ຂປລ. ກອງປະຊຸມ ເຈົ້າໜ້າທີ່ອາວຸໂສ ແຮງງານອາຊຽນ ຄັ້ງທີ 12 ໄດ້ຈັດຂຶ້ນ ໃນຕອນບ່າຍຂອງວັນທີ 11 ພຶດສະພາ ນີ້ ທີ່ນະຄອນຫລວງວຽງຈັນ, ພາຍໃຕ້ຫົວຂໍ້ “ການຫັນປ່ຽນ ຈາກການຈ້າງງານນອກລະບົບ ໄປສູ່ການຈ້າງງານ ໃນລະບົບ ເພື່ອກ້າວໄປສູ່ ການສົ່ງເສີມວຽກ ທີ່ມີຄຸນຄ່າ ແລະ ເປັນທຳໃນອາຊຽນ” ເຊິ່ງເປັນການສືບຕໍ່ ຈາກກອງປະຊຸມ ເຈົ້າໜ້າທີ່ອາວຸໂສ ແຮງງານອາຊຽນ ຄັ້ງທີ 11 ທີ່ປະເທດຟີລິບປິນ ເມື່ອຕົ້ນປີ 2015 ຜ່ານມາ. ໂດຍໃຫ້ກຽດເຂົ້າຮ່ວມ ກອງປະຊຸມ ມີທ່ານ ຄຳແພງ ໄຊສົມແພງ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ, ພ້ອມດ້ວຍບັນດາ ຕົວແທນຈາກ 10 ປະເທດສະມາຊິກ ອາຊຽນເຂົ້າຮ່ວມ.
ທ່ານ ຄຳແພງ ໄຊສົມແພງ ກ່າວວ່າ: ກອງປະຊຸມ ເຈົ້າໜ້າທີ່ອາວຸໂສ ແຮງງານອາຊຽນ ຄັ້ງທີ 12 ນີ້ ຈະໄດ້ປຶກສາຫາລື ບັນດາບັນຫາ ສຳຄັນຕົ້ນຕໍ ຂອງວຽກງານແຮງງານ ທີ່ພົວພັນເຖິງ ວຽກງານເສດຖະກິດ ແລະ ສັງຄົມ ໂດຍຜ່ານເອກະສານ ການຈັດຕັ້ງປະຕິບັດ ແຜນງານຂອງປະຊາຄົມ ວັດທະນະທຳ-ສັງຄົມ, ເສດຖະກິດ ແລະ ເອກະສານ ຂະແໜງການ ທີ່ກ່ຽວຂ້ອງ ເຊັ່ນ: ຂອບວຽກພາກພື້ນ ແລະ ແຜນປະຕິບັດງານ ເພື່ອຈັດຕັ້ງປະຕິບັດ ຖະແຫລງການອາຊຽນ ວ່າດ້ວຍການສ້າງ ຄວາມເຂັ້ມແຂງແກ່ການປົກປ້ອງສັງຄົມ, ສົນທິສັນຍາອາຊຽນ ວ່າດວ້ຍການ ຕ້ານການຄ້າມະນຸດ ໂດຍສະເພາະ ແມ່ຍິງ ແລະ ເດັກນ້ອຍ, ຂອບວຸດທິ ການສຶກສາອາຊຽນ, ແຜນງານລັດຖະມົນຕີ ແຮງງານອາຊຽນ 2016-2020; ແຜນງານຂອງ ຄະນະກຳມະການ ຈັດຕັ້ງປະຕິບັດ ຖະແຫລງການອາຊຽນ ວ່າດ້ວຍການປົກປ້ອງ ແລະ ຄຸ້ມຄອງສິດທິແຮງງານ ເຄື່ອນຍ້າຍ 2016-2020, ແຜນປະຕິບັດງານ ສຸຂະພາບ ແລະ ຄວາມປອດໄພອາຊຽນ 2016-2020 ແລະ ແຜນປະຕິບັດງານ ຂອງໜ່ວຍເຈົ້າໜ້າທີ່ ອາວຸໂສແຮງງານອາຊຽນ. ອີກບັນຫາໜຶ່ງທີ່ສຳຄັນ ຂອງກອງປະຊຸມນີ້ ແມ່ນການພິຈາລະນາ ຮ່າງຖະແຫລງການວຽງຈັນ ວ່າດ້ວຍການຫັນປ່ຽນ ຈາກການຈ້າງງານ ນອກລະບົບ ໄປສູ່ການຈ້າງງານ ໃນລະບົບ ເພື່ອກ້າວໄປສູ່ ການສົ່ງເສີມ ວຽກທີ່ມີຄຸນຄ່າ ແລະ ເປັນທຳໃນອາຊຽນ ເພື່ອຈະໄດ້ລາຍງານ ຕໍ່ກອງປະຊຸມ ລັດຖະມົນຕີ ແຮງງານອາຊຽນ ຄັ້ງທີ 24 ພິຈາລະນາຕໍ່ໄປ.
ຢ່າງໃດກໍຕາມ ເນື່ອງຈາກວ່າ ວຽກແຮງງານ ເປັນວຽກທີ່ກວ້າງຂວາງ ແລະ ສະໜັບສະໜູນ ການພັດທະນາ ເສດຖະກິດ-ສັງຄົມ ຂອງບັນດາປະເທດ ສະມາຊິກອາຊຽນ, ທ່ານ ຄຳແພງ ໄຊສົມແພງ ໄດ້ເນັ້ນໃຫ້ທີ່ປະຊຸມ ເອົາໃຈໃສ່ຄົ້ນຄວ້າ ບັນດາເອກະສານ ທີ່ກ່ຽວຂ້ອງ ກັບການອຳນວຍ ຄວາມສະດວກໃຫ້ແກ່ ການຊອກຫາວຽກ ເຮັດງານທຳໃນອາຊຽນ ໃຫ້ມີຄວາມຮັດກຸມ ແລະ ມີຄວາມແທດເໝາະ ກັບບັນດາປະເທດ ສະມາຊິກອາຊຽນ; ສະເໜີໃຫ້ພິຈາລະນາ ບັນດາເນື້ອໃນເອກະສານ ທີ່ກ່ຽວຂ້ອງກັບ ການເພີ່ມທະວີ ຄວາມກົມກຽວ ໃນການປະສານງານ ວຽກງານພັດທະນາ ສີມືແຮງງານ, ສ້າງ ແລະ ທົດສອບມາດຕະຖານ ສີມືແຮງງານ ແລະ ກ້າວໄປເຖິງ ການຮັບຮູ້ສີມືແຮງງານ ເຊິ່ງກັນ ແລະ ກັນ; ສະເໜີ ໃຫ້ພິຈາລະນາ ກົນໄກປະສານງານ ໃນການຮ່ວມມືຍາດແຍ່ງ ການຊ່ວຍເຫລືອ ຈາກປະເທດຄູ່ເຈລະຈາ ແລະ ອົງການ ຈັດຕັ້ງສາກົນອື່ນໆ ເພື່ອສະໜັບສະໜູນ ການຈັດຕັ້ງປະຕິບັດ ບັນດາກິດຈະກຳ ແລະ ແຜນງານທີ່ພົວພັນ ກ່ຽວກັບແຮງງານ ໃຫ້ມີປະສິດທິພາບກວ່າເກົ່າ.
ແຫລ່ງຂ່າວ:
ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!