ສຳນັກຂ່າວຕ່າງປະເທດ ລາຍງານໃນວັນທີ 26 ເມສານີ້ວ່າ ຄະນະລັດຖະບານ ອາຣັບບີ ຊາອຸດິດ ຊຶ່ງເປັນປະເທດຜູ້ຜະລິດນ້ຳມັນ ລາຍໃຫຍ່ທີ່ສຸດຂອງໂລກ ໄດ້ເຫັນດີຮັບຮອງເອົາ ແຜນການປະຕິຮູບເສດຖະກິດຂອງປະເທດ ໂດຍມີເປົ້າໝາຍຫລຸດຜ່ອນການເພິ່ງພາລາຍໄດ້ ຈາກການຂາຍນ້ຳມັນ ຫລັງຈາກທີ່ບັນດາປະເທດຜູ້ຜະລິດນ້ຳມັນທົ່ວໂລກ ກຳລັງປະເຊີນກັບວິກິດການລາຄານ້ຳມັນຕົກຕ່ຳ ຈົນເຮັດໃຫ້ງົບປະມານລາຍຮັບຂອງປະເທດ ຫລຸດໜ້ອຍລົງຢ່າງໜັກໜ່ວງ.

ເຈົ້າຊາຍ ໂມຮຳເໝັດ ບິນ ຊັນລະມານ ຮອງອົງມຸງກຸດຣາຊະກຸມານ ແຫ່ງ ຣາຊະວົງອາຣັບບີ ຊາອຸດິດ ແລະ ທັງເປັນລັດຖະມົນຕີວ່າການ ກະຊວງປ້ອງກັນປະເທດ ໃນລັດຖະບານຂອງປະເທດ ໄດ້ປະກາດແຜນປະຕິຮູບດັ່ງກ່າວ ໃນຊື່ແຜນວິໄສທັດ 2030 ໃນວັນຈັນທີ 25 ເມສາ 2016 ທີ່ຜ່ານມາ ໂດຍທ່ານໄດ້ເວົ້າວ່າ ອາຣັບບີ ຊາອຸດິດ ກຳລັງເສບຕິດນ້ຳມັນ, ລາຍໄດ້ຂອງປະເທດກວ່າ 70% ມາຈາກນ້ຳມັນ, ແຕ່ແຜນການດັ່ງກ່າວນີ້ ຈະເຮັດໃຫ້ຊາອຸດິດຢູ່ໄດ້ ໂດຍບໍ່ຕ້ອງເພິ່ງລາຍໄດ້ຈາກນ້ຳມັນເປັນຫລັກ ພາຍໃນປີ 2020.

ທັງນີ້ ແຜນດັ່ງກ່າວ ປະກອບດ້ວຍການຂາຍຮຸ້ນສູງສຸດ 5% ຂອງບໍລິສັດອາຣາມໂກ ຊຶ່ງເປັນລັດວິສາຫະກິດ ຜູ້ຜະລິດນ້ຳມັນຂອງລັດຖະບານ ໃນຕະຫລາດຫລັກຊັບ ຊຶ່ງຈະດຳເນີນການໃນປີ 2017 ຫລື 2018 ແລ້ວກໍ່ຕັ້ງກອງທຶນຄວາມໝັ້ນຄົງແຫ່ງຊາດ ໃນມູນຄ່າ 2 ພັນຕື້ໂດລາສະຫະລັດຯ.

ນອກຈາກນີ້ ຍັງຈະເປີດໂອກາດໃຫ້ຊາວມຸດສະລິມ ທີ່ອາໄສຢູ່ຕ່າງປະເທດ ສາມາດເຮັດວຽກຢູ່ອາຣັບບີ ຊາອຸດິດ ໄດ້ໃນເວລາທີ່ດົນຂຶ້ນ ແລະ ລັດຖະບານຍັງຈະດຳເນີນຂັ້ນຕອນຕ່າງໆ ເພື່ອສ້າງຄວາມຫລາກຫລາຍທາງເສດຖະກິດ ດ້ວຍການລົງທຶນດ້ານບໍ່ແຮ່ ແລະ ຂະຫຍາຍການຜະລິດອາວຸດຍຸດໂທປະກອນທາງທະຫານ ຕະຫລອດຮອດເພີ່ມອັດຕາສ່ວນ ແຮງງານເພດຍິງອີກດ້ວຍ.

ສຳຫຼັບທ່ານທີ່ຮັກສຸຂະພາບ ຕິດຕາມເລື່ອງດີດີ ກົດໄລຄ໌ເລີຍ!