ໄນຈີເຣຍພົບຍິງສາວລາຍໜຶ່ງທີ່ຖືກກຸ່ມຕິດອາວຸດໂບໂກຮາຣາມລັກພາຕົວໄປຈາກໂຮງຮຽນແຫ່ງໜຶ່ງໃນພາກຕາເວັນອອກສຽງເໜືອຂອງປະເທດເມື່ອສອງປີກ່ອນແລ້ວ ໂດຍພົບລາວພ້ອມກັບລູກນ້ອຍ ນັບວ່າເປັນຍິງສາວຄົນທຳອິດທີ່ພົບຕົວຫຼັງຈາກຖືກກຸ່ມຕິດອາວຸດລັກພາຕົວໄປ.
ລາຍງານລະບຸວ່າ ພົບຍິງສາວອາຍຸ 19 ປີດັ່ງກ່າວພ້ອມດ້ວຍລູກນ້ອຍຂອງລາວເມື່ອວັນອັງຄານທີ່ຜ່ານມາ ຂະນະທີ່ຍ່າງຢູ່ແຄມປ່າແຊມບີຊາໃກ້ຊາຍແດນດ້ານທີ່ຕິດຕໍ່ກັບແຄເມຣູນ ຂ່າວການພົບຍິງສາວຄັ້ງນີ້ ເຮັດໃຫ້ຄອບຄົວຂອງຍິງສາວທັງ 218 ຄົນ ທີ່ຍັງຄົງສູນຫາຍໄປ ເກີດຄວາມຫວັງວ່າ ລາວຈະສາມາດໃຫ້ຂໍ້ມູນກ່ຽວກັບທີ່ຢູ່ຂອງຍິງເຫຼົ່ານັ້ນ ແພດປະຈຳຄອບຄົວເປີດເຜີຍວ່າ ຍິງສາວດັ່ງກ່າວເປີດເຜີຍກັບມານດາວ່າ ມີຍິງສາວບາງຄົນເສຍຊີວິດແລ້ວ ແລະ ບາງຄົນຍັງຄົງຖືກກັກຂັງໄວ້.
ກຸ່ມຕິດອາວຸດໂບໂກຮາຣາມບຸກເຂົ້າໄປຍັງໂຮງຮຽນມັດທະຍົມຍິງໃນເມືອງຊິບອກເມື່ອວັນທີ 14 ເມສາ 2014 ແລະຈັບຕົວເດັກຍິງ 276 ຄົນທີ່ກຳລັງກຽມຕົວສອບເສັງຫຼາຍຄົນໜີເອົາຕົວລອດໄປໄດ້ ແຕ່ອີກ 219 ຄົນຍັງຄົງຖືກຈັບຕົວໄວ້ ເຫດການດັ່ງກ່າວ ກາຍເປັນທີ່ສົນໃຈຂອງຜູ້ຄົນທົ່ວໂລກ ແລະສະແດງໃຫ້ເຫັນເຖິງສະຖານະການຄວາມຮຸນແຮງຂອງກຸ່ມຕິດອາວຸດໃນໄນຈີເຣຍ.