ກຸ່ມບໍລິສັດຄຳໄພຊະນະ ມີຄວາມສົນໃຈຈະເຂົ້າພັດທະນາດອນລີ້ນທີ່ຮົກເຮື້ອໃນຂະນະນີ້ໃຫ້ກາຍເປັນສະຖານທີ່ທ່ອງທ່ຽວຄົບວົງຈອນຂອງແຂວງບໍລິຄຳໄຊຊຶ່ງປະຈຸບັນພວມໄດ້ຮັບການອະນຸຍາດຈາກອຳນາດການປົກຄອງແຂວງ ເພື່ອເຂົ້າສຶກສາຄວາມເປັນໄປໄດ້ໂດຍຈະໃຊ້ເວລາໜຶ່ງປີຈິ່ງຮູ້ຜົນເກີດ ຫຼື ບໍ່ເກີດ.
ເພື່ອເປັນການຢັ້ງຢືນເຖິງການອະນຸຍາດໃນວັນທີ 26 ເມສາຜ່ານມາພະແນກແຜນການ ແລະ ການລົງທຶນ ແຂວງບໍລິຄຳໄຊສົມທົບກັບກຸ່ມບໍລິສັດຄຳໄພຊະນະກໍ່ສ້າງຈຳກັດຈັດພິທີເຊັນບົດບັນທຶກ (MOU) ສຶກສາຄວາມເປັນໄປໄດ້ໃນການພັດທະນາດັ່ງກ່າວຂຶ້ນທີ່ໂຮງແຮມໂຊກບຸນມາຊຶ່ງຕາງໜ້າລົງນາມລະຫວ່າງທ່ານ ສົນທອງ ວີບຸນກວ້າງຮອງຫົວໜ້າພະແນກແຜນການການລົງທຶນແຂວງກັບທ່ານ ຄຳໄພ ສົມຊະນະ ປະທານກຸ່ມບໍລິສັດຄຳໄພຊະນະກໍ່ສ້າງ ຈຳກັດ ໂດຍມີທ່ານ ບຸນເສັງ ປະທຳມະວົງ ຮອງເຈົ້າແຂວງບໍລິຄຳໄຊ ພ້ອມບັນດາຫົວໜ້າພະແນກການທີ່ກ່ຽວຂ້ອງ, ພະນັກງານ, ວິຊາການທັງສອງຝ່າຍເຂົ້າຮ່ວມ.
ໂຄງການສຶກສາສຳຫຼວດຄວາມເປັນໄປໄດ້ໃນການພັດທະນາເຂດດອນລີ້ນແມ່ນຕັ້ງຢູ່ບ້ານໂພນໄຊ ເມືອງປາກຊັນ ແຂວງບໍລິຄຳໄຊ ນອນຢູ່ໃນເຂດ ເທສະບານແຂວງ ເພື່ອແນໃສ່ພັດທະນະ ນາແຫຼ່ງທ່ອງທ່ຽວຄົບວົງຈອນເປັນຕົ້ນສ້າງຫາດຊາຍທຽມ, ໂຮງແຮມ, ຣີສອດ, ຮ້ານອາຫານ, ຮ້ານບັນເທີງ, ຮ້ານຂາຍ ເຄື່ອງທີ່ລະນຶກ ແລະສິ່ງອຳນວຍຄວາມສະດວກອື່ນໆຕາມຄວາມເໝາະສົມ.
ໂດຍແມ່ນບໍລິສັດ ຄຳໄພຊະນະ ກໍ່ສ້າງຈຳກັດ ໃຫ້ເປັນຜູ້ລົງທຶນເອງທັງໝົດໃນການສຶກສາ, ສຳຫຼວດອອກແບບ ແລະ ໄລ່ລຽງທາງດ້ານເສດຖະກິດສັງຄົມຖ້າມີຄວາມເປັນໄປໄດ້ບໍລິສັດຈິ່ງຈະສະເໜີຫາແຂວງໃນການສຳປະທານ ເພື່ອພັດທະນາຕາມລະບຽບການຕໍ່ໄປ ຊຶ່ງຈະໃຊ້ເວລາປະຕິບັດການສຶກສາສຳ ຫຼວດຈຳນວນ 1 ປີ ເພື່ອເຮັດໃຫ້ໂຄງການດັ່ງກ່າວໄດ້ດຳເນີນໄປຢ່າງຖຶກຕ້ອງຕາມລະບຽບກົດໝາຍ ແລະຖ່ວງທັນກັບກຳນົດເວລາ.
ທີ່ມາ: