ລັດຖະບານລາວຍີ່ປຸ່ນໄດ້ຮ່ວມກັນລົງນາມເອກະສານແລກປ່ຽນຈຳນວນ 2 ໂຄງການຄື: ໂຄງການພັດທະນາປັບປຸງຂົວເສັ້ນທາງຫຼວງແຫ່ງຊາດເລກທີ 9 ແລະໂຄງການພັດທະນາຊັບພະຍາກອນມະນຸດ, ຊຶ່ງທັງສອງໂຄງການຈະປະກອບສ່ວນສຳຄັນໃນການພັດທະນາເສດຖະກິດສັງຄົມຂອງລາວ.
ເມື່ອວັນທີ 4 ພຶດສະພາ 2016 ຢູ່ກະຊວງການຕ່າງປະເທດ ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການ ຕ່າງປະເທດໄດ້ໃຫ້ກຽດຕ້ອນຮັບການເດີນທາງມາຢ້ຽມຢາມ ສປປ ລາວ ຢ່າງເປັນທາງການຂອງ ທ່ານ ຟູມິໂອະ ກິຊິດະ ລັດຖະມົນຕີກະຊວງການຕ່າງປະເທດຍີ່ປຸ່ນໂດຍມີບັນດາການນຳຂັ້ນສູງຂອງສອງກະຊວງເຂົ້າຮ່ວມຢ່າງພ້ອມພຽງ.
ການຢ້ຽມຢາມຄັ້ງນີ້ ທັງສອງຝ່າຍໄດ້ມີການພົບປະແລກປ່ຽນຄຳຄິດເຫັນ ແລະປຶກສາຫາລືກັນຫຼາຍຂົງເຂດການຮ່ວມມືຂອງສອງປະເທດ ແລະການແລກປ່ຽນຄຳຄິດເຫັນຕໍ່ສະພາບການພາກພື້ນ ແລະສາກົນທີ່ສອງຝ່າຍມີຄວາມສົນໃຈໄດ້ສະຫຼຸບຕີລາຄາຄືນກ່ຽວກັບການຮ່ວມມືໃນໄລຍະຜ່ານມາພ້ອມທັງກຳນົດທິດທາງ ແລະແຜນນະໂຍບາຍໃນການຮ່ວມມືຕໍ່ໜ້າເພື່ອເພີ່ມທະວີສາຍພົວພັນມິດຕະພາບພາຍໃຕ້ການເປັນຄູ່ຮ່ວມມືຍຸດທະສາດໃຫ້ຂະຫຍາຍອອກໄປສູ່ລວງເລິກ, ຊຶ່ງຈະນຳເອົາຜົນປະໂຫຍດສູງສຸດມາສູ່ປະຊາຊົນທັງສອງຝ່າຍກໍຄື: ລາວຍີ່ປຸ່ນສອງຝ່າຍໄດ້ຕີລາຄາສູງຕໍ່ຜົນສຳເລັດອັນຈົບງາມ, ໃນການສະເຫຼີມສະຫຼອງວັນສ້າງຕັ້ງສາຍພົວພັນການທູດລາວຍີ່ປຸ່ນຄົບຮອບ 60 ປີ ໃນປີ 2015 ທີ່ຜ່ານມາ.
ນອກນີ້ລັດຖະບານລາວໄດ້ຕາງໜ້າໃຫ້ແກ່ປະຊາຊົນລາວບັນດາເຜົ່າກໍໄດ້ສະແດງຄວາມເສຍໃຈໄປຍັງລັດຖະ ບານ ແລະປະຊາຊົນຍີ່ປຸ່ນຕໍ່ເຫດການແຜ່ນດິນໄຫວຢູ່ທາງພາກຕາເວັນຕົກສ່ຽງໃຕ້ຂອງຍີ່ປຸ່ນ, ຊຶ່ງໄດ້ສ້າງຄວາມເສຍຫາຍອັນໜັກໜ່ວງໃຫ້ແກ່ຊີວິດ, ຊັບສິນ ແລະພື້ນຖານໂຄງລ່າງໃນບໍລິເວນດັ່ງກ່າວ.
ຄຽງຄູ່ກັນນັ້ນທັງສອງຝ່າຍໄດ້ຮ່ວມກັນລົງນາມເອກະສານແລກປ່ຽນຈຳນວນ 2 ໂຄງການຄື: ໂຄງການພັດທະນາປັບປຸງຂົວເສັ້ນທາງຫຼວງແຫ່ງຊາດ ເລກທີ 9 ແລະໂຄງການພັດທະນາຊັບພະຍາກອນມະນຸດ, ຊຶ່ງໂຄງການດັ່ງກ່າວຈະປະກອບສ່ວນສຳຄັນໃນການພັດທະນາເສດຖະກິດສັງຄົມຂອງສປປລາວ.
ພ້ອມນີ້ສອງຝ່າຍຍັງໄດ້ຕີລາຄາສູງຕໍ່ການເພີ່ມຂຶ້ນຂອງນັກລົງທຶນຍີ່ປຸ່ນຢູ່ ສປປ ລາວ, ຊຶ່ງໄດ້ເຮັດໃຫ້ປະຊາຊົນລາວມີວຽກເຮັດງານທຳ ແລະ ສ້າງລາຍໄດ້ໃຫ້ແກ່ປະຊາຊົນທ້ອງຖິ່ນ, ສອງຝ່າຍມີຄວາມຍິນດີທີ່ຈະສືບຕໍ່ປຶກສາຫາລື ແລະຊຸກຍູ້ການຮ່ວມມືດ້ານເສດຖະກິດ, ການຄ້າ, ການລົງທຶນ, ການສຶກສາ ແລະວັດທະນະທຳລາວລວມເຖິງບັນດາໂຄງການຕ່າງໆທີ່ຢູ່ພາຍໃຕ້ການຮ່ວມມື.
ໃນການພົບປະຝ່າຍຍີ່ປຸ່ນໄດ້ຢືນຢັນຕໍ່ການຊ່ວຍເຫຼືອທາງການເພື່ອການພັດທະນາ (ODA) ແລະເຫັນດີພິຈາລະນາຕື່ມກ່ຽວກັບໂຄງການທີ່ ສປປ ລາວ ໄດ້ ສະເໜີໃນສົກປີ 2015 ນີ້.
ແນວໃດກໍດີ ຍີ່ປຸ່ນຍິນດີໃຫ້ການຊ່ວຍເຫຼືອແກ່ລາວໃນການເປັນປະທານອາຊຽນໃນປີ 2016 ໂດຍສະເພາະໂຄງ ການຂະຫຍາຍສະໜາມບິນສາກົນວັດໄຕ, ຊຶ່ງຈະໃຫ້ສຳເລັດກ່ອນກອງປະຊຸມສຸດຍອດອາຊຽນໃນເດືອນກັນຍາທີ່ຈະມາເຖິງນີ້.
