ສຳນັກຂ່າວຕ່າງປະເທດ ລາຍງານໃນວັນທີ 5 ພຶດສະພານີ້ວ່າ ເຫດການໄຟໄໝ້ປ່າຮຸນແຮງ ຢູ່ເຂດເມືອງຟອດແມັກເມີເຣ ລັດແອນເບີຕາ ປະເທດການາດາ ແມ່ນຍັງຄົງສືບຕໍ່ແຜ່ລາມ ເຮັດໃຫ້ທາງການ ຕ້ອງໄດ້ອົບພະຍົບປະຊາຊົນອອກໝົດເມືອງ ເພື່ອໜີອອກຈາກອັນຕະລາຍ, ຫລ້າສຸດທາງການການາດາ ໄດ້ປະກາດພາວະສຸກເສີນ ຢູ່ລັດແອນເບີຕາແລ້ວ ເພື່ອລະດົມທຸກກຳລັງເຂົ້າແກ້ໄຂສະຖານະການ.
ດ້ານເຈົ້າໜ້າທີ່ຂອງລັດແອນເບີຕາ ໄດ້ອອກມາເຕືອນວ່າ ໄຟໄມ້ປ່າທີ່ເລີ່ມມາແຕ່ວັນທີ 1 ພຶດສະພາຜ່ານມານີ້ ກຳລັງລຸກລາມເຜົາຜານທຸກສິ່ງຢ່າງທີ່ຂວາງໜ້າ ໃນເຂດເມືອງຟອດແມັກເມີເຣ ແລະ ສາມາດທຳລາຍເມືອງດັ່ງກ່າວ ຈົນເສຍຫາຍໜັກໜ່ວງເຖິງຂັ້ນວິກິດການ.
