ທ່ານ ຄາຣ໌ລອສ ກອສ໌ນ ປະທານເຈົ້າໜ້າທີ່ບໍລິຫານ (ຊີອີໂອ) ຂອງນິສສັນ ມໍເຕີເຕືອນວ່າ ຈະຍົກເລີກຂໍ້ຕົກລົງຊື້ຫຸ້ນໃຫຍ່ໃນມິດຊູບິຊິ ມໍເຕີ ຫາກເລື່ອງໂກງຄ່າປະຢັດນໍ້າມັນຂະຫຍາຍໄປຍັງລົດທີ່ຈຳໜ່າຍໃນຕ່າງປະເທດນຳ.
ທ່ານ ກອສ໌ນ ກ່າວໃນການປະຊຸມໂຕະມົນກັບສື່ມວນຊົນຕ່າງຊາດໃນວານນີ້ວ່າ ຂໍ້ຕົກລົງທີ່ນິສສັນຈະໃຊ້ເງິນ 2.200 ລ້ານໂດລາສະຫະລັດຊື້ຫຸ້ນ 34% ຂອງມິດຊູບິຊິຈະເປັນອັນຈົບທັນທີ ຫາກມິດຊູບິຊິບໍ່ຊື່ສັດເລື່ອງທີ່ອ້າງວ່າໂກງຄ່າປະຢັດນໍ້າມັນສະເພາະລົດທີ່ຈຳໜ່າຍໃນຍີ່ປຸ່ນ ຂະນະນີ້ການຊື້ຫຸ້ນຍັງເປັນພຽງບັນທຶກຄວາມເຂົ້າໃຈ ແລະ ຈະເປັນຂໍ້ຕົກລົງຫຼັງຈາກທີ່ມີການສອບຜ່ານທຸລະກິດແລ້ວ ສ່ວນລົດທີ່ມິດຊູບິຊິຈຳໜ່າຍໃນສະຫະລັດ ເອີຣົບ ແລະ ບ່ອນອື່ນໆ ຈະມີບັນຫາເລື່ອງຄ່າປະຢັດນໍ້າມັນນຳຫຼືບໍ່ນັ້ນ ຫາກທາງການຍີ່ປຸ່ນຈະເຜີຍແຜ່ລາຍງານຜົນການກວດສອບພາຍໃນເດືອນນີ້ ດັ່ງນັ້ນ ກ່ອນທີ່ຈະສະຫຼຸບຂໍ້ຕົກລົງ ນິສສັນຈະຕ້ອງຮູ້ສະຖານະການທີ່ແທ້ຈິງກ່ອນ ແລະຫາກເລື່ອງລາວບານປາຍກໍຈະບໍ່ເຮັດຂໍ້ຕົກລົງຢ່າງແນ່ນອນ.
ມິດຊູບິຊິ ບໍລິສັດຜະລິດລົດອັນດັບຫ້າຂອງຍີ່ປຸ່ນຍອມຮັບເມື່ອເດືອນກ່ອນວ່າ ປອມແປງຕົວເລກຜົນທົດສອບຄ່າປະຢັດນໍ້າມັນໃຫ້ສູງເກີນຄວາມຈິງມາຫຼາຍປີ ມີລາຍງານວ່າ ມິດຊູບິຊິໂກງຄ່າປະຢັດນໍ້າມັນລົດເກືອບທຸກຮຸ່ນທີ່ຈຳໜ່າຍໃນຍີ່ປຸ່ນມາຕັ້ງແຕ່ປີ 1991 ລວມເຖິງລົດຂະໜາດນ້ອຍທີ່ຜະລິດໃຫ້ນິສສັນຕາມໂຄງການຮ່ວມທຶນນຳ ນິສສັນຊຶ່ງເປັນບໍລິສັດຜະລິດລົດອັນດັບສອງຂອງຍີ່ປຸ່ນເປັນຝ່າຍພົບເລື່ອງນີ້ ຂະນະທີ່ມິດຊູບິຊິຢືນຢັນວ່າ ນິສສັນບໍ່ຮູ້ເຫັນກັບການໂກງດັ່ງກ່າວ.