ກອງປະຊຸມໜ່ວຍງານຂະແໜງການຄ້າ ແລະ ພາກທຸລະກິດ ຄັ້ງທີ 5 ໄດ້ຈັດຂຶ້ນໃນວັນທີ 14 ພຶດສະພານີ້ ຢູ່ໂຮງແຮມລາວພລາຊາ ນະຄອນຫລວງວຽງຈັນ ເພື່ອທົບທວນບັນດາຂະບວນການຈັດຕັ້ງປະຕິບັດວິໄຈການເຊື່ອມໂຍງເຂົ້າກັບສາກົນດ້ານການຄ້າ, ຄວາມຄືບໜ້າຂອງແຜນງານ ເພື່ອພັດທະນາດ້ານການພັດທະ ນາຂະແໜງການຄ້າ ແລະ ພາກທຸລະກິດ ທັງປຶກ ສາຫາລືກ່ຽວກັບຄວາມພ້ອມຂອງ ສປປ ລາວ ໃນການເຂົ້າສູ່ປະຊາຄົມເສດຖະກິດອາຊຽນ (AEC) ໂດຍການເປັນປະທານຂອງທ່ານນາງ ເຂັມມະນີ ພົນເສນາ ລັດ ຖະມົນຕີວ່າການກະຊວງອຸດ ສາຫະກຳ ແລະ ການຄ້າ, ທ່ານ ມີແຊນ ໂກແຟງ ອຸປະທູດສຳນັກ ງານຜູ້ຕາງໜ້າສະຫະພາບເອີ ຣົບປະຈຳລາວ ແລະ ຕົວແທນຈາກພາກສ່ວນກ່ຽວຂ້ອງເຂົ້າ ຮ່ວມກວ່າ 100 ທ່ານ.
ທ່ານລັດຖະມົນຕີວ່າການກະຊວງອຸດສາຫະກຳ ແລະ ການຄ້າ ກ່າວວ່າ: ສະພາບທີ່ເອື້ອອຳນວຍທາງດ້ານການຄ້າ ແລະ ການລົງທຶນທັງພາຍໃນ ແລະ ຕ່າງປະເທດໄດ້ສ້າງຂຶ້ນເພື່ອການເຊື່ອມໂຍງທາງດ້ານການຄ້າພາກພື້ນ ແລະ ສາກົນ ເຊິ່ງລວມມີນະໂຍບາຍການຄ້າໃນການຈັດຕັ້ງປະຕິບັດພັນທະປະຊາຄົມເສດຖະກິດອາຊຽນ ແລະ ພັນທະ ພາຍຫລັງເຂົ້າເປັນສະມາຊິກອົງການການຄ້າໂລກ; ສະພາບແວດລ້ອມທາງດ້ານທຸລະກິດໄດ້ຮັບການປັບປຸງ ສ້າງໂອກາດທີ່ເທົ່າທຽມກັນສຳລັບບັນດາທຸລະກິດ ແລະ ການປັບ ປຸງວຽກປົກປ້ອງຜູ້ຊົມໃຊ້; ການອຳນວຍຄວາມສະດວກດ້ານການຄ້າໃຫ້ມີລະບົບທີ່ງ່າຍດາຍຂຶ້ນ ແລະ ມີຄວາມປອດໃສ, ຂັ້ນ ຕອນການນຳເຂົ້າ-ສົ່ງອອກ ມີ ຄ່າໃຊ້ຈ່າຍທີ່ຖືກລົງ, ຂັ້ນຕອນ ແລະ ລະບົບຜ່ານແດນຕ່າງໆໄດ້ຮັບການພັດທະນາ ແລະ ຈັດຕັ້ງ ປະຕິບັດໂດຍການຮ່ວມມືຂອງພາກເອກະຊົນ. ຄວາມໄດ້ປຽບໃນການແຂ່ງຂັນ ແລະ ຄຸນນະພາບ ຂອງທຸລະກິດກະສິກຳ, ອຸດສາ ຫະກຳປຸງແຕ່ງ, ການບໍລິການກໍໄດ້ຮັບການປັບປຸງໃຫ້ດີຂຶ້ນ ໂດຍສະເພາະຄວາມສາມາດໃນການແຂ່ງຂັນລະດັບບໍລິສັດ, ການຊ່ວຍເຫລືອສະເພາະຂະແໜງການ ແລະ ການດັດສົມຂະແໜງຊັບພະຍາກອນທຳມະຊາດ, ສ່ວນວຽກງານການຄຸ້ມຄອງການຊ່ວຍເຫລືອເພື່ອການຄ້າ ເພື່ອຍົກສູງບົດບາດການພັດທະ ນາການຄ້າ ແລະ ພາກທຸລະກິດໄດ້ຮັບການປັບປຸງໃຫ້ດີຂຶ້ນ ໂດຍສະເພາະການຄ້າແບບຍືນຍົງ, ການພັດທະນາຂີດຄວາມສາ ມາດການຄຸ້ມຄອງຈັດການ ແລະ ອື່ນໆ.
