ປະຊາຊົນແລະນັກທ່ອງທ່ຽວແຫ່ສັກກາລະ ພະພຸດທະຮູບເກົ່າແກ່ ທີ່ພົບເຫັນໃນວັດຊຽງທອງ
ແຫຼ່ງຂ່າວຈາກຫຼວງພະບາງລາຍງານໃຫ້ຮູ້ວ່າ ປະຊາຊົນແລະນັກທ່ອງທ່ຽວ ແຫ່ກັນໄປຂາບໄຫວ້, ຫົດສົງ ແລະສັກກາລະບູຊາ ພະພຸດທະຮູບເກົ່າແກ່ຈຳນວນ 11 ອົງ ທີ່ພົບໃນພະທາດນ້ອຍໜ້າສິມວັດຊຽງທອງ ທີ່ເພພັງພັງລົງຍ້ອນຖືກຕົ້ນໂພຫັກທັບ ຍ້ອນລົມພາຍຸລະດູຮ້ອນໃນວັນທີ 22 ເມສາ 2016 ທີ່ຜ່ານມາ.
ລາຍງານຂ່າວກ່າວວ່າ ທາງວັດແລະເຖົ້າແກ່ແນວໂຮມ ໄດ້ອາລາທະນາເອົາພະພຸດທະຮູບຈຳນວນດັ່ງກ່າວລົງໃຫ້ຜູ້ສັດທາໄດ້ຂາບໄຫວ້ໃນຕອນກາງເວັນ ແລ້ວອາລາທະນາກັບຂຶ້ນປະດິດສະຖານໄວ້ໃນບ່ອນທີ່ປອດໄພໃນຕອນກາງຄືນ.
ສ່ວນການຫົດສົງພະມ່ານນັ້ນແມ່ນຈະເປີດໃຫ້ຫົດສົງໄດ້ທັງກາງເວັນແລະກາງຄືນ ຈົນຮອດວັນທີ 27 ເມສາ 2016 ຈຶ່ງຈະໄດ້ອາລາທະນາກັບຂຶ້ນໄປປະດິດສະຖານໄວ້ໃນຫໍພະມ່ານ ໃນເວລາ 4 ໂມງແລງ.
