ສຳນັກຂ່າວຕ່າງປະເທດ ລາຍງານໃນວັນທີ 10 ພຶດສະພາຜ່ານມານີ້ວ່າ ທີມນັກວິໄຈຊາວອົດສະຕຣາລີ ໄດ້ອອກມາຢືນຢັນເປັນຄັ້ງທຳອິດ ກ່ຽວກັບຜົນກະທົບທີ່ເກີດຂຶ້ນ ຈາກບັນຫາສະພາບອາກາດປ່ຽນແປງ ທີ່ສົ່ງຜົນເຮັດໃຫ້ລະດັບນ້ຳທະເລ ເພີ່ມສູງຂຶ້ນຖ້ວມຊາຍຝັ່ງເກາະຂະໜາດນ້ອຍ 5 ແຫ່ງ ຢູ່ມະຫາສະໝຸດປາຊີຟິກ ຈົມຫາຍໄປຈາກແຜນທີ່ໂລກແລ້ວ.
ທີມນັກວິໄຈດັ່ງກ່າວ ໄດ້ເປີດເຜີຍລາຍງານລົງ ໃນວາລະສານວິທະຍາສາດ ‘Environmental Research Letters’ ເມື່ອວັນອັງຄານທີ 10 ພຶດສະພາ 2016 ຜ່ານມາ ໂດຍລະບຸວ່າ ການເພີ່ມຂຶ້ນຂອງລະດັບນ້ຳທະເລ ໃນໄລຍະຫລາຍປີຜ່ານມາ ໄດ້ເຮັດໃຫ້ເກາະຂະໜາດນ້ອຍ 5 ແຫ່ງ ຂອງໝູ່ເກາະໂຊໂລມອນ ໃນມະຫາສະໝຸດປາຊີຟິກ ຈົມຫາຍໄປຈາກແຜນທີ່ໂລກແລ້ວ ໃນຂະນະທີ່ມີອີກ 6 ເກາະ ກຳລັງຖືກນ້ຳທະເລກັດເຊາະ ເຮັດໃຫ້ຊຸມຊົນຫລາຍແຫ່ງຖືກທຳລາຍ.
ການວິໄຈດັ່ງກ່າວ ແມ່ນຖືກດຳເນີນດ້ວຍການກວດສອບ ເກາະຈຳນວນ 33 ແຫ່ງ ໂດຍໃຊ້ພາບຖ່າຍທາງອາກາດ ແລະ ພາບຖ່າຍຈາກດາວທຽມ ເລີ່ມແຕ່ປີ 1947 ເຖິງປີ 2014 ປະກອບກັບຫລັກຖານທາງປະຫວັດສາດ ແລະ ຄວາມຮູ້ທາງທ້ອງຖິ່ນ ຊຶ່ງສາມາດລະບຸໄດ້ວ່າ ໝູ່ເກາະໂຊໂລມອນ ມີລະດັບນ້ຳທະເລສູງຂຶ້ນ ປະມານ 10 ຊັງຕີແມັດຕໍ່ປີ ຕະຫລອດໄລຍະ 2 ທົດສະວັດຜ່ານມາ.
ເກາະທີ່ຖືກຈົມຫາຍໄປທັງ 5 ເກາະດັ່ງກ່າວນີ້ ແມ່ນເປັນເກາະປະກາຣັງ ທີ່ບໍ່ມີຄົນອາໄສຢູ່ ໂດຍມີຂະໜາດພື້ນທີ່ ບໍ່ເກີນ 5 ເຮັກຕາ, ແຕ່ບາງເກາະໄດ້ຖືກນຳໃຊ້ອາໄສຢູ່ຊົ່ວຄາວ ໂດຍຊາວປະມົງໃນທ້ອງຖິ່ນ ຊຶ່ງການອອກມາຢືນຢັນ ກ່ຽວກັບຜົນກະທົບ ຂອງສະພາບອາກາດປ່ຽນແປງ ທີ່ເກີດຂຶ້ນຕໍ່ກັບຊາຍຝັ່ງ ແລະ ຜູ້ຄົນໃນມະຫາສະໝຸດປາຊີຟິກ ໃນເທື່ອນີ້ ແມ່ນເປັນຄັ້ງທຳອິດຂອງທີມນັກວິທະຍາສາດ, ແນວໃດກໍຕາມ ທີມນັກວິທະຍາສາດຍັງພົບວ່າ ການຖົດຖອຍຂອງຊາຍຝັ່ງ ທີ່ເກີດຂຶ້ນຈາກການກັດເຊາະຂອງຄື້ນນ້ຳ ກໍເປັນອີກປັດໄຈໜຶ່ງ ຂອງການຈົມລົງ.
ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!