ຂປລ. ວັນ​ທີ 12 ພຶດສະພາ 2016 ນີ້, ກະຊວງ​ການ​ຕ່າງປະ​ເທດ ຮ່ວມ​ກັບ ສະຖານ​ເອກ​ອັກຄະ​ລັດຖະ​ທູດ ສປ ຈີນ ປະຈຳ ສປປ ລາວ ​ໄດ້​ຈັດ​ງານ​ສະ​ເຫລີ​ມສະຫລອງ ​ວັນ​ສ້າງ​ຕັ້ງ​ສາຍພົວພັນການ​ທູດ ລາວ-ຈີນ ຄົບ ຮອບ 55 ປີ (25/4/1961-25/4/2016) ຢູ່ ນະຄອນຫລວງ​ວຽງ​ຈັນ ​ໂດຍ​ມີ ທ່ານ ສິນ​ລະ​ວົງ ຄຸດ​ໄພທູນ ​ເຈົ້າ​ຄອງ ​ນະຄອນຫລວງ​ວຽງ​ຈັນ, ທັງ​ເປັນ​ປະທານ​ສະມາຄົມ​ມິດຕະພາບ ລາວ-ຈີນ, ທ່ານ ສະ​ເຫລີ​ມ​ໄຊ ກົມມະ​ສິດ ລັດຖະມົນຕີ​ກະຊວງ​ການ​ຕ່າງປະ​ເທດ, ທ່ານ ກ່ວນ ຮົວ​ປິ່ງ ​ເອກ​ອັກຄະ​ລັດຖະທູດ​ວິສາມັນ​ ຜູ້​ມີ​ອຳນາດ​ເຕັມ ​ແຫ່ງ ສປ ຈີນ ປະຈຳ ສປປ ລາວ, ບັນດາ​ລັດຖະມົນຕີ, ຮອງ​ລັດຖະມົນຕີ, ຫົວໜ້າ​ກົມ, ຮອງ​ກົມ ​ແລະ ​ແຂກຖືກເຊີນ ​ເຂົ້າ​ຮ່ວມ.

​ໂອກາດ​ດັ່ງກ່າວ, ທ່ານ ສະ​ເຫລີ​ມ​ໄຊ ກົມມະ​ສິດ ​ໄດ້​ມີ​ຄຳ​ເຫັນ ​ໂດຍ​ມີ​ບາງ​ຕອນ​ໃຫ້​ຮູ້​ວ່າ: ລາວ​-ຈີນ ​ເປັນ​ປະ​ເທດ​ ບ້ານ​ໃກ້​ເຮືອນ​ຄຽງ​ ທີ່​ມີ​ຊາຍ​ແດນ​ຕິດ​ຈອດ​ກັນ​ ດ້ວຍ​ສາຍພູ ​ແລະ ​ແມ່​ນ້ຳ​ລຳ​ເຊ, ປະຊາຊົນ​ສອງ​ຊາດ ມີ​ສາຍ​ພົວພັນ ມິດຕະພາບ​ອັນ​ເປັນ​ມູນ​ເຊື້ອ ​ໄປມາຫາສູ່​ກັນ​ແຕ່​ບູຮານ​ນະ​ການ, ສອງ​ປະ​ເທດໄດ້​ເຊັນ​ສັນຍາ ​ສ້າງ​ຕັ້ງ​ສາຍ​ພົວພັນ ​ການ​ທູດ​ນຳ​ກັນ ​ໃນ​ວັນ​ທີ 25 ​ເມສາ 1961. ຕະຫລອດ​ໄລຍະ 55 ປີ ຜ່ານ​ມາ, ສາຍ​ພົວພັນມິດຕະພາບ ​ແລະ ການ​ຮ່ວມ​ມືລະຫວ່າງ ລາວ​-ຈີນ ​ໄດ້​ຮັບ​ການ​ປັບປຸງ​ ​ແລະ ຂະຫຍາຍຕົວຢ່າງ​ຕໍ່​ເນື່ອງ ຈົນ​ຮອດ​ປັດຈຸບັນ. ​ໃນ​ປີ 2000 ສອງ​ປະ​ເທດ ​ໄດ້​ຕົກລົງ​ເຫັນ​ດີ ​ແລະ ອອກ​ຖະ​ແຫລ​ງການ​ຮ່ວມ ລາວ-ຈີນ ວ່າ​ດ້ວຍ​ການ​ພົວພັນ​ແບບ​ເພື່ອນ​ບ້ານ​ ທີ່​ເປັນ​ມິດ, ​ໄວ້​ເນື້ອ​ເຊື່ອ​ໃຈ​ກັນ, ໝັ້ນຄົງ​ຍາວ​ນານ, ຮ່ວມ​ມື​ຮອບດ້ານ, ຮອດ​ປີ 2009 ​ໄດ້​ຕົກລົງ​ເປັນເອກະ​ພາບ​ກັນ ​ຍົກ​ລະດັບ​ການ​ພົວພັນ​ຂຶ້ນ ​ເປັນ​ການ​ພົວພັນ​ແບບ​ຄູ່​ຮ່ວມ​ຍຸດ​ທະ​ສາ​ດຮອບ​ດ້ານ ອັນ​ໄດ້​ກາຍ​ເປັນພື້ນຖານ​ອັນ​ໃໝ່ ທີ່​ໜັກ​ແໜ້ນ ​ໃນ​ການ​ຂະຫຍາຍ​ສາຍ​ພົວພັນ​ ຕາມ​ທິດ “4 ດີ” ຄື: ​ເປັນ​​ເພື່ອ​ນບ້ານ​ໃກ້​ຄຽງ​ທີ່​ດີ, ​ເປັນ​ເພື່ອ​ນມິດ​ທີ່​ດີ, ​ເປັນ​ສະຫາຍ​ທີ່​ດີ ​ແລະ ​ເປັນ​ຄູ່​ຮ່ວມມື​ທີ່​ດີ.

