ວັນທີ 25 ເມສາຜ່ານມາ ທີ່ສະຖາບັນການທະນາຄານກົມນະໂຍບາຍທະນາຄານແຫ່ງ ສປປ ລາວ ໄດ້ຈັດສຳມະນາຂຶ້ນໃນຫົວຂໍ້“ ຫຼັກການສັງລວມສະຖິຕິເງິນຕາ-ການເງິນຕາມມາດຕະຖານສາກົນ” ໂດຍພາຍໃຕ້ການເຂົ້າຮ່ວມຂອງທ່ານ ນາງ ຟອງຈິນດາ ແສງສຸລິວົງ ຮອງຫົວໜ້າກົມນະໂຍບາຍເງິນຕາ, ມບັນດາກົມກ່ຽວຂ້ອງພາຍໃນ ທຫລ ແລະ ສາຂາ ທຫລ, ບັນດາທະນາຄານທຸລະກິດ, ສະຖາບັນການເງິນຕ່າງໆ, ບັນດາກະຊວງເປັນຕົ້ນກະຊວງແຜນການ ແລະ ການລົງທຶນ, ກະຊວງການເງິນ ແລະມະຫາວິທະຍາໄລແຫ່ງຊາດເຂົ້າຮ່ວມ.
ທ່ານ ນາງ ຟອງຈິນດາ ແສງສຸລິວົງ ກ່າວວ່າ: ໂດຍສືບຕໍ່ແຜນງານໂຄງການພັດທະນາສ້າງຂີດຄວາມສາມາດທາງດ້ານສະຖິຕິ (LAOSTAT ) ພາຍໃຕ້ການຊ່ວຍເຫຼືອຈາກທະນາຄານໂລກ, ກົມນະໂຍບາຍເງິນຕາກໍຄື ທຫລ ຈິ່ງໄດ້ຈັດສຳມະນາຂຶ້ນໃນຫົວຂໍ້ “ ຫຼັກການສັງລວມສະຖິຕິເງິນຕາ-ການເງິນ ຕາມມາດຕະຖານສາກົນ” ຊຶ່ງການຈັດສຳມະນາຄັ້ງນີ້ຈະໄດ້ດຳເນີນເປັນເວລາ 5 ວັນ ນັບແຕ່ວັນທີ 25-29 ເມສາ 2016.
ການສຳມະນາໃນຄັ້ງນີ້ ແມ່ນຈະລົງເລິກຫຼັກການສັງລວມສະຖິຕິເງິນຕາ-ການເງິນປະກອບມີຄວາມເປັນມາ ແລະ ຄວາມສຳຄັນຂອງສະຖິຕິເງິນຕາ, ອົງປະກອບຂອງສະຖິຕິເງິນຕາ-ການເງິນ, ການນຳສະເໜີແບບລາຍງານ ແລະວິທີເກັບກຳສະຖິຕິ, ບັນດາເນື້ອໃນຕ່າງຈະຖືກບັນຍາຍໂດຍພະແນກສະຖິຕິເງິນ-ການເງິນກົມນະໂຍບາຍເງິນຕາພ້ອມດຽວກັນນັ້ນທາງຄະນະຍັງໄດ້ເຊີນໃຫ້ພາກສ່ວນທີ່ເຂົ້າຮ່ວມການສຳມະນາຄັ້ງນີ້ ນຳສະເໜີແບບລາຍງານຂອງຕົນທີ່ຕິດພັນກັບສະຖິຕິເງິນຕາ-ການເງິນ.
ໂດຍປະຈຸບັນ ບັນດາປະເທດສະມາຊິກຂອງກອງທຶນສາກົນສ່ວນໃຫຍ່ໄດ້ມີການສັງລວມສະຖິຕິເງິນຕາ-ການເງິນຕາມຄູ່ມືການສັງລວມສະຖິຕິເງິນຕາ-ການເງິນ ປີ 2000 ຂອງ IMF ຊຶ່ງມີຄວາມສອດຄ່ອງກັບຄູ່ມືການສັງລວມບັນຊີແຫ່ງຊາດ ປີ 1993 ຂອງສະຫະປະຊາຊາດ, ສຳລັບ ສປປ ລາວ ແມ່ນກຳລັງຢູ່ໃນໄລຍະຫັນມາສັງລວມສະຖິຕິເງິນຕາ-ການເງິນ ຕາມຄູ່ມືປີ 2000 ຊຶ່ງການສັງລວມຂໍ້ມູນຕາມຂໍ້ມູນດັ່ງກ່າວຈະມີຄວາມລະອຽດກວ່າເກົ່າ.
ທີ່ມາ: