງການຕ່າງປະເທດ ແຫ່ງ ຣາຊະອານາຈັກນອກແວ ພ້ອມດ້ວຍຄະນະ ໃນໂອກາດທີ່ເດີນທາງ ມາຢ້ຽມຢາມ ແລະ ເຮັດວຽກຢູ່ ສປປ ລາວ ແຕ່ວັນທີ 18-19 ພຶດສະພານີ້.
ໃນການພົບຄັ້ງນີ້, ທັງສອງຝ່າຍ ໄດ້ປຶກສາຫາລື ກ່ຽວກັບການເສີມຂະຫຍາຍ ການພົວພັນຮ່ວມມືລະຫວ່າງ ສອງປະເທດໃນຕໍ່ໜ້າ. ນອກນັ້ນ, ສອງຝ່າຍຍັງໄດ້ແລກປ່ຽນ ຄໍາຄິດເຫັນ ຕໍ່ບັນຫາພາກພື້ນ ແລະ ສາກົນ ທີ່ສອງຝ່າຍ ມີຄວາມສົນໃຈ ເຊັ່ນ: ປຶກສາຫາລື ກ່ຽວກັບການຮ່ວມມື ດ້ານນິຕິກໍາອັນຈໍາເປັນ ຈໍານວນໜຶ່ງເພື່ອເປັນພື້ນຖານ ໃຫ້ແກ່ການເປີດກວ້າງ ການຮ່ວມມືດ້ານ ເສດຖະກິດ-ການຄ້າ ແລະ ການລົງທຶນຢູ່ ສປປ ລາວ; ການຮ່ວມມື ດ້ານພະລັງງານ ໄຟຟ້ານໍ້າຕົກ, ສາຍສົ່ງໄຟຟ້າແຮງສູງ, ການພັດທະນາ ຕົວເມືອງ ແລະ ເກັບກູ້ລະເບີດ ທີ່ບໍ່ທັນແຕກ (UXO); ການເປັນປະທານ ອາຊຽນຂອງ ສປປ ລາວ ປີ 2016 ແລະ ການພົວພັນຮ່ວມມື ນອກແວ-ອາຊຽນ ໃນຖານະທີ່ເປັນ ຄູ່ຮ່ວມເຈລະຈາ ຂະແໜງການກັບອາຊຽນ.
ໃນໄລຍະຜ່ານມາ, ນອກແວ ໄດ້ໃຫ້ການ ສະໜັບສະໜູນ ຊ່ວຍເຫລືອ ສປປ ລາວ ໃນຫລາຍຂະແໜງການ, ທັງໃນຂອບສອງຝ່າຍ ແລະ ຫລາຍຝ່າຍ ໃນນັ້ນ ມີການພັດທະນາ ພະລັງງານໄຟຟ້າ, ການຄຸ້ມຄອງ ຊັບພະຍາກອນທໍາມະຊາດ, ການສົ່ງເສີມຂະແໜງການເອກະຊົນ ໃນໄລຍະເສດຖະກິດຂ້າມຜ່ານ, ການພັດທະນາຊັບພະຍາກອນມະນຸດ, ດ້ານສາທາລະນະສຸກຂັ້ນພື້ນຖານ, ການສະໜັບສະໜູນສ້າງຂີດຄວາມສາມາດ ໃຫ້ແກ່ສະຖາບັນຂອງລັດ. ພາຍຫລັງ ການພົບປະທັງສອງຝ່າຍ ໄດ້ຮ່ວມກັນລົງນາມ ໃນບົດບັນທຶກຄວາມເຂົ້າໃຈ ວ່າດ້ວຍການສ້າງຕັ້ງ ກົນໄກການປຶກສາຫາລື ລະຫວ່າງ ສອງກະຊວງການຕ່າງປະເທດ ແລະ ນອກແວ.
ການຢ້ຽມຢາມຂອງ ທ່ານນາງ Tone skogen ພ້ອມດ້ວຍຄະນະ ໃນຄັ້ງນີ້ ເຊິ່ງເປັນຂີດໝາຍອັນສໍາຄັນ ໃນການສົ່ງເສີມ ການພົວພັນ-ຮ່ວມມື ຂອງສອງປະເທດ ໃຫ້ມີບາດກ້າວໃໝ່, ຈາກນັ້ນ ຄະນະຜູ້ແທນນອກແວ ຍັງໄດ້ພົບປະ ທ່ານ ລັດຖະມົນຕີ ກະຊວງພະລັງງານ ແລະ ບໍ່ແຮ່, ຢ້ຽມຢາມໂຄງການຮ່ວມມື ດ້ານອົງຄະທຽມ, ເຄື່ອງຄໍ້າຊູ່ (COPE) ແລະ ໂຄງການ ຮ່ວມມືສອງຝ່າຍ ທີ່ກໍາລັງຈັດຕັ້ງປະຕິບັດ ໃນປັດຈຸບັນ.
ແຫລ່ງຂ່າວ:
ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!