ລັດຖະມົນຕີຕ່າງປະເທດສະຫະລັດ ທ່ານ John Kerry ກ່າວວ່າ ສະຫະລັດ ຈະທຳທຸກວິທີທາງເທົ່າທີ່ເປັນໄປໄດ້
ເພື່ອປ່ອຍນັກຮຽນຍິງ 276 ຄົນ ທີ່ຖືກລັກພາໂຕໄປ ໂດຍກຸ່່ມຫົວຮຸນແຮງ Boko Haram ຂອງໄນຈີເຣຍ.
ໃນການຖະແຫຼງທີ່ນະຄອນຫລວງວໍຊິງຕັນ ໃນວັນພະຫັດນີ້ ທ່ານ Kerry ກ່າວວ່າ ທີ່ປຶກສາທາງດ້ານທະຫານ
ຂອງສະຫະລັດ ໄດ້ໄປເຖິງໄນຈີເຣຍແລ້ວ ເພື່ອໃຫ້ການຊ່ວຍເຫລືອດ້ານສື່ສານ ພະລາທິການ ແລະການສືບລັບ.
ທ່ານ Kerry ກ່າວວ່າ ຄະນະປະຕິບັດງານ ຂອງພວກເຮົາໄປເຖິງໄນຈີເຣຍ ແລ້ວແລະ ເຂົາເຈົ້າຈະປະຕິບັດງານ
ຮ່ວມກັບລັດຖະບານໄນຈີເຣຍຂອງປະທານາທິບໍດີ Goodluck Jonathan ເພື່ອປະຕິບັດທຸກສິ່ງຢ່າງ
ທີ່ເຮົາສາມາດເຮັດໄດ້ ໃນການນຳເອົາພວກເດັກຍິງ ກັບຄືນມາສູ່ຄອບຄົວແລະປະຊາຄົມຂອງເຂົາ
ເຈົ້າ.ພວກເຮົາຍັງຈະປະຕິບັດທຸກສິ່ງຢ່າງທີ່ເປັນໄປໄດ້ ເພື່ອຮັບມືກັບການຂົ່ມຂູ່ ຂອງກຸ່ມ Boko Haram.
ຢ່າງໜ້ອຍມີສາມປະເທດແລ້ວ ໄດ້ປະກາດໃຫ້ການຊ່ວຍເຫລືອແກ່ໄນຈີເຣຍໃນ ການຊອກຫາພວກ
ເດັກນ້ອຍເຫຼົ່ານີ້. ອັງກິດ ໄດ້ໃຫ້ຄຳໝັ້ນສັນຍາ ທີ່ຈະຊ່ວຍເຫລືອ ຮູບພາບຈາກດາວທຽມ
ໃນຂະນະທີ່ຝຣັ່ງ ກ່າວວ່າ ຈະສົ່ງໜ່ວຍຮັກສາຄວາມປອດໄພໄປຊ່ວຍ.
ໃນການຖະແຫລງ ຕໍ່ກອງປະຊຸມສຸດຍອດເສດຖະກິດໂລກ ໃນວັນພະຫັດວານນີ້ທີ່ນະຄອນ Abuja
ປະທານາທິບໍດີໄນຈີເຣຍທ່ານ Goodluck Jonathan ໄດ້ ຂອບໃຈຕໍ່ຈີນ ຊຶ່ງເປັນປະເທດຫລ້າສຸດ
ທີ່ໃຫ້ຄຳໝັ້ນສັນຍາຈະຊ່ວຍເຫຼືອໃນການ ຊອກຫາພວກເດັກຍິງ.
ທ່ານກ່າວວ່າ ບັນດາຜູ້ເຂົ້າຮ່ວມກອງປະຊຸມ ໄດ້ສະແດງການສະໜັບສະໜູນແກ່ ໄນຈີເຣຍ
ແລະເປັນການສ້າງ ຄວາມເສຍຫາຍຢ່າງໜັກ ແກ່ພວກກໍ່ການຮ້າຍ. ທ່ານກ່າວວ່າ
ຖ້າຫາກບັນດາຜູ້ຕາງໜ້າບໍ່ໄປຮ່ວມກອງປະຊຸມ ພວກຫົວຮຸນແຮງ ກໍຈະພາກັນ
ສະເຫຼີມສະຫລອງ ແລະ ກໍ່ຄວາມວຸ້ນວາຍຕື່ມອີກ.