ກອງປະຊຸມໄດ້ເຊື່ອມຊຶມວ່າດ້ວຍການປ້ອງກັນ ແລະ ສະກັດກັ້ນການລະບາດຂອງພະຍາດໄຂ້ຍູງລາຍທີ່ຄາດວ່າຈະເກີດຂຶ້ນໃນປີ 2016 ຜ່ານແຈ້ງການຂອງກົມພະຍາດຕິດຕໍ່ ເລກທີ 402/ກຄພຕ ແລະ ຮັບຟັງການສະຫຼຸບລາຍງານການເຝົ້າລະວັງ ແລະ ລາຍງານໝວດອາການຂອງພະຍາດໄຂ້ຍູງລາຍ ແຕ່ອາທິດທີ 1 ຫາອາທິດທີ 17 ປີ 2016 ໃຫ້ຮູ້ວ່າ ພະຍາດໄຂ້ຍູງລາຍຍັງເປັນບັນຫາຂອງຂົງເຂດສາທາລະນະສຸກ ໂດຍສະເພາະແຂວງເຊກອງ ຍັງມີກໍລະນີໄຂ້ຍູງລາຍແຜ່ລາມອອກເປັນວົງກວ້າງ ເຊິ່ງມັກພົບໃນໂຕເມືອງ ຊານເມືອງເປັນສ່ວນໃຫຽ່ ແລະ ເຂດຫ່າງໄກສອກຫຼີກຂອງແຂວງ ເຊິ່ງຈະໄດ້ປະຕິບັດການເຝົ້າລະວັງເປັນຕົ້ນ ເຝົ້າລະວັງ ລາຍງານ ແລະ ຕອບໂຕ້ ການເຝົ້າລະວັງ ຄວບຄຸມ ປິ່ນປົວ ແລະ ຄວບຄຸມໜອນນໍ້າຍູງລາຍ ປິ່ນປົວ ແລະ ລະວັງກໍລະນີ ວຽກໂຄສະນາສຸຂະສຶກສາ ແລະ ວຽກງານປະສານງານ ໂດຍຈັດກອງປະຊຸມເພື່ອທົບທວນບັນຫາໄຂ້ຍູງລາຍທົ່ວແຂວງ ຄັ້ງວັນທີ 21 ມັງກອນ 2016 ໃນນັ້ນ ໄດ້ແບ່ງຄວາມຮັບຜິດຊອບກໍລະນີໄຂ້ຍູງລາຍເຊັ່ນ ເມືອງທ່າແຕງ ບໍ່ເກີນ 10 ກໍລະນີ ເມືອງດາກຈຶງ ບໍ່ເກີນ 5 ກໍລະນີ ເມືອງກະລຶມ ບໍ່ເກີນ 20 ກໍລະນີ ແລະ ເມືອງລະມາມ ບໍ່ເກີນ 45 ກໍລະນີ ທັງໝົດແມ່ນບໍ່ໃຫ້ເສຍຊີວິດ ການຄວບຄຸມ ແລະ ປິ່ນປົວໂດຍການກະກຽມສະຖານທີ່ ພະນັກງານ ຢາ ແລະ ອຸປະກອນການແພດ ຕາມສະຖານທີ່ບໍລິການຂອງລັດ ເພື່ອປິ່ນປົວຄົນເຈັບທີ່ເປັນໄຂ້ຍູງລາຍ ລົງຕິດຕາມ-ຊຸກຍູ້ບັນດາເມືອງຕ່າງໆດ້ວຍການເຝິກອົບຮົມ ເຮັດການເຝົ້າລະວັງໃນໂຮງໝໍ ແລະ ເຝົ້າລະວັງໃນຫ້ອງວິເຄາະ (ອາທິດລະຄັ້ງ) ວຽກງານໂຄສະນາສຶກສາແມ່ນໄດ້ປັບປຸງຄະນະກໍາມະການເພື່ອສຸຂະພາບຂັ້ນແຂວງ ແລະ ເມືອງ ລົງໂຄສະນາສຸຂະສຶກສາຕາມບ້ານທີ່ມີການລະບາດໂດຍປະຕິບັດ 5 ປ ອອກແຈ້ງການ ແລະ ອອກຂ່າວທາງວິທະຍຸຂອງແຂວງ ອາທິດລະ 3 ຄັ້ງ ເຮັດປ້າຍໂຄສະນາ 5 ປ 5 ປ້າຍ ພ້ອມທັງປຸກລະດົມປະຊາຊົນ ພະນັກງານ ລ້ຽງປາຫາງນົກຍູງເປັນຕົ້ນ ທ່ານ ດຣ. ຄໍາໄຫຼ ສັນຕິພູມ ຮອງຫົວໜ້າພະແນກສາທາລະນະສຸກແຂວງເຊກອງລາຍງານ.

