ຂປລ. ໃນວັນທີ 17 ພຶດສະພາ 2016 ນີ້ ຢູ່ ທຳນຽບປະທານປະເທດ (ຫໍຄໍາ) ທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ ໄດ້ຕ້ອນຮັບບັນດາທູດ ປະເທດເພື່ອນມິດ ເພື່ອເຂົ້າຍື່ນສານຕາຕັ້ງ ດຳລົງຕຳແໜ່ງ ເປັນເອກອັກຄະລັດຖະທູດ ປະຈຳ ສປປ ລາວ. ໃນເວລາ 15:00 ໂມງ ໄດ້ຕ້ອນຮັບ ທ່ານ ຢຸນ ຄັງ ຮຽນ (yun kang haeong) ເຂົ້າຍື່ນສານຕາຕັ້ງ ເພື່ອດຳລົງຕຳແໜ່ງ ເປັນເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສາທາລະນະລັດເກົາຫລີ ປະຈຳ ສປປ ລາວ ໂດຍມີສຳນັກງານສະຖານທູດຕັ້ງຢູ່ ສປປ ລາວ; ສປປ ລາວ ແລະ ສ ເກົາຫລີ ໄດ້ສ້າງຕັ້ງສາຍພົວພັນການທູດຮ່ວມກັນ ແຕ່ປີ 1995.
ເວລາ 15:30 ໄດ້ຕ້ອນຮັບ ທ່ານ ນາງ ຄຽດ ມໍຣັນ(cait moran) ເຂົ້າຍື່ນສານຕາຕັ້ງ ເພື່ອມາດຳລົງຕຳແໜ່ງ ເປັນເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ປະເທດອຽກລັງ ປະຈຳ ສປປ ລາວ ໂດຍມີສຳນັກງານ ສະຖານທູດຕັ້ງຢູ່ບາງກອກ ປະເທດໄທ; ສປປ ລາວ ແລະ ອຽກລັງ ໄດ້ສ້າງຕັ້ງສາຍພົວພັນການທູດຮ່ວມກັນ ໃນວັນທີ 7 ສິງຫາ 1999.
ໃນໂອກາດດັ່ງກ່າວ, ທ່ານປະທານປະເທດ ບຸນຍັງ ວໍລະຈິດ ໄດ້ກ່າວສະແດງຄວາມຍິນດີຕ້ອນຮັບ, ຫວັງວ່າການມາ ປະຕິບັດໜ້າທີ່ການທູດຢູ່ ສປປ ລາວ ຂອງບັນດາທູດປະເທດເພື່ອນມິດໃນຄັ້ງນີ້ ຈະເປັນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີລະຫວ່າງ ສປປ ລາວ ກັບບັນດາປະເທດເພື່ອນມິດສາກົນ ທີ່ມີມາແລ້ວນັ້ນ ໃຫ້ນັບມື້ຂະຫຍາຍຕົວຢ່າງກວ້າງຂວາງ ທັງນຳເອົາຜົນປະໂຫຍດ ມາສູ່ປະເທດຊາດ ແລະ ປະຊາຊົນຢ່າງແທ້ຈິງ ເພື່ອປະກອບສ່ວນເຂົ້າໃນການເສີມຂະຫຍາຍ ການຮ່ວມມືຂອງບັນດາປະເທດ ໃນພາກພື້ນ ແລະ ສາກົນ ນັບມື້ແຕກດອກອອກຜົນງອກງາມຍິ່ງໆຂຶ້ນ.
ບັນດາທູດປະເທດເພື່ອນມິດ ກໍໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນຂອງ ທ່ານປະທານປະເທດ ກໍຄືລັດຖະບານ ແຫ່ງ ສປປ ລາວ, ພ້ອມຢືນຢັນວ່າ ຈະຕັ້ງໜ້າປະຕິບັດໜ້າທີ່ອັນມີກຽດຂອງຕົນ ໃຫ້ປະສົບຜົນສຳເລັດ ເພື່ອປະກອບສ່ວນເຂົ້າໃນການເສີມສ້າງ ສາຍພົວພັນອັນດີງາມຂອງ ສປປ ລາວ ແລະ ປະເທດເພື່ອນມິດ ສາກົນໃຫ້ນັບມື້ຂະຫຍາຍຕົວຢ່າງບໍ່ຢຸດຢັ້ງ.
ແຫລ່ງຂ່າວ:
ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!