ສຳນັກຂ່າວຕ່າງປະເທດ ລາຍງານໃນວັນທີ 18 ພຶດສະພານີ້ວ່າ ສົມເດັດພຣະສັນຕະປາປາ ຟຣານຊິສ ປະມຸກແຫ່ງຄຣິດຕະຈັກ ນິກາຍໂຣມັນກາໂຕລິກ ໄດ້ໃຫ້ສຳພາດລົງຕີພິມໃນໜັງສືພິມ ລາ ຄຣົວ ຂອງຝຣັ່ງ ວິພາກວິຈານມະຫາອຳນາດຕາເວັນຕົກ ທີ່ພະຍາຍາມແຊກແຊງ ແລະ ນຳເອົາປະຊາທິປະໄຕ ໃນແບບຂອງຕົນເອງ ໃຫ້ກັບປະເທດຕ່າງໆເຊັ່ນ ອີຣັກ ແລະ ລີບີ ໂດຍບໍ່ເຄົາລົບວັດທະນະທຳທາງການເມືອງທ້ອງຖິ່ນ ແລະ ກ່າວອີກວ່າ ເອີຣົບ ຄວນຮັບເອົາຜູ້ອົບພະຍົບລີ້ໄພ ເຂົ້າເປັນສ່ວນໜຶ່ງຂອງສັງຄົມ ພ້ອມທັງໄດ້ກ່າວຍົກຍ້ອງ ນະຄອນຫລວງລອນດອນ ປະເທດອັງກິດ ທີ່ໄດ້ເລືອກເອົາຊາວມຸດສະລິມ ເປັນຫົວໜ້າເທດສະບານ ຄົນທຳອິດອີກດ້ວຍ.
ທັງນີ້ ການອອກມາວິພາກວິຈານດັ່ງກ່າວ ຂອງຜູ້ນຳທາງສາສະໜາຄຣິດ ແມ່ນເກີດຂຶ້ນຫລັງຈາກທີ່ ທ່ານ ຈອນ ແຄຣີ ລັດຖະມົນຕີການຕ່າງປະເທດ ສະຫະລັດອາເມຣິກາ ໄດ້ອອກມາປະກາດ ໃນວັນທີ 16 ພຶດສະພາ 2016 ທີ່ນະຄອນຫລວງວຽນ ປະເທດໂອຕຣິດວ່າ ສະຫະລັດອາເມຣິກາ ແລະ ສະມາຊິກຖາວອນ ຄະນະມົນຕີຄວາມໝັ້ນຄົງ ແຫ່ງ ສະຫະປະຊາຊາດ ອີກ 4 ປະເທດຄື ອັງກິດ, ຝຣັ່ງ, ຈີນ ແລະ ຣັດເຊຍ ຈະທຳການເຝິກອົບຮົມ ແລະ ຕິດອາວຸດ ໃຫ້ແກ່ກອງທັບເອກະພາບຂອງລີບີ ເພື່ອຕໍ່ສູ້ກັບກອງກຳລັງລັດອິດສະລາມ ຫລື ກຸ່ມໄອເອັສ ທີ່ກຳລັງເຂົ້າຍຶດຄອງ ພື້ນທີ່ຂອງປະເທດລີບີ ຢ່າງກວ້າງຂວາງໃນປັດຈຸບັນ.
ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!