ກອງປະຊຸມນຳສະເໜີບົດຮຽນ ທີ່ຖອດຖອນໄດ້ຈາກໂຄງການສົ່ງເສີມກະສິກຳ ແລະ ທັງເປັນກອງປະຊຸມປິດໂຄງການດັ່ງກ່າວ ຈັດຂຶ້ນວັນທີ 8 ພຶດສະພາ 2014 ທີ່ໂຮງແຮມລາວພລາຊາ ໂດຍມີທ່ານ ດຣ. ເພັດ ພົມພິພັກ ລັດຖະມົນຕີຊ່ວຍວ່າການ ກະຊວງກະສິກຳ ແລະ ປ່າໄມ້ ທ່ານ ດຣ. ນາງ ລິລຽນ ອໍເຕກາ ຮອງຫົວໜ້າອົງການພັດທະນາ ແລະ ຮ່ວມມືແຫ່ງປະເທດສະວິດ ປະຈຳ ສປປ ລາວ ມີບັນດາຫົວໜ້າກົມ-ຮອງກົມ ຫົວໜ້າພະແນກ ແລະ ຮອງຫົວໜ້າພະແນກກະສິກຳ ແລະ ປ່າໄມ້ຈາກ 17 ແຂວງ ແລະ ແຂກຖືກເຊີນເຂົ້າຮ່ວມ.
ໂອກາດນີ້ ທ່ານລັດຖະມົນຕີຊ່ວຍວ່າການ ກະຊວງກະສິກຳ-ປ່າໄມ້ ກ່າວວ່າ: ກອງປະຊຸມແມ່ນມີຄວາມໝາຍສຳຄັນຢ່າງຍິ່ງ ຕໍ່ການພັດທະນາວຽກງານສົ່ງເສີມກະສິກຳ ແລະ ສະຫະກອນຂອງ ສປປ ລາວ ໃນອະນາຄົດ ຍ້ອນວ່າບົດຮຽນທີ່ຖອດຖອນ ໄດ້ຈາກການຈັດຕັ້ງປະຕິບັດໂຄງການສົ່ງເສີມກະສິກຳ (LEAP) ທີ່ໄດ້ດຳເນີມມາຫຼາຍກວ່າ 1 ທົດສະວັດ ແມ່ນຈະໄດ້ນຳສະເໜີແລກປ່ຽນບົດຮຽນໃນກອງປະຊຸມເທື່ອນີ້ ແລະ ສິ່ງໃດດີ ຫຼື ພົ້ນເດັ່ນ ກໍ່ຈະໄດ້ພ້ອມກັນສືບຕໍ່ຜັນຂະຫຍາຍ ແລະ ສິ່ງໃດທີ່ຍັງເປັນຂໍ້ຈຳກັດ ຕໍ່ການພັດທະນາວຽກງານສົ່ງເສີມກະສິກຳ ກໍ່ຕ້ອງໄດ້ພ້ອມກັນຊອກວິທີແກ້ໄຂປັບປຸງໃຫ້ດີຂຶ້ນໃນຕໍ່ໜ້າ.
ຕະຫຼອດໄລຍະຫຼາຍກວ່າ 1 ທົດສະວັດທີ່ຜ່ານມາ ສະຖານະພາບການສົ່ງເສີມກະສິກຳ ແລະ ການບໍລິການສົ່ງເສີມແກ່ຊາວກະສິກອນ ໄດ້ຮັບການປັບປຸງດີຂຶ້ນເປັນກ້າວໆ ຊາວກະສິກອນໄດ້ຮັບຂໍ້ມູນຂ່າວສານດ້ານເຕັກນິກຈາກຫຼາຍຮູບແບບ ແລະ ປະກອບສ່ວນຫຼຸດຜ່ອນຄວາມທຸກຍາກໃຫ້ແກ່ປະຊາຊົນບັນດາເຜົ່າ ທີ່ຫ່າງໄກສອກຫຼີກ ນອກຈາກນັ້ນ ກໍ່ໄດ້ມີການສ້າງລະບົບສົ່ງເສີມຂອງລາວຂຶ້ນ (LEA) ແລະ ປັບປຸງໂຄງຮ່າງການຈັດຕັ້ງວຽກງານສົ່ງເສີມກະສິກຳ ແຕ່ສູນກາງຮອດທ້ອງຖິ່ນ ລວມທັງບັນດາສູນບໍລິການເຕັກນິກກະສິກຳຕ່າງໆ ໃນຂອບເຂດທົ່ວປະເທດ.
ທີ່ມາ http://www.vientianemai.net/teen/khao/1/11763