ວັນທີ 6 ພຶດສະພາຜ່ານມານີ້ ທີ່ກະຊວງການຕ່າງປະເທດ, ນະຄອນຫຼວງວຽງຈັນ ໄດ້ມີພິທີພົບປະສອງຝ່າຍປະຈຳປີຄັ້ງທີ 7 ລະຫວ່າງ ສປປ ລາວ ແລະ ສະຫະລັດອາເມລິກາ, ຊຶ່ງມີຄະນະຜູ້ແທນຝ່າຍລາວນຳໂດຍທ່ານ ແສງເພັດ ຮຸ່ງບຸນຍວງ, ຮອງລັດຖະມົນຕີກະຊວງການຕ່າງປະເທດ ແລະ ຄະນະຜູ້ແທນອາເມຣິກາ ນຳໂດຍ ທ່ານ ດານຽນ ຣັດເຊວ ລັດຖະມົນຕີຊ່ວຍວ່າການກະຊວງການຕ່າງປະເທດ, ພ້ອມດ້ວຍບັນດາເຈົ້າໜ້າທີ່ຈາກກະຊວງການຕ່າງປະເທດ, ກະຊວງປ້ອງກັນປະເທດ ແລະ ອົງການພັດທະນາສາກົນຂອງສະຫະລັດອາເມລິກາ.
ໂອກາດນີ້ສອງຝ່າຍໄດ້ສະຫຼຸບຕີລາຄາຄືນ ແລະ ແລກປ່ຽນຄຳຄິດເຫັນກ່ຽວກັບບັນຫາຕ່າງໆທີ່ນອນຢູ່ໃນຂອບການຮ່ວມມືທັງສອງຝ່າຍເຊັ່ນ: ວຽກງານການຊອກຄົ້ນຫາສິ່ງເສດເຫຼືອຂອງທະຫານອາເມຣິກາທີ່ຫາຍສາບສູນໄປໃນປາງສົງຄາມ (MIX), ການເກັບກູ້ລະເບີດທີ່ບໍ່ທັນແຕກ (UXO), ການຮ່ວມມືດ້ານສາທາລະນະສຸກ, ການສຶກສາ, ແລະ ວັດທະນະທຳ, ການຊຸກຍູ້ສົ່ງເສີມການພົວພັນຮ່ວມມືດ້ານການຄ້າ-ການລົງທຶນລະຫວ່າງສອງປະເທດ.
ນອກນີ້ ທັງສອງຝ່າຍຍັງໄດ້ປຶກສາຫາລືກ່ຽວກັບການຢ້ຽມຢາມສປປລາວຂອງປະທານາທິບໍດີ ບາລັກ ໂອບາມາ ໃນເດືອນກັນຍາທີ່ຈະມາເຖິງນີ້ຊຶ່ງເປັນການຢ້ຽມຢາມຄັ້ງທຳອິດ, ພ້ອມດຽວກັນ ຍັງໄດ້ປຶກສາຫາລືກ່ຽວກັບການເປັນປະທານອາຊຽນຂອງ ສປປ ລາວ ແລະໃນວາລະທີ່ ສປປ ລາວ ຈະໄດ້ຕ້ອນຮັບບັນດາຜູ້ນຳລະດັບໂລກທີ່ເຂົ້າມາຮ່ວມກອງປະຊຸມອາຊຽນ ແລະ ອາຊີຕາເວັນອອກໃນປີນີ້.
ໂອກາດດຽວກັນເຈົ້າໜ້າທີ່ສະຫະລັດອາເມຣິກາ ແລະ ສປປ ລາວ ເຫັນດີຕໍ່ເປົ້າໝາຍຂອງແຜນງານການໃຫ້ຄວາມຊ່ວຍເຫຼືອພັດທະນາຂອງສະຫະລັດອາເມຣິກາຮອບດ້ານໃນ ສປປ ລາວ ໃນໃກ້ໆນີ້ມີມູນຄ່າເກືອບເຖິງ 50 ລ້ານໂດລາສະຫະລັດ.
ທີ່ມາ: 