ວັນທີ 22 ເມສາ 2016 ທ່ານ ປະສົງສິນ ຈະເລີນສຸກ ຫົວໜ້າພະແນກໂຍທາທິການ ແລະ ຂົນສົ່ງແຂວງສະຫວັນນະເຂດ ພ້ອມດ້ວຍວິຊາການຈຳນວນໜຶ່ງໄດ້ເຄື່ອນໄຫວລົງຕິດຕາມການສ້າງຂົວ 6 ແຫ່ງຕາມເສັ້ນທາງເລກທີ 11 ລຽບແຄມຂອງແຕ່ເມືອງໄກສອນ ພົມວິຫານຫາເມືອງໄຊພູທອງ ພ້ອມກັນນັ້ນ ກໍໄດ້ເນັ້ນໜັກໃຫ້ຜູ້ຮັບເໝົາກໍ່ສ້າງຂົວແຫ່ງດັ່ງກ່າວ ຈົ່ງໄດ້ເອົາໃຈໃສ່ໃກ້ຊິດຕິດແທດປະຕິບັດວຽກໃຫ້ສຳເລັດຕາມ ກຳນົດກໍຄືກ່ອນລະດູຝົນທັງນີ້ກໍເພື່ອເຮັດໃຫ້ການໄປມາຫາສູ່ລະຫວ່າງປະຊາຊົນ ແລະ ຂົນສົ່ງສິນຄ້າຕ່າງໆໄດ້ສະດວກ.
ໂອກາດການລົງເຮັດວຽກຂອງຫົວໜ້າພະແນກ ຍທຂ ແຂວງສະຫວັນນະເຂດໄດ້ໃຫ້ຮູ້ຕໍ່ນັກຂ່າວພວກເຮົາວ່າ: ເພື່ອເປັນການຕິດຕາມແລະຊຸກຍູ້ການເຮັດວຽກຂອງບັນດາບໍລິສັດຜູ້ຮັບເໝົາກໍ່ສ້າງເສັ້ນທາງຢູ່ພາຍໃນແຂວງຂອງພວກເຮົາເວົ້າສະເພາະກໍຄືເສັ້ນທາງເລກທີ 11E ລຽບຕາມແຄມຂອງແຕ່ເມືອງໄກສອນພົມວິຫານຫາເມືອງໄຊພູທອງທີ່ມີມູນຄ່າທັງໝົດ 139 ຕື້ກວ່າກີບ ເຫັນວ່າປະຕິບັດໄດ້ດີຕາມລະດັບຄາດໝາຍທີ່ວາງໄວ້ໂດຍສະເພາະແມ່ນການໂຄງການກໍ່ສ້າງເສັ້ນທາງປູຢາງ 2 ຊັ້ນລຽບແຄມຂອງເຫັນ ວ່າປະຕິບັດໄດ້ 71% ຊຶ່ງນັບຈາກບ້ານ ສົ້ມປ່ອຍເມືອງໄກສອນພົມວິຫານຫາເຮືອນຫີນ ເມືອງໄຊພູທອງ ໂດຍເສັ້ນທາງມີຄວາມຍາວ 42 ກິໂລແມັດ, ໃນໄລຍະກໍ່ສ້າງເສັ້ນທາງແຫ່ງນີ້ມີຂົວຢູ່ 6 ແຫ່ງທີ່ພວມເລັ່ງກໍ່ສ້າງໃຫ້ສຳເລັດກ່ອນລະດູຝົນ.
ທ່ານ ທິບພະວອນ ສີລາຊາ ຜູ້ອຳນວຍການບໍລິສັດ VLP ພັດທະນາກໍ່ສ້າງຈຳກັດໃນນາມຜູ້ຮັບເໝົາກໍ່ສ້າງໃຫ້ຮູ້ຕື່ມວ່າ: ອີງຕາມເນື້ອໃນຈິດໃຈຂອງຂັ້ນເທິງໂດຍເນັ້ນໜັກໃຫ້ການກໍ່ສ້າງຂົວສຳເລັດຕາມກຳນົດມາເຖິງປະຈຸບັນ ຂົວທັງ 6 ແຫ່ງ ປະກອບມີຂົວສົ້ມປ່ອຍ, ຂົວຫ້ວຍຍາງ, ຂົວຫ້ວຍເດຶ່ອ (ເມືອງໄກ ສອນພົມວິຫານ) ຂົວຫ້ວຍສວນອີ້ງ, ຂົວຫ້ວຍກົບ ແລະຂົວຫ້ວຍມະຍະ (ເມຶອງໄຊພູທອງ) ແມ່ນໄດ້ຂຸ້ນຂ້ຽວດຳເນີນການກໍ່ສ້າງສະເລ່ຍໜ້າວຽກປະຕິບັດໄດ້ແລ້ວ 80% ດັ່ງນັ້ນລະດູຝົນທີ່ຈະມາເຖິງນີ້ສາມາດຢືນຢັນໄດ້ວ່າຂົວທັງ 6 ແຫ່ງ ຈະກໍ່ສ້າງສຳເລັດຢ່າງແນ່ນອນ ແລະ ປະຊາຊົນກໍຈະສາມາດທຽວໄດ້ສະດວກ.
ໃນວັນດຽວກັນ ທ່ານ ປະສົງສິນ ຈະເລີນສຸກ ກໍຍັງໄດ້ເດີນທາງເຄື່ອນໄຫວຕິດຕາມການຍົກລະດັບທາງດິນແດງ ແຕ່ບ້ານໜອງຂອນຫາບ້ານນາຂະຍອມເມືອງສອງຄອນທີ່ມີຄວາມຍາວ 6,5 ກິໂລແມັດ ໂດຍມີມູນຄ່າການກໍ່ສ້າງເກືອບ 5 ຕື້ກີບຕໍ່ກັບໜ້າວຽກດັ່ງກ່າວແມ່ນສາມາດປະຕິບັດ 60% ແລະຄາດວ່າໂຄງການດັ່ງກ່າວຈະສຳເລັດໃນປີ 2016 ນີ້.
ທີ່ມາ: 