ການຮັບໜ້າທີ່ເປັນປະທານ ແລະດຳເນີນກອງປະຊຸມລະດັບລັດຖະມົນຕີແຮງງານອາຊຽນ ຄັ້ງທີ 24 ຂອງລາວແມ່ນໄດ້ເລີ່ມດຳເນີນມາແຕ່ວັນທີ 10 ພຶດສະພາຈົນມາເຖິງວັນທີ 16 ພຶດສະພານີ້ທີ່ໂຮງແຮມດອນຈັນພາເລດ, ກໍໄດ້ປິດລົງດ້ວຍຜົນສຳເລັດຕາມລະດັບຄາດໝາຍພ້ອມທັງຮັບຮອງເອົາຫຼາຍບັນຫາທີ່ສຳຄັນ.
ທ່ານ ດຣ. ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະສະຫວັດດີການສັງຄົມໄດ້ຖະແຫຼງໃຫ້ຮູ້ວ່າ: ກອງປະຊຸມລັດຖະມົນຕີແຮງງານອາຊຽນຄັ້ງ ທີ 24 ໄດ້ມີ 6 ກອງປະຊຸມປິ່ນອ້ອມເຊັ່ນ: ກອງປະຊຸມຄະນະກຳມະການອາຊຽນວ່າດ້ວຍແຮງງານເຄື່ອນຍ້າຍຄັ້ງທີ 9, ກອງປະຊຸມເຈົ້າໜ້າທີ່ອາວຸໂສແຮງງານອາຊຽນ ຄັ້ງທີ 12, ກອງປະຊຸມເຈົ້າໜ້າທີ່ອາວຸໂສແຮງງານອາຊຽນບວກ 3 ຄັ້ງ ທີ 14, ກອງປະຊຸມສຳມະນາວ່າດ້ວຍການພັດທະນາຊັບພະຍາກອນມະນຸດອາຊຽນ ຄັ້ງທີ 5 ລວມທັງກອງປະຊຸມລັດຖະມົນຕີແຮງງານອາຊຽນຄັ້ງທີ 24 ແລະກອງປະຊຸມລັດຖະມົນຕີແຮງງານອາຊຽນບວກ 3 ຄັ້ງທີ 9.
ທັງນີ້ກອງປະຊຸມໄດ້ເຫັນດີເປັນເອກະສັນຮັບຮອງເອົາຖະແຫຼງການວຽງຈັນ ວ່າດ້ວຍການຫັນປ່ຽນຈາກການຈ້າງງານນອກລະບົບໄປສູ່ການຈ້າງງານແບບໃນລະບົບເພື່ອສົ່ງເສີມວຽກທີ່ມີຄຸນຄ່າຢູ່ໃນອາຊຽນຊຶ່ງຖະແຫຼງການດັ່ງ ກ່າວແມ່ນໜຶ່ງໃນ 8 ຂົງເຂດບຸລິມະສິດໃນການເປັນປະທານອາຊຽນຂອງ ສປປ ລາວ ໃນປີ 2016 ແລະຖະແຫຼງການນີ້ຈະຖືກສົ່ງໄປສະພາປະສານງານເສົາຄ້ຳວັດທະນະທຳ-ສັງຄົມອາຊຽນ ເພື່ອພິຈາລະນາຮັບຮອງເອົາຕາມຂັ້ນຕອນກ່ອນສົ່ງໃຫ້ບັນດາຜູ້ນຳອາຊຽນພິຈາລະນາຮັບຮອງເອົາຂັ້ນຕອນສຸດທ້າຍໃນກອງປະຊຸມສຸດຍອດອາຊຽນໃນເດືອນກັນຍາ 2016 ຢູ່ນະຄອນຫຼວງວຽງຈັນ ທີ່ ສປປ ລາວ ຈະເປັນເຈົ້າພາບ.
ພ້ອມດຽວກັນນີ້ກອງປະຊຸມຍັງໄດ້ປຶກສາຫາລືແບບກົງໄປກົງມາກ່ຽວກັບຮ່າງນິຕິກຳວ່າດ້ວຍການປົກປ້ອງ ແລະ ສົ່ງເສີມສິດທິແຮງງານເຄື່ອນຍ້າຍອາ ຊຽນ ແລະເຫັນດີນຳກັນວ່າມອບໝາຍໃຫ້ເຈົ້າໜ້າທີ່ອາວຸໂສແຮງງານສືບຕໍ່ປຶກສາຫາລືບາງບັນຫາທີ່ຍັງຄົງຄ້າງພ້ອມທັງກຳນົດເວລາຄວາມເປັນໄປໄດ້ວ່າຈະໃຫ້ສຳເລັດໃນເດືອນກັນຍາ 2016 ຫຼື ເດືອນເມສາ 2017.
ນອກຈາກນີ້ ກອງປະຊຸມຍັງໄດ້ແລກປ່ຽນຄຳຄິດເຫັນກ່ຽວກັບການຫັນປ່ຽນຈາກການຈ້າງງານນອກລະບົບໄປສູ່ ການຈ້າງງານແບບໃນລະບົບ ເພື່ອສົ່ງເສີມວຽກທີ່ມີຄຸນຄ່າຢູ່ໃນອາຊຽນ, ວຽກງານອື່ນໆທີ່ກ່ຽວຂ້ອງກັບຂະແໜງການແຮງງານອາຊຽນ ແລະກອງປະຊຸມຍັງໄດ້ຮັບຟັງການລາຍງານຜົນກອງປະຊຸມເຈົ້າໜ້າທີ່ອາວຸໂສແຮງງານອາຊຽນໂດຍສະເພາະແມ່ນຄວາມຄືບໜ້າຂອງການຈັດຕັ້ງປະຕິບັດແຜນປະຕິບັດງານຂອງລັດຖະມົນຕີແຮງງານອາຊຽນ, ແຜນປະຕິບັດງານຂອງເຈົ້າໜ້າທີ່ອາວຸໂສແຮງງານອາຊຽນ ແລະແຜນປະຕິບັດງານຂອງເຄືອຂ່າຍອາຊຽນດ້ານວຽກງານຄວາມປອດໄພ ແລະສຸຂະພາບແຮງງານ 2016-2020, ກອງປະຊຸມເຫັນດີສືບຕໍ່ຮັດແໜ້ນຮ່ວມມືດ້ານແຮງງານກັບບັນດາຄູ່ຮ່ວມເຈລະຈາແລະບັນ ດາຄູ່ຮ່ວມພາຍນອກອື່ນໆເພື່ອສະໜັບສະໜູນ ແລະປະກອບສ່ວນເຂົ້າໃນການຈັດຕັ້ງປະຕິວັດວິໄສທັດອາຊຽນ 2025 ໃຫ້ປາກົດຜົນເປັນຈິງ.
ທີ່ມາ: 