ມາຮອດປັດຈຸບັນນີ້ ໄດ້ມີຫຼາຍກວ່າ 40 ຫົວໜ່ວຍທຸລະກິດ ທັງພາຍໃນ ແລະ ຕ່າງປະເທດ ໄດ້ມາລົງທຶນສ້າງຕັ້ງບໍລິສັດ ແລະ ໂຮງຈັກ-ໂຮງງານຢູ່ພື້ນທີ່ນິຄົມອຸດສາຫະກຳ ແລະ ການຄ້າ ໂນນທອງ ເມືອງໄຊທານີ ນະຄອນຫຼວງວຽງຈັນ ອັນໄດ້ເຮັດໃຫ້ບັນຍາກາດການລົງທຶນຢູ່ບໍລິເວນດັ່ງກ່າວມີຄວາມຄຶກຄື້ນ ແລະ ໄດ້ສ້າງວຽກເຮັດງານທຳໃຫ້ແກ່ແຮງງານລາວເປັນຈຳນວນບໍ່ໜ້ອຍ ໃນນັ້ນ ກໍ່ມີບໍລິສັດ ຫົງເກັງ ຟື້ນຟູປຸງແຕ່ງຊັບພະຍາກອນໂລຫະ ຈຳກັດ ຂອງນັກທຸລະກິດຈີນ ທີ່ເປັນບໍລິສັດໜຶ່ງດຳເນີນທຸລະກິດປຸງແຕ່ງຊືນຈາກໝໍ້ໄຟເກົ່າ ເສດໂລຫະຊືນ ຂາງ ຢາງ ທອງ ແຜ່ນວົງຈອນຂອງເອເລັກໂຕຣນິກເກົ່າ ໃຊ້ງານແລ້ວ ແລະ ໂລຫະອື່ນໆ ທີ່ນຳເຂົ້າຈາກຕ່າງປະເທດ ແລະ ພາຍໃນຈຳນວນໜຶ່ງ ເພື່ອມາຜະລິດແລ້ວສົ່ງອອກໄປຕ່າງປະເທດ.
ທ່ານ ໂຈຈຽງຊຸຍ ຜູ້ອຳນວຍການບໍລິສັດ ຫົງເກັງ ຟື້ນຟູປຸງແຕ່ງຊັບພະຍາກອນໂລຫະ ຈຳກັດ ໄດ້ໃຫ້ສຳພາດວ່າ: ບໍລິສັດໄດ້ດຳເນີນທຸລະກິດມາແຕ່ປີ 2015 ເປັນຕົ້ນມາ ເຊິ່ງດຳເນີນທຸລະກິດຫຼອມຊືນສຳເລັດຮູບ ແລະ ບົດຢາງ ສົ່ງອອກຕ່າງປະເທດ ສຳລັບວັດຖຸດິບທີ່ນຳມາຜະລິດແມ່ນປະເພດໝໍ້ໄຟເກົ່າທີ່ນຳເຂົ້າຈາກ ຕ່າງປະເທດ ແລະ ຢູ່ພາຍໃນປະເທດຈຳນວນໜຶ່ງ ມາແຍກເປັນຊິ້ນສ່ວນແລ້ວນຳມາຫຼອມ ເພື່ອຜະລິດເປັນຜະລິດຕະພັນສຳເລັດຮູບສົ່ງອອກຕ່າງປະເທດ ຜະລິດຕະພັນຊືນ ສາມາດຜະລິດໄດ້ສະເລ່ຍ 30 ໂຕນຕໍ່ມື້ ຫຼື ປະມານ 10.000 ໂຕນຕໍ່ປີ ແລະ ຢາງບົດ 10 ໂຕນຕໍ່ມື້ ນອກຈາກນີ້ ຍັງສາມາດຜະລິດເສດຂີ້ເທົ່າທີ່ໄດ້ຈາກການເຜົາໄໝ້ ສະໜອງໃຫ້ໂຮງງານຜະລິດຊີມັງຢູ່ລາວ ເພື່ອປະສົມກັບຊີມັງ ໄດ້ປະມານ 1,6 ໂຕນຕໍ່ມື້ ໃນວັດຖຸດິບທີ່ເປັນໝໍ້ໄຟເກົ່າ 1 ໂຕນ ຈະຜະລິດໄດ້ຊືນ 63% ຢາງບົດ 8% ແລະ ຝຸ່ນຂີ້ເທົ່າ 29% ພາຍໃນບໍລິສັດ ມີແຮງງານປະມານ 40 ຄົນ ໃນນັ້ນເປັນແຮງງານຄົນລາວປະມານ 80% ອັນໄດ້ສ້າງວຽກເຮັດງານທຳ ແລະ ລາຍຮັບໃຫ້ແກ່ປະຊາຊົນລາວ.
