ວັນທີ 13 ພຶດສະພາ 2016 ຜ່ານມາ ໄດ້ມີກອງປະຊຸມກຽມຄວາມພ້ອມໃນການຈັດກອງປະຊຸມສະພາປະຊາຄົມວັດທະນະທຳ-ສັງຄົມອາຊຽນຄັ້ງທີ 15 ຂຶ້ນທີ່ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ ໂດຍການເປັນປະທານ ຂອງທ່ານ ສຈ.ດຣ. ບໍ່ແສງຄຳ ວົງດາລາ ກຳມະການສູນກາງພັກ, ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວ, ມີທ່ານຮອງລັດຖະມົນຕີ, ທ່ານຫົວໜ້າກົມ, ຮອງກົມ ແລະບັນດາຫົວໜ້າພະແນກການເຂົ້າຮ່ວມ.
ໃນກອງປະຊຸມໄດ້ເວົ້າເຖິງແຜນງານ ບຸລິມະສິດທັງໝົດທີ່ຈະນຳສະເໜີເຂົ້າໃນກອງປະຊຸມສຸດຍອດໃນປີ 2016 ມີທັງໝົດ 8 ແຜນບຸລິມະສິດ ຊຶ່ງໃນນັ້ນມີ 2 ແຜນບຸລິມະສິດຢູ່ໃນເສົາຄ້ຳປະຊາຄົມ ວັດທະນະທຳ-ສັງຄົມຄື: 1. ຖະແຫຼງການວຽງຈັນ ວ່າດ້ວຍການຫັນປ່ຽນຈາກການຈ້າງງານນອກລະບົບໄປສູ່ການຈ້າງງານໃນລະບົບ ເພື່ອກ້າວໄປສູ່ການສົ່ງເສີມວຽກທີ່ມີຄຸນຄ່າ ແລະເປັນທຳໃນອາຊຽນກ່ຽວກັບວຽກງານດັ່ງກ່າວພວກເຮົາກໍໄດ້ມອບໃຫ້ກະຊວງແຮງງານສະຫວັດດີການສັງຄົມ ຮ່າງ ທາງດ້ານເນື້ອໃນ ແລະກໍໄດ້ຜ່ານການ ຄົ້ນຄວ້າພິຈາລະນາຢູ່ໃນກອງປະຊຸມເຈົ້າໜ້າທີ່ອາວຸໂສແຮງງານອາຊຽນຢູ່ທີ່ນະຄອນຫຼວງວຽງຈັນ ໃນອາທິດທີ່ຜ່ານມາແລ້ວ ແລະພວມສືບຕໍ່ສະເໜີຂໍການຮັບຮອງໃນກອງປະຊຸມລັດຖະມົນຕີ ແຮງງານອາຊຽນ ຄັ້ງທີ 24 ທີ່ນະຄອນ ຫຼວງວຽງຈັນ ໃນວັນອາທິດຈະມາເຖິງນີ້ 2. ຖະແຫຼງການວຽງຈັນ ວ່າດ້ວຍການ ຊຸກຍູ້ ແລະສົ່ງເສີມການຮ່ວມມືທາງດ້ານ ມໍລະດົກວັດທະນະທຳໃນອາຊຽນ: ການ ຊຸກຍູ້ ແລະສົ່ງເສີມການຮ່ວມມືທາງດ້ານມໍລະດົກວັດທະນະທຳໃນອາຊຽນນັ້ນ ກະຊວງ ຖວທ ໄດ້ເປັນເຈົ້າການຮ່າງເນື້ອໃນສຳເລັດໂດຍພື້ນຖານແລ້ວ, ຮ່າງບົດດັ່ງກ່າວໄດ້ສົ່ງໃຫ້ບັນດາເຈົ້າໜ້າທີ່ອາວຸໂສທາງດ້ານວັດທະນະທຳອາຊຽນ SOMCA ຊຶ່ງປະຈຸບັນນີ້ແມ່ນ ສສ ຫວຽດນາມເປັນປະທານ SOMCA ແລະ AMCA ເພື່ອຂໍຄວາມເປັນເອກະພາບນຳຂະແໜງການວັດທະນະທຳອາຊຽນ ຕາມກົນໄກ ປະຈຸບັນພວມລໍຖ້າຄຳເຫັນຂອງບັນດາປະເທດສະມາຊິກ ຊຶ່ງທ່ານ ປະທານ SOMCA ແລະ AMCA ກໍໄດ້ໃຫ້ການຮ່ວມມືຢ່າງເຕັມທີ່ ແລະພວກເຮົາກໍໄດ້ກຳນົດການສົ່ງຄຳຕອບນັ້ນບໍ່ໃຫ້ກາຍວັນທີ 20 ພຶດສະພາ 2016.
ທີ່ມາ: