ຂປລ. ຕອນເຊົ້າວັນທີ 17 ພຶດສະພາ ນີ້, ເມືອງຊຳເໜືອ ແຂວງຫົວພັນ ໄດ້ຈັດພີທິສະເຫລີມສະຫລອງວັນສ້າງຕັ້ງສວນແກ້ວຫລັກເມືອງ ຄົບຮອບ 8 ປີ (17 ພຶດສະພາ 2008-17 ພຶດສະພາ 2016), ໂດຍເປັນກຽດເຂົ້າຮ່ວມຂອງທ່ານ ພັນຄຳ ວິພາວັນ ຮອງປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ທ່ານ ວັນໄຊ ແພງຊຸມມາ ເຈົ້າແຂວງໆຫົວພັນ, ມີບັນດາທ່ານ ການນຳຂັ້ນແຂວງ, ເມືອງຊຳເໜືອ, ຫົວໜ້າ–ຮອງຫົວໜ້າພະແນກການອ້ອມຂ້າງແຂວງ ຕະຫລອດຮອດມວນຊົນເມືອງຊຳເໜືອ ເຂົ້າຮ່ວມຢ່າງຫລວງຫລາຍ.
ໃນພິທີຄັ້ງນີ້, ທ່ານ ກິໂກໂນວັນ ບຸນສົງຄາມ ຮອງເຈົ້າເມືອງໆຊຳເໜືອ ໄດ້ເລົ່າມູນເຊື້ອປະຫວັດຄວາມເປັນມາໃນການສ້າງຕັ້ງສວນແກ້ວຫລັກເມືອງ ເຊິ່ງເປັນສັນຍາລັກຄູ່ບ້ານຄູ່ເມືອງ ແລະ ເປັນມິ່ງແກ້ວຂວັນເມືອງ, ເປັນຄະຕິເຕືອນໃຈຂອງຊາວແຂວງ ຫົວພັນ ເຊັ່ນ: ຢູ່ຮ່ວມກັນຢ່າງສັນຕິສຸກ, ບຸກບືນສ້າງສາຄວາມຈະເລີນ, ນຳພາປະຊາຊົນຢູ່ເຢັນເປັນສຸກ ແລະ ປົກຄອງບ້ານເມືອງໂດຍຍຸຕິທຳ, ສາມາດເຮັດໃຫ້ເມືອງຊຳເໜືອ ກໍຄື ແຂວງຫົວພັນ ມີສະຖຽນລະພາບທາງດ້ານການເມືອງ, ມີຄວາມສະຫງົບປອດໄພ, ເສດຖະກິດ-ສັງຄົມ ມີການຂະຫຍາຍຕົວຢ່າງຕໍ່ເນື່ອງ.
ສວນແກ້ວຫລັກເມືອງແຫ່ງນີ້ ສ້າງຂຶ້ນໂດຍແນ່ໃສ່ສ້າງໃຫ້ມີສູນລວມທາງດ້ານຈິດໃຈ ເພື່ອເຊີດຊູກຽດສັກສີ, ຊື່ສຽງ, ມູນເຊື້ອວິລະຊົນຂອງປະຊາຊົນບັນດາເຜົ່າທົ່ວແຂວງຫົວພັນ, ໃນດິນແດນແຫ່ງນີ້ໄດ້ເປັນເຂດທີ່ໝັ້ນຂອງການປະຕິວັດ, ເປັນຖິ່ນກຳເນີດຂອງພັກປະຊາຊົນ ປະຕິບັດລາວ, ເປັນຖິ່ນກຳເນີດ ກອງທັບປະຊາຊົນລາວ, ເປັນສູນກາງຊີ້ນຳໆພາການປະຕິວັດ ຈົນສາມາດໄດ້ຮັບໄຊຊະນະຢ່າງສົມບູນ ໃນວັນທີ 2 ທັນວາ ປີ 1975. ນອກນັ້ນ, ຍັງເປັນສັນຍາລັກແຫ່ງຄວາມກະຕັນຍູ້ຮູ້ບຸນຄຸນຂອງຊາວແຂວງຫົວພັນ ຕໍ່ກັບບັນພະບູລຸດ, ນັກຮົບ ແລະ ປະຊາຊົນທີ່ມີຄຸນງາມຄວາມດີຕໍ່ພາລະກິດປະຕິວັດ ກໍຄື ພາ ລະກິດແຫ່ງການຕໍ່ສູ້ປົກປັກຮັກສາ ແລະ ສ້າງສາແຂວງຫົວພັນ.
ແຫລ່ງຂ່າວ:
ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!