ຂປລ. ປະຈຸບັນ ອຳນາດການປົກຄອງ ເມືອງບົວລະພາ ແຂວງຄຳມ່ວນ ກຳລັງຫ້າງຫາກະກຽມໃນດ້ານຕ່າງໆ ເພື່ອກຽມປະກາດເປັນເມືອງພົ້ນທຸກ ໃນເດືອນພຶດສະພາ 2016 ທີ່ຈະມາເຖິງ ເປັນຕົ້ນໄດ້ເຜີຍແຜ່ເອກະສານ ມະຕິຄຳສັ່ງຕ່າງໆ, ມາດຖານເງື່ອນໄຂຂອງເມືອງພົ້ນທຸກ ໃຫ້ພໍ່ແມ່ປະຊາຊົນໄດ້ເຂົ້າໃຈ, ການກະກຽມທາງດ້ານເນື້ອໃນ, ການປ້ອງກັນຄວາມສະຫງົບ, ລົງຊຸກຍູ້ຂະບວນການ ໃນການກ້ອນກຳລັງເຂົ້າຮ່ວມ ໃນງານດັ່ງກ່າວ ແລະ ຊຸກຍູ້ຂະບວນການກິລາ, ດ້ານສິລະປະວັນນະຄະດີຂອງກຸ່ມບ້ານ ແລະ ບັນດາໂຮງຮຽນ ໃຫ້ມີການສະແດງ, ພ້ອມລະດົມ ປະຊາຊົນບັນດາເຜົ່າ ນຳເອົາສິນຄ້າທີ່ຜະລິດດ້ວຍພູມປັນຍາຂອງຊາວບ້ານມາວາງສະແດງ.
ທ່ານ ຄຳເພົ້າ ທອງເທພາຮັກ ເຈົ້າເມືອງໆບົວລະພາ ໃຫ້ຮູ້ວ່າ: ເມືອງບົວລະພາ ແມ່ນໜຶ່ງໃນຈໍານວນ 10 ຕົວເມືອງ ຂອງແຂວງຄຳມ່ວນ ແລະ ເປັນເມືອງທີ່ຍັງທຸກຍາກເມືອງສຸດທ້າຍຂອງແຂວງ ຢູ່ຫ່າງຈາກເທສະບານແຂວງ ປະມານ 150 ກິໂລແມັດ. ໃນເມື່ອກ່ອນແມ່ນມີຄວາມຫຍຸ້ງຍາກ ໂດຍສະເພາະແມ່ນຖະໜົນຫົນທາງຍັງບໍ່ສະດວກ, ລະບົບຄົມມະນາຄົມຍັງມີຄວາມຫຍຸ້ງຍາກ ໃນການຕິດຕໍ່ສື່ສານ, ຕາຄ່າຍໄຟຟ້າຍັງບໍ່ທົ່ວເຖິງ, ການດຳລົງຊີວິດ ຂອງປະຊາຊົນ ໃນເມື່ອກ່ອນຍັງປະຖົມປະຖານ ອາໄສທຳມະຊາດເປັນຕົ້ນຕໍ. ມາຮອດປັດຈຸບັນ ໂດຍການເອົາໃຈໃສ່ ຂອງອຳນາດການປົກຄອງທຸກຂັ້ນ ໄດ້ເຮັດໃຫ້ລະບົບພື້ນຖານໂຄງລ່າງ ໄດ້ຮັບການປັບປຸງດີຂຶ້ນ, ເສັ້ນທາງທຽວໄປມາຫາສູ່ມີຄວາມສະດວກສະບາຍ, ຕາຄ່າຍໄຟຟ້າເຂົ້າເຖິງປະຊາຊົນກວມ 86% ຂອງຈຳນວນບ້ານທັງໝົດ, ຊີວິດການເປັນຢູ່ຂອງປະຊາຊົນ ມີການປັບປຸງດີຂຶ້ນ ສະເລ່ຍລາຍຮັບຕໍ່ຫົວຄົນ ແມ່ນເກີນ 180.000 ກີບຕໍ່ຄົນຕໍ່ເດືອນ ໃນມາດຖານການຫລຸດພົ້ນອອກຈາກຄວາມທຸກຍາກ ໃນເຂດຊົນນະບົດ, ການຂະຫຍາຍລະບົບການສຶກສາ, ສາທາລະນະສຸກ, ໂຮງຮຽນ, ໂຮງໝໍ, ສຸກສາລາ ແມ່ນເຂົ້າເຖິງທຸກກຸ່ມບ້ານພາຍໃນເມືອງ. ພາຍຫລັງທີ່ໄດ້ມີການ ປະເມີນຄວາມທຸກຍາກ ຈາກຄະນະພັກ, ອຳນາດການປົກຄອງເມືອງບົວລະພາ ເລີ່ມແຕ່ປີ 2010 ເປັນຕົ້ນມາຮອດ ປັດຈຸບັນ ເຫັນໄດ້ວ່າ ເມືອງບົວລະພາ ແມ່ນມີມາດຖານ, ເງື່ອນໄຂຄົບຖ້ວນ ຕາມມາດຖານຂອງການປະກາດເປັນເມືອງພົ້ນທຸກ.
ແຫລ່ງຂ່າວ:
ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!