ວັນທີ 22 ເມສາ 2016 ຜ່ານມາທີ່ທົ່ງນາໄໝທາງຫ້ອງການກະສິກຳ ແລະປ່າໄມ້ເມືອງ ແລະ ແຂວງໄຊຍະບູລີ ໄດ້ພ້ອມກັນປ່ອຍແຕນບຽນ ເພື່ອກຳຈັດສັດຕູພືດໃນນາເຂົ້າໂດຍໃຫ້ກຽດເຂົ້າຮ່ວມຂອງທ່ານ ບຸນເສັງ ວົງສະນິດ, ຮອງເຈົ້າເມືອງໄຊຍະບູລີ, ຫົວໜ້າ, ຮອງຫົວໜ້າຫ້ອງການພ້ອມດ້ວຍພະນັກງານວິຊາການພາຍໃນຫ້ອງການ ເຂົ້າຮ່ວມ.
ທ່ານ ແສງຄຳ ວິລະໄຊ, ຫົວໜ້າຫ້ອງການກະສິກຳ ແລະ ປ່າໄມ້ເມືອງ ໄຊຍະບູລີ ໄດ້ໃຫ້ສຳພາດວ່າ: ການປ່ອຍແຕນບຽນໃນຄັ້ງນີ້ກໍແມ່ນເພື່ອກຳຈັດສັດຕູພືດຂອງເຂົ້າໃນນາເປັນຕົ້ນແມ່ນກຳຈັດປະເພດດ້ວງກໍ, ແມງແຄງ ຂາຍາວທີ່ອາໃສດູດກິນນ້ຳລ້ຽງຂອງຕົ້ນເຂົ້າ, ເພື່ອເພີ່ມປະຊາກອນຂອງແມງໄມ້ທີ່ກຳຈັດສັດຕູພືດໃຫ້ສາມາດ ຄວບຄຸມສັດຕູພືດທີ່ເປັນອັນຕະລາຍຕໍ່ເຂົ້າໃນທົ່ງນາໜ້ອຍລົງ, ຮັບປະກັນການກຳຈັດແມງໄມ້ໂດຍສະເພາະຫຼີກເວັ້ນໃນການໃຊ້ສານເຄມີເພື່ອຕອບສະໜອງທາງດ້ານນະໂຍບາຍເປັນຕົ້ນແມ່ນກະສິກຳສະອາດ, ກະສິກຳອິນຊີ ແລະໃນຕໍ່ໜ້ານີ້ຍັງຈະສຶບຕໍ່ປ່ອຍແມງໄມ້ດັ່ງກ່າວເພື່ອໃຫ້ປະຊາກອນຂອງແມງໄມ້ເພີ່ມຂຶ້ນ, ເພື່ອເຮັດໃຫ້ສັດຕູພືດທີ່ທຳລາຍເຂົ້າໃນນາໃຫ້ຫຼຸດໜ້ອຍຖອຍລົງເທື່ອລະກ້າວ.
ແນວໃດກໍດີການປ່ອຍແຕນບຽນໃນຄັ້ງນີ້ແມ່ນເປັນການທົດລອງຖ້າຫາກວ່າໄດ້ຜົນທາງບວກທາງພະນັກງານທີ່ກ່ຽວຂ້ອງຂອງເມືອງດັ່ງກ່າວກໍຈະສືບຕໍ່ຂະຫຍາຍເນື້ອທີ່ການປ່ອຍໃຫ້ກວ້າງຕໍ່ໄປອີກ.
ແຕນບຽນ (ໄຕຣໂກກຣາມມາ) ເປັນແມງໄມ້ນ້ອຍໆຊະນິດໜຶ່ງທີ່ບໍ່ສາມາດເບິ່ງດ້ວຍຕາເປົ່າໂດຍໃຊ້ກ້ອງຊ່ອງ ຈິ່ງເຫັນຊັດເຈນ ແລະ ອີກຢ່າງໜຶ່ງກໍແມ່ນເປັນແມງໄມ້ທີ່ອາໄສໂຕອື່ນເປັນການຂະຫຍາຍຕົວ ຫຼື ຈະເລີນເຕີບໂຕ.
ທີ່ມາ: