ສະຫະປະຊາຊາດຖະແຫຼງວ່າ ປະມານ 80 ປະເທດມີແຜນຈະເຂົ້າຮ່ວມການປະຊຸມສຸດຍອດ ວ່າດ້ວຍຄວາມຊ່ວຍເຫຼືອດ້ານມະນຸດຊະທຳທົ່ວໂລກເປັນຄັ້ງທຳອິດທີ່ນະຄອນຫຼວງອິສຕັນບູລຂອງຕວກກີໃນເດືອນນີ້ ເພື່ອຫາທາງຮັບມືກັບວິກິດບັນຫາທົ່ວໂລກ.
ສຳນັກຂ່າວດ້ານມະນຸດຊະທຳສະຫະປະຊາຊາດຖະແຫຼງວ່າ ໃນກຸ່ມປະເທດດັ່ງກ່າວຈະມີຜູ້ແທນຂອງ 45 ຜູ້ນຳປະເທດ ແລະ ຜູ້ນຳລັດຖະບານທີ່ຈະໃຫ້ຄຳໝັ້ນໃນການລະດົມເງິນຊ່ວຍເຫຼືອລະຫວ່າງປະເທດໃນລະຫວ່າງວັນທີ 23-24 ພຶດສະພານີ້ ເຖິງວ່າຜູ້ນຳ ແລະ ຜູ້ແທນຈາກປະເທດທີ່ສະແດງຄວາມປະສົງຈະເຂົ້າຮ່ວມການປະຊຸມດ້ານມະນຸດຊະທຳຈະບໍ່ເຖິງເຄິ່ງໜຶ່ງຂອງປະເທດສະມາຊິກສະຫະປະຊາຊາດ 193 ປະເທດກໍ່ຕາມ, ຢ່າງໃດກໍ່ຕາມ ສະຫະປະຊາຊາດບໍ່ໄດ້ເປີດເຜີຍລາຍຊື່ຜູ້ນຳປະເທດ ປະເທດທີ່ຕອບຮັບເຂົ້າຮ່ວມ ແລະ ລາຍລະອຽດເພີ່ມເຕີມໃນການປະຊຸມຄັ້ງນີ້.