ສຳນັກຂ່າວຕ່າງປະເທດ ລາຍງານໃນວັນທີ 9 ພຶດສະພານີ້ວ່າ ທ່ານ ເຣເຊບ ຕອຍຢິບ ເອີໂດກັນ ປະທານາທິບໍດີຕວກກີ ໄດ້ອອກມາລະບຸໃນວັນທີ 8 ພຶດສະພາ 2016 ຜ່ານມານີ້ວ່າ ພັນທະມິດນາໆຊາດ ກຳລັງຫັກຫລັງຕວກກີ ດ້ວຍການກຽມຖອນຕົວອອກຈາກ ການຕໍ່ສູ້ກັບກຸ່ມລັດອິດສະລາມ ຫລື ໄອເອັສ ໃນປະເທດຊີຣີ ແລະ ປ່ອຍໃຫ້ຕວກກີ ຕ້ອງຮັບມືກັບໄພຄຸກຄາມຂອງກຸ່ມດັ່ງກ່າວ ແຕ່ພຽງລຳພັງ.
ທ່ານ ປະທານາທິບໍດີຕວກກີ ໄດ້ກ່າວວ່າ ” ພວກເຂົາຖິ້ມເຮົາໄວ້ພຽງລຳພັງ ທ່າມກາງສະພາວະຍາກລຳບາກ ໃນການປະເຊີນໜ້າກັບກຸ່ມກໍ່ການຮ້າຍນີ້, ຊາດທີ່ອ້າງຕົນເອງວ່າເປັນພັນທະມິດ ກັບເລືອກທີ່ຈະຖອນຕົວ ທັງໆທີ່ພວກເຂົາ ບໍ່ເຄີຍປະສົບຄວາມສູນເສຍທີ່ນອງເລືອດ ຄືກັບຕວກກີໄດ້ເຄີຍປະສົບມາ ”
ທັງນີ້ ໃນໄລຍະຜ່ານມາ ລັດຖະບານຕວກກີ ໄດ້ອະນຸຍາດໃຫ້ສະຫະລັດອາເມຣິກາ ເອົາເຮືອບິນສູ້ຮົບ ເຂົ້າມາປະຈຳການໃນຖານທັບອາກາດຕວກກີ ທາງພາກໃຕ້ຂອງປະເທດ ເພື່ອປະຕິບັດການໂຈມຕີທາງອາກາດ ໃສ່ກຸ່ມໄອເອັສ ຢູ່ປະເທດຊີຣີ ແລະ ອີຣັກ.
ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!