ວັນທີ 30 ເມສາ 2016 ໜ່ວຍງານສະກັດກັ້ນ ແລະ ຕ້ານຢາເສບຕິດກອງບັນຊາການ ປກສ ເມືອງພີນໄດ້ນຳກຳລັງວິຊາສະເພາະລົງມ້າງຄະດີຄ້າຂາຍຢາເສບຕິດຢູ່ເຂດບ້ານອາລວຍ ເມືອງພີນ ແຂວງສະຫວັນນະເຂດສາມາດກັກຕົວຜູ້ຖືກຫາໄດ້ 3 ຄົນ ແລະຢຶດຂອງກາງຢາບ້າໄດ້ 597 ເມັດ ພ້ອມລົດຈັກເວັບ 2 ຄັນ ແລະໂທລະສັບ 2 ໜ່ວຍ.
ເຈົ້າໜ້າທີ່ ໜ່ວຍງານສະກັດກັ້ນ ແລະຕ້ານຢາເສບຕິດ ປກສ ເມືອງພີນໃຫ້ຮູ້ວ່າ: ຄະດີດັ່ງກ່າວໄດ້ຮັບແຈ້ງຈາກພົນລະເມືອງດີວ່າຈະມີກຸ່ມຄົນບໍ່ດີມາສົ່ງຢາເສບຕິດຢູ່ຂອບເຂດບ້ານອາລວຍ ຈິ່ງໄດ້ວາງແຜນເຂົ້າຈັບກຸມມາຮອດເວລາປະມານ 12:30 ໂມງ ຂອງວັນທີ 30 ເມສາ 2016 ກໍ ສາມາດກັກຕົວຜູ້ຖືກຫາ 3 ຄົນ ຄື: ທ້າວ ຕູບ ອາຍຸ 29 ປີເຮັດນາຢູ່ບ້ານແກ້ງສະກູເມືອງທ່າປາງທອງ, ທ້າວ ສີທົນ ອາຍຸ 26 ປີເຮັດນາຢູ່ບ້ານນາທອງໃຕ້ເມືອງ ຊົນນະບຸລີ, ທ້າວສອນ ອາຍຸ 37 ປີ ບ້ານແກ້ງສະກູ ເມືອງທ່າປາງທອງ ພ້ອມກັບຢາບ້າ ຢູ່ຖົງໂສ້ງເບື້ອງຂວາ ຈຳນວນ 597 ເມັດ.
ຜ່ານການສອບສວນຂອງເຈົ້າໜ້າທີ່ຜູ້ຖືກຫາທັງສາມຄົນໄດ້ສາລະພາບວ່າ: ຢາບ້າຈຳນວນທີ່ຢຶດໄດ້ນັ້ນແມ່ນຂອງ ພວກກ່ຽວແທ້ ຊຶ່ງໄດ້ມີການຕິດຕໍ່ຊື້ ຂາຍໃຫ້ໄວໜຸ່ມ (ບໍ່ຮູ້ຊື່) ໃນເວລາມາສົ່ງ ຢາຈິ່ງຖືກເຈົ້າໜ້າທີ່ຈັບຕົວມາດຳເນີນຄະດີ ປະຈຸບັນຄະດີດັ່ງກາວຢູ່ໃນຂັ້ນຕອນການສືບສວນ-ສອບສວນເພື່ອຂະຫຍາຍຜົນຫາຜູ້ຮ່ວມຂະບວນການມາດຳເນີນຄະດີຕາມກົດໝາຍ.
ທີ່ມາ: 