ຄະນະກຳມາທິການເອີຣົບຈະຍອມໃຫ້ຊາວຕວັກກີເດີນທາງເຂົ້າເຂດເຊງເກນໃນສະຫະພາບເອີຣົບ (ອີຢູ) ໂດຍບໍ່ຕ້ອງກວດລົງກາໜັງສືເດີນທາງ (ວີຊາ) ແຕ່ມີເງື່ອນໄຂເພື່ອໃຫ້ຂໍ້ຕົກລົງແກ້ໄຂວິກິດຜູ້ອົບພະຍົບກັບຕວັກກີຍັງມີຜົນຕໍ່ໄປ.

ແຫລ່ງຂ່າວຄາດວ່າ ຄະນະກຳມາທິການເອີຣົບຈະປະກາດວ່າ ຕວັກກີປະຕິບັດເງື່ອນໄຂການເດີນທາງໂດຍບໍ່ຕ້ອງຂໍວີຊາໄດ້ພຽງ 64 ຂໍ້ຈາກທັງໝົດ 72 ຂໍ້ ຈິ່ງຍັງບໍ່ສາມາດເຮັດຕາມທີ່ຕວັກກີຮຽກຮ້ອງໄດ້ ຈົນກວ່າຕວກກີຈະປະຕິບັດຕາມເງື່ອນໄຂໄດ້ຄົບໝົດພາຍໃນສິ້ນເດືອນມິຖຸນາ ດ້ານຕວກກີກຳລັງຫາທາງຜ່ານຮ່າງກົດໝາຍເພື່ອໃຫ້ສາມາດປະຕິບັດຕາມເງື່ອນໄຂທັງໝົດຂອງອີຢູ ແຕ່ຍັງຖືກຂັດຂວາງໃນສະພາເຊັ່ນ ການເຮັດຂໍ້ຕົກລົງວີຊາແບບຕ່າງຕອບແທນກັບພົນລະເມືອງອີຢູ ຊຶ່ງລວມເຖິງໄຊປຣັສ ສະມາຊິກອີຢູທີ່ມີຂໍ້ພິພາດກັບຕວັກກີມາດົນຈາກການທີ່ຕວັກກີຢຶດພື້ນທີ່ທາງເໝືອຂອງເກາະໄຊປຣັສ.

ຕວັກກີຂູ່ຈະຈີກຂໍ້ຕົກລົງເດືອນມີນາເລື່ອງຮັບກັບຜູ້ອົບພະຍົບທີ່ຂ້າມທະເລອີຈຽນໄປເກຣກ ຫາກອີຢູບໍ່ຮັກສາສັນຍາເລື່ອງຈະອະນຸຍາດໃຫ້ຊາວຕວັກກີກວ່າ 80 ລ້ານຄົນເດີນທາງເຂົ້າເຂດເຊງເກນໄດ້ໂດຍບໍ່ຕ້ອງໃຊ້ວີຊາພາຍໃນເດືອນໜ້າ ແຕ່ສະມາຊິກອີຢູຫຼາຍປະເທດເປັນຫ່ວງເລື່ອງຄວາມຖືກຕ້ອງຕາມກົດໝາຍຂອງຂໍ້ຕົກລົງດັ່ງກ່າວ ແລະ ສະຖານະການສິດທິມະນຸດໃນຕວກກີ, ຂະນະທີ່ການໃຫ້ຊາວຕວັກກີອາໄສຢູ່ 90 ວັນ ໂດຍບໍ່ຕ້ອງຂໍວີຊາຕາມທີ່ຕວັກກີຕ້ອງການ ຈະຕ້ອງໄດ້ຮັບຄວາມເຫັນດີຈາກສະພາເອີຣົບ ແລະ ສະມາຊິກອີຢູທັງ 28 ຊາດ ຊຶ່ງບໍ່ໄດ້ເປັນສະມາຊິກເຂດເຊງເກນໝົດທຸກປະເພດ.