ຂ່າວ: ໄພປະດິດ
ພັກ ແລະ ລັດ ໄດ້ເອົາໃຈໃສ່ສືບຕໍ່ອອກໃບຕາດິນໃຫ້ພໍ່ແມ່ປະຊາຊົນໂດຍໄດ້ຕັ້ງເປົ້າໝາຍຮອດ ປີ 2015 ຈະອອກໃບຕາດິນໃຫ້ໄດ້ 1 ລ້ານຕອນໃນທົ່ວປະເທດ ຊຶ່ງມາຮອດເວລານີ້ໄດ້ແລ້ວ 700.000 ຕອນ.
ອີງຕາມບົດລາຍງານຂອງລັດຖະບານໃນຂົງເຂດທີ່ດິນ ໂດຍໄດ້ສຳເລັດການຈັດສັນທີ່ດິນໃນຂັ້ນບ້ານ 4.905 ບ້ານ ກວມເອົາ 56,87% ຂອງບ້ານທັງໝົດ ແລະ ຂັ້ນເມືອງ 36 ເມືອງກວມເອົາ 25,35% ຂອງເມືອງທັງໝົດສຳເລັດການຂຶ້ນທະບຽນ ແລະ ອອກໃບຕາດິນໃນຂອບເຂດທົ່ວປະເທດໄດ້ 700.000 ກວ່າຕອນ ກວມເອົາ 34% ຂອງຕອນດີນທົ່ວປະເທດໃນຈຳນວນ 2,1 ລ້ານຕອນ ທີ່ໄດ້ຜ່ານການສຳຫຼວດເກັບກຳສະຖິຕິຈາກສຳມະໂນທີ່ດິນ ແລະ ເສຍພາສີທີ່ດິນ ຂະນະທີ່ໃນປີ 2015 ທາງກະຊວງຊັບພະຍາກອນທຳມະຊາດ ແລະ ສິ່ງແວດລ້ອມໄດ້ຕັ້ງເປົ້າໝາຍໄວ້ໃຫ້ອອກໃບຕາດິນໄດ້ທັງໝົດ 1 ລ້ານຕອນ.
ແນວໃດກໍດີ ໄປຄຽງຄູ່ກັນນັ້ນໃນຜ່ານມາໄດ້ປັບປຸງຂໍ້ມູນຄືນກ່ຽວກັບການສ້າງແຜນທີ່ເຂດປະເມີນລາຄາທີ່ດິນ ແລະ ສິ່ງປຸກສ້າງຈຳນວນ 8 ແຂວງ 17 ຕົວເມືອງຄື: ນະຄອນຫຼວງ ວຽງຈັນ (9 ຕົວເມືອງ), ເມືອງປາກເຊ ແຂວງຈຳປາສັກ, ເມືອງທ່າແຂກ ແຂວງຄຳມ່ວນ, ເມືອງຫຼວງພະບາງ ແຂວງຫຼວງພະບາງ, ເມືອງໂພນໂຮງ ແລະ ເມືອງວັງວຽງ ແຂວງວຽງຈັນ, ເມືອງສາລະວັນ ແຂວງສາລະວັນ, ເມືອງໄຊຍະບູລີ ແຂວງໄຊຍະບູລີ, ເມືອງໄກສອນພົມວິຫານ ແຂວງສະຫວັນນະເຂດ ແລະ ກຳລັງລົງເກັບກຳຂໍ້ມູນຢູ່ເມືອງປາກຊັນ ແຂວງບໍລິຄຳໄຊ ສ້າງແຜນທີ່ເຂດປະເມີນລາຄາທີ່ດິນ ແລະ ສຳເລັດການຈັດສັນທີ່ດີນຂອງໂຄງການຈັດສັນທີ່ດິນປຸກສ້າງສຳນັກງານແຫ່ງໃໝ່ຂອງບັນດາກະຊວງສຳເລັດໄດ້ 90%.
ທີ່ມາ http://www.sedthakid.la/khao/18775.spc