ທ່ານ ສະ​ເຫລີ​ມ​ໄຊ ກົມມະ​ສິດ ​ກ່າວ​ຕື່ມ​ ວ່າ: ສປ ຈີນ ​ເປັນ​ປະ​ເທດຢູ່ອັນ​ດັບ 1 ​​ໃນການ​ລົງທຶນຂອງ​ຕ່າງປະ​ເທດ ຢູ່ ສປປ ລາວ, ນັບ​ແຕ່​ປີ 2010 ​ເປັນ​ຕົ້ນ​ມາ ມູນ​ຄ່າ​ການ​ຄ້າ​ຂອງ​ສອງ​ປະ​ເທດ ​ໄດ້​ເພີ່ມ​ຂຶ້ນ​ຢ່າງ​ໝັ້ນ​ທ່ຽງ, ຮອດ​ປີ 2014 ​ສາມາດ​ບັນລຸ​ເຖິງ 3,6 ຕື້​ໂດ​ລາ​ສະຫະລັດ, ປີ 2015 ມູນ​ຄ່າ​ການ​ລົງທຶນຂອງ​ວິ​ສາ​ຫະກິດ​ຈີນ ຢູ່ ລາວ ບັນລຸ 6 ຕື້​ກວ່າ​ໂດ​ລາ​ສະຫະລັດ ​ໃນ​ນັ້ນລວມມີ 760 ກວ່າ​ໂຄງການ. ມາ​ຮອດ​ປັດຈຸບັນ ​ໂຄງການ​ສຳຄັນຫລາຍ​ສິບ​ໂຄງການໄດ້​ເກີດ​ຂຶ້ນ​ ເປັນ​ຕົ້ຂົວ​ຂ້າມ​ນ້ຳຂອງ​ຢູ່​ຫ້ວຍ​ຊາຍ, ​ຂົວ​ຂ້າມ​ນ້ຳຂອງ​ຢູ່ເມືອງ​ປາກ​ແບ​ງ, ສະໜາມ​ບິນຫລວງ​ພະ​ບາງ, ສະໜາມກິລາ​ຫລັກ 16, ຫໍ​ປະຊຸມ​ແຫ່ງ​ຊາດ, ອາຄານ​ສູນ​ກາງ​ພັກ, ລະບົບ​ຊົນລະປະທານ, ​ເຂື່ອນ​ໄຟຟ້າ​ຫລາຍ​ເຂື່ອນ, ​ເສັ້ນທາງ​ຫລາຍ​ສາຍ ​ແລະ ອື່ນໆ. ​ໂຄງການ​ທີ່​ພົ້ນ​ເດັ່ນ​ທີ່​ສຸດ ທີ​ມີ​ລັກສະນະ​ຍຸດ​ທະ​ສາດ ​ແລະ ປະຫວັດສາດ​ ແຫ່ງ​ການ​ພົວພັນ​ຮ່ວມ​ມື​ ລາວ-ຈີນ ​ແມ່ນ​ໂຄງການ​ສ້າງ​ທາງ​ລົດ​ໄຟ ລາວ-ຈີນ ​ແລະ ​ໂຄງການ​ສ້າງ​ ດາວ​ທຽມ​ດວງ​ທຳ​ອິດ. ນອກ​ນັ​້ນ, ລັດຖະບານ​ຈີນ ຍັງ​ໄດ້​ຊ່ວຍ​ເຫລືອ​ດ້ານ​ການ​ສຶກສາ, ສາທາລະນະ​ສຸກ ​ແລະ ອື່ນໆ.

ແຫລ່ງຂ່າວ:

ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!