ອາ​ຊຽນ​ຮ່ວມ​ຫາ­ລື​ບັນ­ດາ​ໜ້າ​ວຽກຂອງ​ຄະ­ນະ​ກຳ­ມະ­ການຜູ້­ຕາງ­ໜ້າ​ຖາ­ວອນ

0
262

ກອງ​ປະ­ຊຸມ​ຄະ­ນະ​ກຳ­ມະ­ການ​ຜູ້ຕາງ­ໜ້າ​ຖາ­ວອນ​ປະ­ຈຳ​ອາ​ຊຽນຄັ້ງ​ທີ 7 (7/2016 CPR Meeting) ໄດ້​ຈັດຂຶ້ນ​ໃນ​ວັນ​ທີ 5 ພຶດ­ສະ­ພາ 2016 ທີ່​ໂຮງແຮມ​ຫຼວງ​ພະ​ບາງ​ວິວ ແຂວງ​ຫຼວງ​ພະບາງພາຍ​ໃຕ້​ການ​ເປັນ​ປະ­ທານ​ຂອງທ່ານ ລັດ­ສະ­ໝີ ແກ້ວ​ມະ­ນີ ເອກ​ອັກ​ຄະ​ລັດຖະ​ທູດ, ຜູ້­ຕາງ­ໜ້າ​ຖາ­ວອນ​ແຫ່ງ ສປປ ລາວ ປະ­ຈຳ​ອາ​ຊຽນໂດຍ​ມີ​ການ​ເຂົ້າຮ່ວມ​ຂອງ​ບັນ­ດາ​ເອກ​ອັກ​ຄະ​ລັດ​ຖະ​ທູດ, ຜູ້­ຕາງ­ໜ້າ​ຖາ­ວອນ​ປະ­ເທດ​ສະ­ມາ­ຊິກ​ອາຊຽນ, ຮອງ​ເລ­ຂາ­ທິ­ການ​ໃຫຍ່​ອາ​ຊຽນ​ຮັບ​ຜິດຊອບ​ວຽກ​ເສົາ­ຄ້ຳ​ການ­ເມືອງ-ຄວາມໝັ້ນ­ຄົງ, ພະ­ນັກ­ງານ​ການ​ທູດ​ຈາກ​ບັນ­ດາປະ­ເທດ​ສະ­ມາ­ຊິກ ແລະ​ພະ­ນັກ­ງານ​ວິ­ຊາການ​ທີ່​ກ່ຽວ­ຂ້ອງ​ເຂົ້າ​ຮ່ວມ​ຢ່າງ​ພ້ອມ­ພຽງ.

ຈຸດ­ປະ­ສົງ​ຫຼັກ​ຂອງ​ກອງ​ປະ­ຊຸມ​ຄັ້ງທີ 7 ປະ­ຈຳ​ປີ 2016 ນີ້​ແມ່ນ​ເລັງ​ໃສ່​ສືບຕໍ່​ປຶກ­ສາ​ຫາ­ລື​ບັນ­ດາ​ໜ້າ​ວຽກ​ປົກ­ກະ­ຕິ ຂອງ​ຄະ­ນະ​ກຳ­ມະ­ການ​ຜູ້­ຕາງ­ໜ້າ​ຖາວອນ ແລະ​ກະ­ກຽມ​ເນື້ອ​ໃນ​ໃຫ້​ແກ່​ບັນ­ດາກອງ​ປະ­ຊຸມ​ລະ­ດັບ​ເຈົ້າ​ໜ້າ­ທີ່​ອາ­ວຸ­ໂສ​ອາຊຽນ (ASEAN SOM), ກອງ​ປະ­ຊຸມເຈົ້າ​ໜ້າ­ທີ່​ອາ­ວຸ­ໂສ​ອາ​ຊຽນ​ບວກ​ສາມ (APTSOM), ກອງ​ປະ­ຊຸມ​ລະ­ດັບ​ເຈົ້າໜ້າ​ທີ​ອາ­ວຸ­ໂສ​ກອງ​ປະ­ຊຸມ​ສຸດ​ຍອດ​ອາຊີ​ຕາ­ເວັນ​ອອກ (EASSOM) ແລະ ກອງ​ປະ­ຊຸມ​ລະ­ດັບ​ເຈົ້າ​ໜ້າ­ທີ່​ອາ­ວຸ­ໂສ​ເວ­ທີ ປຶກ­ສາ​ຫາ­ລື​ພາກ​ພື້ນ​ອາ​ຊຽນ (ARF SOM) ຊຶ່ງ​ຈະ​ມີ​ຂຶ້ນ​ໃນ​ລະ­ຫວ່າງ​ວັນ​ທີ 6-8 ພຶດ­ສະ­ພາ 2016 ທີ່ ເມືອງ​ຫຼວງພະ​ບາງ.

ນອກ­ຈາກ​ນີ້ພາຍ­ຫຼັງ​ສຳ­ເລັດ​ກອງປະ­ຊຸມ​ຂອງ​ຕົນ, ຄະ­ນະ​ກຳ­ມະ­ການ​ຜູ້ຕາງ­ໜ້າ​ຖາ­ວອນ​ຈະ​ໄດ້​ສືບ­ຕໍ່​ຈັດ​ກອງປະ­ຊຸມ​ເຈລະ­ຈາ​ກັບ​ຣັດ​ເຊຍຊຶ່ງ​ໄດ້​ສຸມ​ໃສ່ການ​ຮ່າງ 2 ເອ­ກະ­ສານ​ສຳ­ຄັນ​ທີ່​ຈະ​ຮັບຮອງ​ເອົາ​ຢູ່​ໃນ​ກອງ​ປະ­ຊຸມ​ສຸດ​ຍອດ​ສະ ເຫຼີມ​ສະ­ຫຼອງ​ການ​ພົວ­ພັນ​ຮ່ວມ​ມື​ອາຊຽນ-ຣັດ​ເຊຍຄົບ­ຮອບ 20 ປີ​ທີ່​ຈະ​ຈັດຂຶ້ນ​ໃນ​ວັນ​ທີ 19-20 ພຶດ­ສະ­ພາ​ທີ່​ໂຊ​ຈິ,ຣັດ​ເຊຍ​ຄື: (1) ຮ່າງ​ຖະ­ແຫຼງ­ການໂຊ​ຈິວ່າ​ດ້ວຍ​ການ​ສະ­ເຫຼີມ­ສະ­ຫຼອງ​ການ​ພົວພັນ​ອາ​ຊຽນ-ຣັດ​ເຊຍຄົບ­ຮອບ 20 ປີ ແລະ (2) ແຜນ​ປະ­ຕິ­ບັດ​ງານ​ອາ​ຊຽນ-ຣັດ​ເຊຍສະ­ບັບ​ໃໝ່​ສຳ­ລັບ​ໄລ­ຍະ​ປີ 2016-2020.

ກອງ​ປະ­ຊຸມ​ຄະ­ນະ​ກຳ­ມະ­ການ​ຜູ້​ຕາງໜ້າ​ຖາ­ວອນ​ປະ­ຈຳ​ອາ​ຊຽນ​ຈັດ​ຂຶ້ນ​ສອງຄັ້ງ​ຕໍ່​ເດືອນແລະ​ຄັ້ງ​ຕໍ່​ໄປ(8/2016)ຈະ​ຈັດ​ຂຶ້ນ​ໃນ​ວັນ​ທີ 26 ພຶດ­ສະ­ພາ 2016 ທີ່​ຈາ​ກາກ​ຕາປະ­ເທດ​ອິນ​ໂດ​ເນ​ເຊຍ.

ທີ່ມາ: logo