ຄະນະກໍາມາທິການຮ່ວມມືລາວ-ຈີນລາຍງານໃຫ້ຮູ້ວ່າ: ສປ ຈີນ ຍັງເປັນອັນດັບໜຶ່ງຂອງການລົງທຶນໃນລາວ, ຊຶ່ງມີຫລາຍກວ່າ 760ໂຄງການ,ລວມມີມູນຄ່າຫລາຍກວ່າ 6,7 ຕື້ໂດລາສະຫະລັດ ແລະ ສະເພາະແຕ່ປີ 2011 ມາຮອດປັດຈຸບັນມີຫລາຍກວ່າ 160 ໂຄງການລວມມີມູນຄ່າຫລາຍກວ່າ 2,75 ຕື້ໂດລາສະຫະລັດ, ຂະນະທີ່ບໍລິມາດການຄ້າລະຫວ່າງສອງປະເທດນັບມື້ເພີ່ມຂຶ້ນຢ່າງຕໍ່ເນື່ອງໃນແຕ່ລະປີຄື:ປີ 2011ມີມູນຄ່າປະມານ 1,3 ຕື້ໂດລາສະຫະລັດ, ປີ 2012 ເພີ່ມຂຶ້ນເປັນ 1,7 ຕື້ໂດລາສະຫະລັດ, ປີ 2013 ເພີ່ມຂຶ້ນ 2,7 ຕື້ໂດລາສະຫະລັດ ແລະ ປີ 2014ເພີ່ມສູງຂຶ້ນເຖິງ 3,6 ຕື້ໂດລາສະຫະລັດ, ແຕ່ໃນສົກປີ 2015 ຜ່ານມາເຫັນວ່າຕົວເລກການຄ້າສອງຝ່າຍໄດ້ຫລຸດລົງມາຢູ່ທີ່ 2,78 ຕື້ໂດລາສະຫະລັດ, ຍ້ອນໄດ້ຮັບຜົນກະທົບຈາກວິກິດເສດຖະກິດໂລກ, ໂດຍສະເພາະລາຄານໍ້າມັນ ແລະແຮ່ທາດຕົກຕໍ່າ.
ຄະນະກໍາມະການດັ່ງກ່າວໃຫ້ຮູ້ວ່າ: ການລົງທຶນຂອງຈີນຢູ່ລາວແມ່ນມີຫລາຍຂົງເຂດ, ແຕ່ອັນພົ້ນເດັ່ນກວ່າໝູ່ແມ່ນໃນຂະແໜງພະລັງງານ, ບໍ່ແຮ່, ກະສິກໍາແລະບໍລິການ, ຂະນະທີ່ການລົງທຶນຢູ່ໃນເຂດເສດຖະກິດພິເສດ ແລະສະເພາະກໍພວມມີບັນຍາກາດຟົດຟື້ນເປັນຕົ້ນ: ເຂດເສດຖະກິດສະເພາະບຶງທາດຫລວງ, ນະຄອນຫລວງວຽງຈັນ, ເຂດເສດຖະກິດພິເສດດອກງິ້ວຄໍາ ເມືອງຕົ້ນເຜີ້ງ ແຂວງບໍ່ແກ້ວ ແລະ ເຂດອື່ນໆກໍມີນັກລົງທຶນຈາກຈີນໃຫ້ຄວາມສົນໃຈແລະ ໄປລົງທຶນຫລາຍເຊັ່ນກັນ, ເຊິ່ງປັດໃຈສໍາຄັນທີ່ເຮັດໃຫ້ການຮ່ວມມືດ້ານການຄ້າ, ການລົງທຶນລະຫວ່າງສອງປະເທດມີບາດກ້າວຂະ ຫຍາຍຕົວດີຂຶ້ນເປັນລໍາດັບນັ້ນຍ້ອນສອງຝ່າຍໄດ້ມີຄວາມພະຍາຍາມເອົາໃຈໃສ່ປະສານງານປັບປຸງແກ້ໄຂບັນດາກົນໄກ, ລະບຽບການ ແລະ ຂໍ້ຫຍຸ້ງຍາກຕ່າງໆໃຫ້ຫລຸດລົງເພື່ອສ້າງເງື່ອນໄຂສະດວກຕໍ່ການນໍາເຂົ້າ-ສົ່ງອອກສີນຄ້າຢູ່ຕາມຊາຍແດນສອງປະເທດ, ອີກດ້ານໜຶ່ງແມ່ນສອງຝ່າຍລາວ-ຈີນໄດ້ມີການລົງນາມໃນບົດບັນທຶກຄວາມເຂົ້າໃຈວ່າດ້ວຍການກໍານົດເງື່ອນໄຂໃນການກວດກາສຸຂະອານາໄມຜະລິດຕະພັນກະສິກໍາຈໍານວນໜຶ່ງເຊັ່ນ: ເຂົ້າ, ມັນຕົ້ນ, ກ້ວຍ, ໝາກໂມສາມາດເຂົ້າໄປຈໍາໜ່າຍໃນຕະ ຫລາດ ສປ ຈີນ ສະດວກຫລາຍຂຶ້ນ.
ຄະນະກໍາມະການດັ່ງກ່າວໃຫ້ຮູ້ວ່າ: ປີ 2016 ນີ້, ແມ່ນປີທີ່ມີຄວາມໝາຍພິເສດສໍາລັບສອງປະເທດລາວ ແລະຈີນ, ເນື່ອງຈາກຄົບຮອບ 55 ປີ (25 ເມສາ 1961-25 ເມສາ 2016) ແຫ່ງການສ້າງຕັ້ງສາຍພົວພັນທາງການທູດນໍາກັນ, ຊຶ່ງຈະມີຫລາຍໆກິດຈະກໍາຈັດຂຶ້ນໃນສອງປະເທດເພື່ອສະເຫລີມສະຫລອງສາຍພົວພັນດັ່ງກ່າວ, ທັງເປັນການປະກອບສ່ວນເຂົ້າໃນການເສີມຂະຫຍາຍສາຍພົວພັນຮ່ວມມືຍຸດທະສາດຮອບດ້ານລະຫວ່າງສອງປະເທດລາວ-ຈີນໃຫ້ນັບມື້ເຂົ້າສູ່ລວງເລິກ.
ຂ່າວຈາກ: 