ປັດຈຸບັນ, ສປປ ລາວ ໄດ້ສຳເລັດການທົບທວນຄືນຜົນສຳເລັດກາງສະໄໝ ໃນການຈັດຕັ້ງ ປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VII ທັງໄດ້ປະກອບສ່ວນຂໍ້ຄິດເຫັນໃຫ້ກັບຂະບວນການແຜນພັດທະນາໄລຍະຍາວ ເຊິ່ງລວມ ມີວິໄທສັດສຳລັບປີ 2030, ຍຸດທະສາດການພັດທະນາແຕ່ປີ 2016-2025 ແລະ ແຜນພັດທະນາເສດຖະກິດ-ສັງ ຄົມ 5 ປີ ຄັ້ງທີ VIII ແຕ່ປີ 2016- 2020. ສຳລັບແຜນພັດທະນາໄລ ຍະກາງ ແລະ ຍາວ ຈະເປັນການສ້າງໂອກາດອັນດີ ເພື່ອຊີ້ໃຫ້ເຫັນສິ່ງທີ່ສາມາດບັນລຸໄດ້ໃນໄລຍະຜ່ານມາ ແລະ ສາມາດລະບຸໄດ້ບັນດາມາດຕະການທີ່ຈຳເປັນ ເພື່ອບັນລຸຜົນໃນຕໍ່ໜ້າ. ລັດຖະມົນຕີວ່າການກະຊວງອຸດສາ ຫະກຳ ແລະ ການຄ້າ ໄດ້ຮຽກ ຮ້ອງໃຫ້ບັນດາຕົວແທນຂອງພາກລັດ, ຄູ່ຮ່ວມພັດທະນາ ແລະ ບັນດາສະມາຄົມນັກທຸລະກິດເຂົ້າຮ່ວມຂະບວນການປຶກສາຫາລືດ້ານນະໂຍບາຍຢ່າງຕັ້ງ ໜ້າ ເພື່ອກຳນົດທິດທາງການພັດ ທະນາພາກທຸລະກິດ ແລະ ແກ້ໄຂສິ່ງທີ່ກີດຂວາງດ້ານການຄ້າໃຫ້ໄດ້ຮັບຜົນດີ.
ທ່ານ Robort von Rimscha ເອກອັກຄະລັດຖະທູດເຢຍລະມັນປະຈຳລາວ ກໍໄດ້ຮຽກຮ້ອງໃຫ້ມີການປະສານງານທີ່ດີກວ່າເກົ່າ ລະຫວ່າງພາກລັດ ແລະ ພາກທຸລະກິດ ທັງມີຄວາມຈຳເປັນຫລາຍທີ່ຈະມີກອງປະຊຸມພົບປະກັບນັກທຸລະກິດລາວໃຫ້ຫລາຍຂຶ້ນ ເພື່ອຕິດຕາມແກ້ໄຂບັນດາຂໍ້ສະເໜີຕ່າງໆ. ທ່ານກ່າວຕື່ມວ່າ: ບັນດາຜູ້ລົງທຶນໃນຂະແໜງການທີ່ນຳໃຊ້ຊັບພະ ຍາກອນທຳມະຊາດຄວນຮັບຜິດຊອບພາລະດ້ານອາກອນໃນສັດ ສ່ວນທີ່ຍຸຕິທຳ, ໃນຂະນະທີ່ຜູ້ປະກອບການທີ່ປະກອບ ສ່ວນສ້າງຄວາມຫລາກຫລາຍທາງດ້ານເສດຖະກິດ ໂດຍສະເພາະການລົງທຶນໂຮງຈັກ-ໂຮງງານບໍ່ຄວນໄດ້ຮັບພາລະດ້ານອາ ກອນ, ຄ່າທຳນຽມ ຫລື ກົດລະບຽບເພີ່ມຕື່ມ.
ທີ່ມາ http://laophatthananews.blogspot.com/2014/05/aec.html