ທ່ານຮອງພະແນກສາທາລະນະສຸກລາຍງານຕື່ມອີກວ່າ ການລາຍງານພະຍາດໄຂ້ຍູງລາຍສ່ວນໃຫຽ່ແມ່ນມາຈາກເຂດຊານເມືອງ ແລະ ເຂດຊົນນະບົດ ທີ່ມີອາຊີບຊາວໄຮ່ນາ ສໍາລັບປີ 2016 ແມ່ນຍັງບໍ່ສາມາດເວົ້າໄດ້ ຈະມີການລະບາດ ຫຼື ບໍ່ ເພາະວ່າຈາກຜົນການວິເຄາະໂຕຈິງພົບເຊື້ອໄຂ້ຍູງລາຍ 2 ກໍລະນີໃນໄລຍະເດືອນມີນາ ແລະ ໄລຍະນີ້ພວມກ້າວເຂົ້າສູ່ລະດູຝົນ ເຖິງແມ່ນວ່າພວກເຮົາຈະມີການຈັດຕັ້ງ ກະກຽມເຝົ້າລະວັງ ແລະ ມີການປະກອບສ່ວນຈາກຫຼາຍພາກສ່ວນຂອງສັງຄົມກໍຕາມ ຖ້າທຸກຄົນບໍ່ເປັນເຈົ້າການແຕ່ຫົວທີ ກໍມີໂອກາດລະບາດໄດ້ ສະນັ້ນ ເພື່ອເປັນການຫຼຸດຜ່ອນອັດຕາການເຈັບເປັນຍ້ອນພະຍາດໄຂ້ຍູງລາຍໃນລະດັບທີ່ສາມາດຄວບຄຸມໄດ້ ແລະ ການແຜ່ລາມອອກໄປເປັນວົງກວ້າງ ຈິ່ງຮຽກຮ້ອງມາຍັງບັນດາພະນັກງານທຸກຂັ້ນຕ້ອງເອົາໃຈໃສ່ຄົ້ນຫາ ແລະ ລາຍງານທຸກກໍລະນີ ທີມງານຕອບໂຕ້ໄວຕ້ອງໄດ້ລົງສອບສວນພ້ອມເກັບໂຕຢ່າງພາຍໃນ 24-48 ຊົ່ວໂມງ ຮຽກຮ້ອງບັນດາພໍ່ແມ່ປະຊາຊົນຊ່ອຍກັນກໍາຈັດແຫຼ່ງເພາະພັນຍູງລາຍ ແລະໜອນນໍ້າ ຕິດຕາມການເຕືອນທ່າອຽງຂອງຍູງລາຍເປັນລາຍວັນ ສືບຕໍ່ປະສານງານຂໍການສະໜັບສະໜູນຈາກລັດ ອໍານາດການປົກຄອງ ແລະ ອົງການຈັດຕັ້ງສາກົນທຸກຂັ້ນ.

ຂ່າວ/ພາບ: ນາລີວັນ

ແຫລ່ງຂ່າວຈາກ: ສຳນັກຂ່າວເອບີຊີ