ເມືອງຫົວເມືອງ ມີເນື້ອທີ່ທັງໝົດ 228.561 ເຮັກຕາ, ກວມເອົາ 13,13% ເນື້ອທີ່ຂອງແຂວງ ແລະ ເປັນເມືອງໜຶ່ງນອນຢູ່ໃນ 47 ເມືອງ ທຸກຍາກໃນທົ່ວປະເທດ. ເມືອງຫົວເມືອງ ຕັ້ງຢູ່ຫ່າງຈາກ ເທສະບານ ແຂວງຫົວພັນ ປະມານ 60 ກິໂລແມັດ ໄປທາງທິດຕາເວັນຕົກສ່ຽງໃຕ້, ປະກອບ 10 ກຸ່ມບ້ານ. ມີ 75 ບ້ານ, ມີພົນລະເມືອງທັງໝົດ 32.045 ຄົນ, ມີຄອບຄົວທັງໝົດ 4.815 ຄອບຄົວ, ມີ 2.417 ຄອບຄົວທຸກຍາກເທົ່າ 50,20% ລວມມີ 5 ເຜົ່າຄື: ເຜົ່າລາວລຸ່ມກວມ 15,30%, ເຜົ່າໄທແດງ ກວມເອົາ 1,27%, ເຜົ່າກຶມມຸ 26,12%, ເຜົ່າມົ້ງກວມ 21% ແລະ ເຜົ່າຟ້ອງ ກວມ 36%; ໃນນັ້ນມີບ້ານທີ່ທຸກຍາກ 55 ບ້ານ ເທົ່າກັບ 75%, ບ້ານຫລຸດພົ້ນຈາກຄວາມທຸກຍາກ ມີ 19 ບ້ານ; ເທົ່າກັບ 25%, ບ້ານ ທີ່ມີເສັ້ນທາງແລ່ນໄດ້ 2 ລະດູມີ 31 ບ້ານ ແລະ ບ້ານທີ່ມີເສັ້ນທາງ ແລ່ນໄດ້ລະດູດຽວມີ 45 ບ້ານ, ມີ ເສັ້ນທາງລົດຕ໋ອກໆ ແລະ ລົດຈັກ ເຂົ້າເຖິງໄດ້ມີ 76 ບ້ານ.
ທ່ານ ແສງທອງ ວົງຄໍາເປີນ ຮອງຫົວໜ້າຫ້ອງການ ພັດທະນາຊົນນະບົດ ເມືອງຫົວເມືອງ ໃຫ້ສໍາພາດຕໍ່ນັກຂ່າວພວກເຮົາວ່າ: ກອງທຶນຫລຸດຜ່ອນຄວາມທຸກຍາກ (ທລຍ) ໄດ້ເຂົ້າມາ ຈັດຕັ້ງປະຕິບັດວຽກຢູ່ 9 ກຸ່ມບ້ານຄື: ກຸ່ມບ້ານຄັງຄາວ, ກຸ່ມບ້ານເມືອງອໍ້, ກຸ່ມບ້ານສົບເລົ້າ, ກຸ່ມບ້ານລານຊຽງ, ກຸ່ມບ້ານສົງຄາວ, ກຸ່ມບ້ານເມືອງບໍ່, ກຸ່ມບ້ານເມືອງແຟນ, ກຸ່ມນາແລ້ງ ແລະ ກຸ່ມບ້ານໂພນໄຊ; ລວມທັງໝົດມີ 66 ບ້ານ. ສະພາບທີ່ພົ້ນເດັ່ນ ຢູ່ເມືອງຫົວເມືອງຂອງພວກເຮົາ ຖ້າທຽບໃສ່ເມື່ອກ່ອນບໍ່ທັນ ໄດ້ຮັບການສະໜັບສະໜູນ ການຊ່ວຍເຫລືອຈາກ ໂຄງການ ທລຍ ຊີວິດການເປັນຢູ່ ຂອງປະຊາຊົນພົບ ຄວາມຫຍຸ້ງຍາກຫລາຍດ້ານ, ມາເຖິງປັດຈຸບັນໄດ້ເຮັດໃຫ້ ຊີວິດການເປັນຢູ່ ຂອງປະຊາຊົນ ດີຂຶ້ນເທື່ອລະກ້າວ ມັນສະແດງອອກ ໃນການພັດທະນາ ພື້ນຖານໂຄງລ່າງ ທາງດ້ານເສັ້ນທາງຄົມມະນາຄົມ ການໄປມາຫາສູ່ສະດວກ, ສາທາລະນະສຸກ, ສຶກສາ ແລະ ກະສິກໍາ, ເສດຖະກິດ ມີການຂະຫຍາຍຕົວຕໍ່ເນື່ອງ.
ນັບແຕ່ປີ 2004 -2011 ຮອບ ວຽນທີ 2 ເຖິງຮອບວຽນທີ 8 ເມືອງຫົວເມືອງ ໄດ້ຮັບທຶນຊ່ວຍເຫລືອຈາກ ທລຍ ມີທັງໝົດ 155 ໂຄງການ, ປະກອບມີຂະແໜງສຶກສາທິການ ແລະ ກິລາ 42 ໂຄງການ, ຂະແໜງສາທາລະນະສຸກ 39 ໂຄງການ, ຂະແໜງໂຍທາທິການ ແລະ ພະລັງງານ, ການຄ້າ 40 ໂຄງການ, ຂະແໜງກະສິກໍາ 6 ໂຄງການ, ສ້າງຄວາມເຂັ້ມແຂງ, ກິດຈະກໍາ ສ້າງລາຍຮັບ 28 ໂຄງ ການ. ມີທຶນທັງໝົດ 15,052 ຕື້ ກີບ, ທຶນຊຸມຊົນປະກອນບສ່ວນມີ 3,58 ຕື້ກີບ.
ສົກປີ 2011-2012 ຮອບວຽນ ທີ 9 ມີ 13 ໂຄງການ, ທຶນຂອງ ທລຍ 3,16 ຕື້ກີບ, ທຶນຊຸມຊົນສົມທົບ 158 ລ້ານກີບ; ສົກ 2012 -2013 ຮອບວຽນທີ 10 ມີ 16 ໂຄງການ ທຶນ ທລຍ 2,42 ຕື້ກີບທຶນຊຸມຊົນ 160 ລ້ານກີບ; ສົກປີ 2013-2014 ຮອບວຽນທີ 11 ມີ 9 ໂຄງ ການ, ທຶນ ທລຍ 2,77 ຕື້ກີບ, ທຶນ ຊຸມຊົນ 128 ລ້ານກີບ; ສົກ 2014-2015 ຮອບວຽນທີ 12 ມີ 13 ໂຄງ ການທຶນ ທລຍ 2,77 ຕື້ກີບ ແລະ ທຶນຊຸມຊົນ 127 ລ້ານກີບ ແລະ ສົກປີ 2015 -2016 ມີທັງ ໝົດ 11 ໂຄງການ, ມີທຶນທລຍ 2,48 ຕື້ກີບ ແລະ ທຶນຊຸມຊົນ 152 ລ້ານກີບ.
ທ່ານ ແສງທອງ ວົງຄໍາເປິນ ຍັງໃຫ້ຮູ້ຕື່ມວ່າ: ປັດຈຸບັນ ທລຍ ສືບຕໍ່ຮອບວຽນທີ 13 ທີ່ພວມປະຕິບັດ ໂຄງການໂພສະນາການ ແລະ ໂຄງສ້າງພື້ນຖານໂຄງລ່າງ ທີ່ປະຕິບັດຢູ່ມີ ການກໍ່ສ້າງ ໂຮງຮຽນປະຖົມ 3 ແຫ່ງ ແລະ ກໍ່ສ້າງຂົວນໍ້າລົ້ນ 2 ແຫ່ງ. ໂຄງການໂພສະນາການ ແມ່ນລົງໄປຊຸກຍູ້ ຈັດຕັ້ງກຸ່ມທ້ອນເງິນ ຢູ່ພາຍໃນ 8 ກຸ່ມບ້ານ ແລະ ໄປແນະນໍາໃຫ້ແມ່ຍິງຖືພາ ແລະ ເດັກນ້ອຍໄດ້ກິນ ອາຫານພຽງພໍຄົບ 5 ໝູ່ ເພື່ອຫລຸດຜ່ອນ ອັດຕາເດັກນ້ອຍ ຂາດສານອາຫານ. ຍ້ອນ ທລຍ ເຂົ້າໄປຊ່ວຍເຫລືອກໍ່ສ້າງໂຮງຮຽນ, ນໍ້າລິນ, ຊົນລະປະທານສາມາດ ເຮັດນາໄດ້, ປະຊາຊົນມີຄວາມກະຕືລືລົ້ນ ຢາກສ້າງຢາກສາພັດທະນາ ຕົນເອງ, ຍ້ອນວ່າໂຮງຮຽນມີນໍ້າລິນ ແລະ ຊົນລະປະທານຢູ່ໃກ້ ເປັນການເອື້ອອໍານວຍ ໃຫ້ແກ່ປະຊາຊົນໄດ້ຊົມໃຊ້ ແລະ ເຂົ້າເຖິງຄວາມສະດວກສະບາຍ ຍູ່ທ່າງທໍາມາຫາກິນ ທັງເປັນການປະກອບສ່ວນ ໃຫ້ປະຊາຊົນຫລຸດພົ້ນ ຈາກຄວາມທຸກຍາກຫລ້າຫລັງອີກດ້ວຍ.
ແຫລ່ງຂ່າວ:
ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!