ເພື່ອເຮັດໃຫ້ແຜນພັດທະນາເຂດກວມລວມໄຊເສດຖາໃຫ້ເປັນສູນລວມຂອງການຜະລິດໄວຂຶ້ນແຕ່ປະຈຸບັນເຫັນ ວ່າການພັດທະນາຍັງພົບຄວາມຫຍຸ້ງຍາກໂດຍສະເພາະການຊົດເຊີຍເວນຄືນທີ່ດິນໃຫ້ແກ່ປະຊາຊົນຍັງມີບາງຈຳນວນບໍ່ທັນໄດ້ຮັບການແກ້ໄຂເທົ່າທີ່ຄວນ, ທ່ານນາຍົກຈິ່ງເນັ້ນໃຫ້ຜູ້ພັດທະນາ ແລະພາກສ່ວນກ່ຽວຂ້ອງເລັ່ງທົບທວນຄືນເພື່ອແກ້ໄຂຢ່າງຮີບດ່ວນ.
ໃນວັນທີ 14 ພຶດສະພາຜ່ານມາທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍຄະນະລັດຖະມົນຕີຈາກກະຊວງທີ່ກ່ຽວຂ້ອງ, ທ່ານ ກວ່ານ ຫົວປິ່ງ ເອກອັກຄະລັດຖະທູດ ສປ ຈີນ ປະຈຳລາວ ແລະທ່ານ ປອ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ພ້ອມຄະນະລົງຢ້ຽມຢາມ ແລະຊີ້ນຳວຽກງານຢູ່ເຂດພັດທະນາກວມລວມໄຊເສດຖານະຄອນຫຼວງວຽງຈັນ.
ໂອກາດທ່ານນາຍົກລົງມາຢ້ຽມຢາມຄັ້ງນີ້ທ່ານໄດ້ເນັ້ນໜັກບາງບັນຫາວ່າເພື່ອເຮັດໃຫ້ເຂດກວມລວມໄຊເສດ ຖາໄດ້ສືບຕໍ່ມີພັດທະນາຢ່າງຕໍ່ເນື່ອງແລະທັງເປັນການອຳນວຍຄວາມສະດວກໃຫ້ແກ່ການພັດທະນາເປັນກ້າວໆ ນັ້ນຈຸດໜຶ່ງທີ່ຜູ້ພັດທະນາ ແລະພາກສ່ວນທີ່ກ່ຽວຂ້ອງຕ້ອງໄດ້ປຶກສາຫາລືກັນແມ່ນການເລັ່ງແກ້ໄຂບັນຫາຊົດເຊີຍເນື້ອທີ່ດິນ ແລະສິ່ງປຸກສ້າງຂອງປະຊາຊົນທີ່ໄດ້ຮັບຜົນກະທົບຈາກໂຄງສ້າງ ແລະພັດທະນາຈາກເຂດພັດທະນາກວມລວມໄຊເສດຖາ, ທີ່ເຫັນວ່າຍັງມີບາງຈຳນວນບໍ່ທັນໄດ້ຮັບການແກ້ໄຂເນື່ອງຈາກລັດຖະບານຍັງບໍ່ທັນມີງົບຊົດເຊີຍ ແລະຈັດສັນທີ່ຢູ່ອາໄສ ແລະບ່ອນທຳມາຫາກິນຖາວອນ, ມີຄວາມອຸດົມສົມບູນດີກວ່າເກົ່າໂດຍການຊົດເຊີຍຜົນກະທົບໃຫ້ປະຊາຊົນຕ້ອງໃຫ້ມີຄວາມເໝາະສົມ ແລະສົມເຫດສົມຜົນປະຊາຊົນຕ້ອງມີຄວາມພໍອົກພໍໃຈ.
ພ້ອມນີ້ ກໍຕ້ອງມີການສຶກສາອົບຮົມແນວຄິດໃຫ້ແກ່ເຂົາເຈົ້າອີກດ້ວຍເພື່ອເຮັດແນວໃດຈະໃຫ້ເຂົາເຈົ້າມີຄວາມຮ່ວມມືເນື່ອງຈາກວ່າການພັດທະນາເຂດພັດທະນາກວມລວມຕ້ອງມີການພັດທະນາທີ່ຕິດພັນກັບການມີສ່ວນຮ່ວມຂອງປະຊາຊົນ ແລະຕ່າງຝ່າຍຕ່າງມີຜົນປະໂຫຍດຮ່ວມກັນ, ສ່ວນເນື້ອທີ່ດິນຈຳນວນ 400 ກວ່າເຮັກຕາທີ່ໄດ້ມີການພັດທະນາແລ້ວນັ້ນຈົ່ງນຳໃຊ້ໃຫ້ຄຸ້ມຄ່າ ແລະ ໃຫ້ມີພັດທະນາເປັນກ້າວໆ, ສຳລັບບັນຫາເນື້ອທີ່ດິນຈຳນວນ 570 ເຮັກຕາ ທີ່ຜູ້ພັດທະນາໄດ້ສະເໜີໃຫ້ລັດຖະບານຊ່ວຍປະສານງານນຳພາກສ່ວນທີ່ກ່ຽວຂ້ອງ ຊ່ວຍເລັ່ງຊຸກຍູ້ວຽກງານການຊົດເຊີຍເວນຄືນທີ່ດິນໃຫ້ໄວກວ່າເກົ່ານັ້ນຕ້ອງໄດ້ມີການຄົ້ນຄວ້າຄືນຕື່ມກ່ອນ.
ນອກນີ້ທ່ານນາຍົກຍັງເນັ້ນຕື່ມວ່າ: ໄປຄຽງຄູ່ກັບການພັດທະນາເຂດດັ່ງກ່າວນີ້ຜູ້ພັດທະນາຕ້ອງຄຳນຶງເຖິງສະພາບແວດລ້ອມເພື່ອບໍ່ໃຫ້ມີການແຕະ ຕ້ອງເຖິງສະພາບແວດລ້ອມຕົ້ນຕໍແມ່ນການສ້າງໂຄງການຕ້ອງຄິດໄລ່ໃຫ້ດີທີ່ສຸດການສ້າງຖະໜົນ ແລະການຈັດສັນເຂດຕ່າງໆພັດທະນາຕາມຮູບແບບສີຂຽວ ແລະຍືນຍົງຕື່ມ.
ໃນປະຈຸບັນເຂດດັ່ງກ່າວສາມາດລະດົມເອົາຫົວໜ່ວຍວິສາຫະກິດຕ່າງຈາກພາຍໃນ ແລະຕ່າງປະເທດເຂົ້າມາຈົດທະບຽນທັງໝົດ 30 ບໍລິສັດ, ໄດ້ລົງທຶນເຂົ້າໃນການຜະລິດແລ້ວ 8 ບໍລິສັດ ແລະກຳລັງດຳເນີນການກໍ່ສ້າງ 13 ບໍລິສັດໂດຍມີມູນຄ່າການລົງທຶນຕາມສັນຍາ 350 ລ້ານໂດລາກວມເອົາເນື້ອທີ່ປະມານ 73 ເຮັກຕາ, ໃນຂະແໜງການຜະລິດກະສິກຳປຸງແຕ່ງ, ການກໍ່ສ້າງ, ພະລັງງານ ແລະ ໂລຈິດສະຕິກ.
ທີ່ມາ: 