ສະ​ຖາ​ບັນ​ການທ່ອງທ່ຽວ ແລະ ໂຮງ​ແຮມ​ແຫ່ງ​ຊາດ​ລາ​ນິດ​ໄດ້​ຮັບ​ລາງວັນ​ທາງ​ດ້ານ​ການ​ພັດທະນາ​ຊັບພະຍາກອນ​ມະນຸດ ທາງ​ດ້ານ​ການທ່ອງທ່ຽວ​ແບບ​ຍືນ​ຍົງ ຫລື (Peuple Award 2014) ຈາກສະ​ພາ​ການ​ທ່ອງ​ທ່ຽວ ​ແລະ ການ​ເດີນ ທາງ​ໂລກ​ແຫ່ງ​ປະ​ເທດ​ອັງກິດຊຶ່ງ​​​ໄດ້​ສະ​ແດງ​ໃຫ້​ເຫັນ​ວ່າປະ​ເທດ​ລາວ​ຈະ​ກ້າວ​ໄປ​ຂ້າງ​ໜ້າ​ໃນ​ການ​ສ້າງ​ຄວາມ​ເຂັ້ມ​ແຂງ​ໃນ​ຂະ​ແໜງ​ການທ່ອງທ່ຽວ​ແບບ​ຍືນ​ຍົງ​ໂດຍ​ຜ່ານ​ບຸກຄະລາ​ກອນ​ຜູ້​ທີ່​ໃຫ້ການ​ບໍລິການ​ທີ່​ມິ​ຄຸນ​ນະພາ​ບ​ໃນ​ລະ ດັບ​ສາກົນທັງ​ເປັນ​ການສະ​ແດງ​ໃຫ້​ເຫັນ​ເຖິງ​ຄວາມ​ມຸ້ງ​ໝັ້ນ​ຕໍ່​ກັບ​ຫລັກການ​ຂອງ​ແຜນການ​ທ່ອງ​ທ່ຽວ​ເພື່ອ​ອະນາຄົດ.

ສະ​ຖາ​ບັນການທ່ອງທ່ຽວ ແລະ ​ການໂຮງ​ແຮມ​ແຫ່ງ​ຊາດ ລາ​ນິດ​ໄດ້​ອອກ​ແບບ​ການ​ສິດ ສອນຫລັກສູດ​ການ​ສຶກສາ​ຊັ້ນ ກາງ​ລະດັບ 2 ປີ ຊຶ່ງ​ປະກອບ​ມີ: ການ​ບໍລິການ-ການ​ເດີນທາງ ແລະ ການທ່ອງທ່ຽວ, ການ​ບໍລິການ​ສະຖານ​ທີ່​ພັກ​ແຮມ, ການ​ບໍລິການ​ອາຫານ-ເຄື່ອງ​ດື່ມ ​ແລະ ການ​ປຸງ​ແຕ່ງອາຫານ ແລະ ​ເຄື່ອງ​ດື່ມ​ໂດຍ​ເນັ້ນ​ໃສ່​ຄວາມ​ຕ້ອງການ​ຂອງ​ອຸດສາຫະກຳ​ນອກ​ນັ້ນຫລັກສູດ​ການ​ຮຽນ​ການ​ສອນ​ຍັງ​ໄດ້​ກວມ​ເອົາ​ການ​ປະຕິບັດ​ຕົວ​ຈິງ​ພ້ອມໆ​ກັບ​ການ​ຮຽນ​ທິດ​ສະ​ດີບ​ວກ​ໃສ່​ການເຝິກ​ງານ​ກັບ​ບັນດາ​ຫ້າງ​ຮ້ານ​ທຸລະ​ກິດ​ຕ່າງໆ​ໃນ​ລາວ​ທີ່​ມີ​ບົດບາດ​ອັນ​ສຳຄັນ​ຕໍ່​ກັບ​ນັກ​ສຶກສາເຝິກ​ງານ​ທີ່​ມີ​ໃຈ​ຮັກ​ການ​ເຮັດວຽກ​ງານນຳ​ອີກ. ປັດຈຸ​ບັນ​ສະ​ຖາ​ບັນ​ດັ່ງກ່າວ​ມີ​ນັກຮຽນ​ທັງ​ໝົດ 56 ຄົນ, ຍິງ 36 ຄົນ.

ທີ່ມາ  http://laophatthananews.blogspot.com/2014/05/blog-post_8840.html