ຂປລ.ຕອບສະໜອງ ຕາມຄຳເຊີນຂອງ ທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ທ່ານ ອູ ຕິນ ຈໍ, ປະທານາທິບໍດີ ແຫ່ງ ສາທາລະນະລັດ ສະຫະພາບມຽນມາ ພ້ອມດ້ວຍພັນລະຍາ ແລະ ຄະນະ ໄດ້ເດີນທາງມາຢ້ຽມຢາມ ທາງລັດຖະ ກິດ ທີ່ ສປປ ລາວ ໃນວັນທີ 6 ພຶດສະພາ 2016, ເປັນປະເທດທໍາອິດ ພາຍຫລັງເຂົ້າດຳລົງຕຳແໜ່ງໃໝ່ ແລະ ເພື່ອເສີມຂະຫຍາຍສາຍພົວພັນ ມິດຕະພາບ ແລະ ຮັດແໜ້ນການຮ່ວມມືທີ່ດີ ລະຫ່ວາງ ສອງປະເທດ ລາວ ແລະ ມຽນມາ.
ພິທີຕ້ອນຮັບຢ່າງສົມກຽດ ແລະ ການພົບປະສອງຝ່າຍ ຢ່າງເປັນທາງການ ໄດ້ຈັດຂຶ້ນໃນຕອນເຊົ້າ ຂອງວັນທີ 6 ພຶດສະພາ 2016 ຢູ່ທີ່ສຳນັກງານປະທານປະເທດ. ໃນການພົບປະສອງຝ່າຍ ໄດ້ສະແດງຄວາມຍິນດີ ແລະ ຕີລາຄາສູງຕໍ່ໝາກຜົນ ຂອງການພົວພັນ ແລະ ການຮ່ວມມືອັນດີງາມ ລະຫວ່າງສອງປະເທດ ໃນໄລຍະຜ່ານມາ. ພ້ອມດຽວກັນນັ້ນ, ສອງຝ່າຍ ຍັງໄດ້ປຶກສາຫາລື ແລະ ແລກປ່ຽນ ຄວາມຄິດຄວາມເຫັນຮ່ວມກັນ ກ່ຽວກັບບັນຫາພາກພື້ນ ແລະ ສາກົນ ທີ່ມີຄວາມສົນໃຈ ແລະ ໄດ້ຕົກລົງເຫັນດີ ເພີ່ມທະວີ ແລະ ຜັນຂະຫຍາຍຜົນການຕົກລົງ ຂອງຄະນະກຳມາທິການຮ່ວມມື ລາວ-ມຽນມາ ຄັ້ງທີ 11 ໃຫ້ປະກົດຜົນເປັນຈິງ ແລະ ຊອກຊ່ອງທາງຮ່ວມກັນໃນການສົ່ງເສີມການຄ້າ, ການລົງທືນ, ການສຶກສາ, ການທ່ອງທ່ຽວ ແລະ ສາທາລະນະສຸກ ກໍຄື ການພົວພັນຮ່ວມມືລະຫວ່າງສອງປະເທດ ທັງໃນຂອບສອງຝ່າຍ ແລະ ຫລາຍຝ່າຍໃຫ້ນັບມື້ນັບກວ້າງຂວາງ ແລະ ເກີດດອກອອກ ຜົນຍິ່ງໆຂຶ້ນບົນພື້ນຖານສອງຝ່າຍຕ່າງມີຜົນປະໂຫຍດ.
ໃນໂອກາດການມາຢ້ຽມຢາມ ສປປ ລາວ ຄັ້ງນີ້, ທ່ານ ປະທານາທິບໍດີ ແຫ່ງ ສາທາລະນະລັດ ສະຫະພາບ ມຽນມາ ໄດ້ຮັບການເຂົ້າຢ້ຽມຂໍ່ານັບຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ. ພິເສດ ໃນຕອນບ່າຍຂອງມື້ດຽວກັນ, ທ່ານນາງ ອອງຊານ ຊູຈີ, ທີ່ປຶກສາແຫ່ງລັດ, ລັດຖະມົນຕີ ກະຊວງການຕ່າງປະເທດ ທັງເປັນລັດຖະມົນຕີ ປະຈໍາສຳນັກງານ ປະທານາທິບໍດີແຫ່ງ ສສ ມຽນມາ ທີ່ໄດ້ຕິດຕາມ ປະທານາທິບໍດີ ອູ ຕິນ ຈໍ ມາຢ້ຽມຢາມລາວຄັ້ງນີ້ ກໍໄດ້ເຂົ້າພົບປະກັບທ່ານ ສົມພັນ ແພງຄຳມີ, ຮອງປະທານສະພາແຫ່ງຊາດ ແຫ່ງ ສປປ ລາວ.ໃນຕອນທ່ຽງຂອງວັນ ດຽວກັນ ທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ພັນລະຍາ ກໍໄດ້ຈັດງານລ້ຽງຕ້ອນຮັບ ເປັນກຽດໃຫ້ແກ່ທ່ານ ປະທານາທິບໍດີ ແລະ ພັນລະຍາ ພ້ອມດ້ວຍຄະນະ ແລະ ຕໍ່ຈາກນັ້ນ ໄດ້ໄປວາງພວງມາລາ ທີ່ ອານຸສາວະລີນັກຮົບນິລະນາມ ແລະ ຢ້ຽມຢາມບັນດາສະຖານທີ່ ທາງວັດທະສະທໍາ ໃນນະຄອນຫລວງວຽງຈັນ ຄື: ພະທາດຫລວງ, ວັດສີສະເກດ ແລະ ຫໍພິພິທະພັນແຫ່ງຊາດ ກ່ອນເດີນທາງກັບຄືນປະເທດ ໃນຕອນແລງ ຂອງວັນດຽວກັນ ດ້ວຍຄວາມສະຫວັດດີພາບ.
ແຫລ່ງຂ່າວ:
ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!