ເວັບໄຊ Macotakara ຂອງຍີ່ປຸ່ນໄດ້ລາຍງານວ່າຕອນນີ້ Apple ກຳລັງຈະເປີດໂຕຫູຟັງໃໝ່ ແລະຮອບຮັບໄຟລສຽງເພງທີ່ໃຫ້ຄຸນນະພາບສູງແລະດີໃນ iOS 8
ຈາກລາຍງານນັ້ນໄດ້ກ່າວວ່າ Apple ກຽມທີ່ຈະເຮັດໃຫ້ iOS 8 ຮອບຮັບສຽງເພງຄຸນນະພາບສູງ ໂດຍປັດຈຸບັນ iOS 7 ນັ້ນຍັງບໍ່ສາມາດຫຼິ້ນໄຟລເພງ 24-bit sampling rate 48kHz ແລະເຖິງວ່າ App Store ຈະມີແອັບທີ່ຫຼິ້ນໄຟລເພງຄຸນນະພາບສູງເຫຼົ່ານີ້ໄດ້ ແຕ່ກໍຕ້ອງຖືກຈຳກັດສຽງໄວ້ພຽງແຕ່ 16-bit ເທົ່ານັ້ນ
ສ່ວນເລື່ອງຂອງຫູຟັງນັ້ນລາຍງານໄດ້ກ່າວໄວ້ວ່າ Apple ຈະເປີດໂຕຫູຟັງແບບ in-ear ແບບໃໝ່ ຫຼັງຈາກທີ່ລຸ້ນເກົ່ານັ້ນເປີດໂຕຫຼ້າສຸດໃນປີ 2008 ໂດຍຫູຟັງແບບໃໝ່ນີ້ຈະອອກແບບມາເພື່ອຮອງຮັບການຟັງເພງໃຫ້ໄດ້ຄຸນນະພາບ
ນອກຈາກນັ້ນແລ້ວຍັງມີຂ່າວລືອີກວ່າ Apple ກໍກຽມທີ່ຈະເປີດໃຫ້ດາວໂຫຼດເພງທີ່ມີຄຸນນະພາບສູງ 24-bit ເທິງ iTunes Store ໃນງານ WWDC 2014 ທີ່ຈະຈັດຂຶ້ນໃນຕົ້ນເດືອນມິຖຸນານີ້
ສຳລັບຜູ້ທີ່ຍັງບໍ່ຮູ້ວ່າເພງຄຸນນະພາບສູງແມ່ນຫຍັງ? ກໍຄົງຈະອະທິບາຍໄດ້ວ່າ ປັດຈຸບັນ ເພງທີ່ກຳລັງຂາຍຢູ່ເທິງ iTunes Store ເປັນເພງຟຣໍແມັດ AAC 16-bit ໂດຍໄຟລເພງ 24-bit ຈະໃຫ້ຄຸນນະພາບສຽງທີ່ດີກວ່າ 16-bit ຫຼາຍ ແຕ່ວ່າມັນກໍບໍ່ໄດ້ຂຶ້ນກັບໄຟລເພງຢ່າງດຽວເທົ່ານັ້ນ ມັນຍັງຂຶ້ນກັບປັດໄຈຫຼາຍຢ່າງນຳເຊັ່ນ: ຄຸນນະພາບການອັດສຽງ, ການຮອງຮັບຂອງຮາດແວ ແລະອື່ນໆ
ຫາກຈະປຽບທຽບງ່າຍໆກໍຄື ໄຟລເພງຄຸນນະພາບຕ່ຳແມ່ນເປັນໄຟລຮູບເງົາຢູ່ແຜ່ນຊີດີ ສ່ວນໄຟລເພງຄຸນນະພາບສູງແມ່ນເປັນໄຟລຮູບເງົາຢູ່ແຜ່ນ Blu-ray ແຕ່ຄົນເຮົາຟັງແລ້ວບໍ່ຮູ້ສຶກເຖິງຄວາມແຕກຕ່າງຂອງໄຟລສຽງຄຸນນະພາບຕ່ຳແລະຄຸນນະພາບສູງນັ້ນ ເປັນເພາະວ່າຄົນເຮົາມັກຈະຮັບຮູ້ຜ່ານສາຍຕາຫຼາຍກວ່າຫູ
ທີ່ມາ – MacRumors