ວັນທີ 6 ພຶດສະພາ 2016, ສປປ ລາວ ໃນນາມປະທານອາຊຽນໄດ້ເປັນເຈົ້າພາບ ແລະປະທານກອງປະຊຸມເຈົ້າໜ້າທີ່ອາວຸໂສອາຊຽນ ທີ່ໂຮງແຮມຫຼວງພະບາງວິວ, ແຂວງຫຼວງພະບາງ ພາຍໃຕ້ການເປັນປະທານຂອງ ທ່ານ ອາລຸນແກ້ວ ກິດຕິຄຸນ, ລັດຖະມົນຕີ ປະຈຳສຳນັກງານນາຍົກລັດຖະມົນຕີ, ທັງເປັນຫົວໜ້າເຈົ້າໜ້າທີ່ອາວຸໂສອາຊຽນຂອງລາວ ແລະມີຄະນະຜູ້ແທນຈາກ 10 ປະເທດສະມາຊິກອາຊຽນ ແລະ ຜູ້ຕາງໜ້າຈາກກອງເລຂາອາຊຽນເຂົ້າຮ່ວມ.
ກອງປະຊຸມຄັ້ງນີ້ ໄດ້ສືບຕໍ່ປຶກສາຫາລືກ່ຽວກັບການຈັດຕັ້ງປະຕິບັດວິໄສທັດປະຊາຄົມອາຊຽນ 2025 ໂດຍສະເພາະແຜນແມ່ບົດສຳລັບເສົາຄໍ້າປະຊາຄົມການເມືອງ-ຄວາມໝັ້ນຄົງອາຊຽນ 2025 ທີ່ບັນດາຜູ້ນຳອາຊຽນໄດ້ຮັບຮອງເອົາໃນກອງປະຊຸມສຸດຍອດອາຊຽນຄັ້ງທີ 27 ໃນເດືອນພະຈິກ 2015 ທີ່ ຜ່ານມາ ໃຫ້ມີປະສິດທິຜົນນອກນັ້ນ, ກອງປະຊຸມຍັງໄດ້ປຶກສາຫາລືກ່ຽວກັບການຈັດຕັ້ງປະຕິບັດບັນດາຂໍ້ສະເໜີແນະຂອງໜ່ວຍງານສະເພາະກິດລະດັບສູງ ເພື່ອສົ່ງເສີມຄວາມເຂັ້ມແຂງກອງເລຂາອາຊຽນ ແລະ ທົບທວນອົງກອນຕ່າງໆຂອງອາຊຽນ, ການສະໝັກເຂົ້າເປັນພາຄີສົນທິສັນຍາໄມຕີຈິດ ແລະການຮ່ວມມືຢູ່ອາຊີຕາເວັນອອກ, ການຂະຫຍາຍການຮ່ວມມືກັບພາຍນອກ, ບັນຫາການທົບທວນກົດບັດອາຊຽນ, ຄວາມເປັນແກນກາງຂອງອາຊຽນ ແລະ ບັນຫາອື່ນໆທີ່ກ່ຽວຂ້ອງກັບປະຊາຄົມອາຊຽນ.
ສຳລັບການຮ່ວມມືກັບພາຍນອກ, ກອງປະຊຸມໄດ້ປຶກສາຫາລືກ່ຽວກັບການກະກຽມໃຫ້ແກ່ກອງປະຊຸມສຸດຍອດສະເຫຼີມສະຫຼອງການຮ່ວມມືອາຊຽນ-ລັດເຊຍຄົບຮອບ 20 ທີ່ຈະຈັດຂຶ້ນໃນວັນທີ 19-20 ພຶດສະພາ 2016 ຢູ່ໂຊຈີ, ລັດເຊຍ, ກອງປະຊຸມສຸດຍອດສະເຫຼີມສະຫຼອງການຮ່ວມມືອາຊຽນ-ຈີນ ຄົບຮອບ 25 ປີ, ກອງປະຊຸມສຸດຍອດອາຊຽນກັບຄູ່ເຈລະຈາໃນຂອບບວກໜຶ່ງ, ບວກສາມ ແລະ ກອງປະຊຸມສຸດຍອດອາຊີຕາເວັນອອກທີ່ຈະຈັດຂຶ້ນໃນເດືອນກັນຍາ 2016 ຢູ່ ສປປ ລາວ.
ນອກຈາກນີ້, ກອງປະຊຸມຍັງໄດ້ປຶກສາຫາລືກ່ຽວກັບການກະກຽມ ສຳລັບກອງປະຊຸມລັດຖະມົນຕີຕ່າງປະເທດຄັ້ງທີ 49, ບັນດາກອງປະຊຸມລັດຖະມົນຕີຕ່າງປະເທດອາຊຽນ+1 ກັບຄູ່ເຈລະຈາອາຊຽນ, ກອງປະຊຸມລັດຖະມົນຕີຕ່າງປະເທດອາຊຽນ+3 ຄັ້ງທີ 17, ກອງປະຊຸມລັດຖະມົນຕີຕ່າງປະເທດຂອງກອງປະຊຸມສຸດຍອດອາຊີຕາເວັນອອກ ຄັ້ງທີ 6 ແລະກອງປະຊຸມເວທີພາກພື້ນອາຊຽນ ຄັ້ງທີ 23 ທີ່ ສປປ ລາວ ຈະເປັນປະທານ ແລະ ເປັນປະທານຮ່ວມ ຊຶ່ງຈະຈັດຂຶ້ນ ໃນວັນທີ 21-26 ກໍລະກົດ 2016 ທີ່ ນະຄອນຫຼວງວຽງຈັນ.
ໃນວັນດຽວກັນ, ກໍ່ໄດ້ມີກອງປະຊຸມເຈົ້າໜ້າທີ່ອາວຸໂສ ສຳລັບການຮ່ວມມືໃນຂອບແມ່ນໍ້າຂອງ-ຄົງຄາ ຊຶ່ງເປັນກອງປະຊຸມຮ່ວມມືລະຫວ່າງ 5 ປະເທດລຸ່ມແມ່ນໍ້າຂອງ (ກຳປູເຈຍ, ສປປ ລາວ, ມຽນມາ, ໄທ, ຫວຽດນາມ ແລະອິນເດຍ) ເພື່ອຮັດແໜ້ນການຮ່ວມມືກັນໃນບັນດາຂົງເຂດການຮ່ວມມືໄດ້ແກ່ການທ່ອງທ່ຽວ, ວັດທະນະທຳ, ການສຶກສາ ແລະ ຂົນສົ່ງ.
ທີ່ມາ: 