ເຈົ້າໜ້າທີ່ພະແນກສະກັດກັ້ນ ແລະ ຕ້ານຢາເສບຕິດ ປກສ ແຂວງຄຳໄຊ ໄດ້ໃຫ້ຮູ້ວ່າ: ໃນວັນທີ 25 ເມສາ 2016 ນີ້ໄດ້ຮັບແຈ້ງຈາກພົນລະເມືອງດີວ່າ: ມີກຸ່ມຄົນບໍ່ດີເຄື່ອນໄຫວຄ້າຂາຍຢາເສບຕິດຢູ່ເຂດບ້ານທົ່ງນາມີ ເມືອງປາກກະດິງ ແຂວງ ບໍລິຄຳໄຊ, ພວມມຸ່ງໜ້າເຂົ້າມາເມືອງປາກຊັ້ນຈາກນັ້ນເຈົ້າໜ້າທີ່ພະແນກສະກັດກັ້ນ ແລະຕ້ານຢາເສບຕິດກໍໄດ້ວາງກຳລັງຕິດຕາມເປົ້າໝາຍ.
ຈົນຮອດເວລາປະມານ 20:00 ໂມງຂອງວັນດຽວກັນຈິ່ງເຫັນເປົ້າໝາຍພວມຂົນສົ່ງຢາເສບຕິດມາຮອດເຂດບ້ານ ຫ້ວຍສຽດ ເມືອງປາກຊັນ, ແຂວງບໍລິຄຳໄຊ ເຈົ້າໜ້າທີ່ຈິ່ງໄດ້ສະແດງຕົວເຂົ້າສະກັດກັ້ນ ແລະເຂົ້າຈັບຕົວຜູ້ຖືກຫາໄດ້ 2 ຄົນຄື: ທ້າວ ຕົວຊົ່ງ ອາຍຸ 32 ປີ ຢູ່ບ້ານນ້ຳເດີນ ເມືອງຄຳເກີດ ແຂວງບໍລິຄຳໄຊ ແລະທ້າວ ເຕັ້ງຊົ່ງ ອາຍຸ 26 ຢູ່ບ້ານທົ່ງນາມີເມືອງປາກກະດິງ ແຂວງບໍລິຄຳໄຊ ພ້ອມດ້ວຍຂອງກາງກັນຊາຈຳ ນວນ 209 ກິໂລກຣາມ ແລະລົດກະບະວິໂກ້ 1 ຄັນ.
ຜ່ານການສືບສວນສອບສວນພວກກ່ຽວທັງສອງໄດ້ໃຫ້ການຮັບສາລະພາບວ່າໃນເວລາ 12:00 ໂມງຂອງວັນທີ 25 ເມສາ 2016 ພວກກ່ຽວໄດ້ໄປເອົາກັນຊາຈຳນວນ 209 ກິໂລກຣາມມາແຕ່ ບ້ານຜາຂອດ, ເມືອງວຽງທອງ, ແຂວງ ບໍລິຄຳໄຊ, ຈຸດປະສົງແມ່ນຈະເອົາມາຂາຍຢູ່ເຂດເມືອງປາກຊັນແຕ່ພໍມາຮອດບ້ານຫ້ວຍສຽດ, ເມືອງປາກຊັນກໍໄດ້ຖືກເຈົ້າໜ້າທີ່ຕຳຫຼວດພະແນກສະກັດກັ້ນແລະຕ້ານຢາເສບຕິດ ປກສ ແຂວງ ກັກຕົວ ພ້ອມດ້ວຍຂອງກາງກັນຊາຈຳນວນດັ່ງກ່າວມາດຳເດີນຄະດີຕາມລະບຽບກົດໝາຍ.
ຕໍ່ກັບຄະດີດັ່ງກ່າວເຈົ້າໜ້າທີ່ພະແນກຕຳຫຼວດສະກັດກັ້ນ ແລະຕ້ານຢາເສບຕິດ ປກສ ແຂວງບໍລິຄຳໄຊໄດ້ເລັ່ງທຳການສືບສວນສອບສວນຂະຫຍາຍຜົນຫາພັກພວກກຸ່ມແກ້ງທີ່ຮ່ວມຂະບວນການດຽວກັນມາດຳເນີນຄະດີຕາມລະບຽບກົດໝາຍຕໍ່ໄປ.
ທີ່ມາ:
ຕິດຕາມຂ່າວເສດຖະກິດ-ສັງຄົມລາວ ກົດໄລຄ໌ເລີຍ!