ທ່ານ ໂຈຈຽງຊຸຍ ຍັງກ່າວຕື່ມວ່າ: ຕໍ່ກັບບັນຫາສິ່ງແວດລ້ອມ ທາງບໍລິສັດໄດ້ປະຕິບັດຕາມກົດໝາຍສິ່ງແວດລ້ອມຂອງ ສປປ ລາວ ຢ່າງເຂັ້ມງວດ ໂດຍໄດ້ນຳໃຊ້ອຸປະກອນທີ່ທັນສະໄໝ ເຂົ້າໃນການກັ່ນຕອງມົນລະພິດຈາກໂຮງງານ ບໍ່ວ່າຈະເປັນຄວັນ ສຽງ ແລະ ນ້ຳເປື້ອນຈາກໂຮງງານ ດ້ວຍການກັ່ນຕອງຫຼາຍຂັ້ນຕອນຜ່ານລະບົບຕ່າງໆ ເປັນຕົ້ນກໍ່ແມ່ນລະບົບນ້ຳ ເຮັດໃຫ້ຄວັນທີ່ປ່ອຍອອກຈາກໂຮງງານເປັນສີຂາວ ລະບົບກິ່ນມີໜ້ອຍທີ່ສຸດ ນ້ຳເປື້ອນໄດ້ຮັບການບຳບັດຢູ່ພາຍໃນໂຮງງານເປັນນ້ຳສະອາດ ເພື່ອໝູນໃຊ້ຕໍ່ ສ່ວນທີ່ເຫຼືອໃຊ້ປ່ອຍອອກຈາກໂຮງງານ ໄປສູ່ຄອງລະບາຍນ້ຳທີ່ຢູ່ໃນເຂດບໍລິເວນພື້ນທີ່ນິຄົມກໍ່ມີໜ້ອຍ ທີ່ສຸດ ແລະ ນ້ຳເປື້ອນທີ່ປ່ອຍໄປກໍ່ບໍ່ມີສານພິດທີ່ຕົກຄ້າງ ທີ່ຈະເປັນຜົນກະທົບຕໍ່ສິ່ງແວດລ້ອມອ້ອມຂ້າງແຕ່ຢ່າງໃດ ເປັນຕົ້ນ ຕໍ່ປະຊາຊົນທີ່ອາໄສຢູ່ອ້ອມຂ້າງ ແລະ ຕໍ່ພື້ນທີ່ການຜະລິດກະສິກຳຂອງຊາວກະສິກອນ ນອກຈາກນີ້ແລ້ວ ທາງບໍລິສັດຍັງໄດ້ເອົາໃຈໃສ່ເນັ້ນຄວາມສະອາດຢູ່ພາຍໃນໂຮງງານ ເພື່ອບໍ່ໃຫ້ມີຜົນກະທົບຕໍ່ສຸຂະພາບຂອງແຮງງານກຳມະກອນທີ່ເຮັດ ວຽກຢູ່ບໍລິສັດ ແລະ ຜ່ານມາກໍ່ມີຫຼາຍພາກສ່ວນກ່ຽວຂ້ອງຂອງລັດ ແລະ ອຳນາດການປົກຄອງທ້ອງຖິ່ນ ໄດ້ມາກວດກາຕິດຕາມບັນຫາສິ່ງແວດລ້ອມຢ່າງເປັນປະຈຳ ແລະ ກໍ່ໄດ້ຄຳຕອບວ່າລະບົບການຜະລິດຂອງໂຮງງານແມ່ນໄປຕາມຂັ້ນຕອນ ບໍ່ມີຜົນກະທົບຕໍ່ສິ່ງແວດລ້ອມອ້ອມຂ້າງແຕ່ຢ່າງໃດ ຈຶ່ງເຮັດໃຫ້ທຸລະກິດຂອງໂຮງງານດຳເນີນກິດຈະການມາຮອດປັດຈຸບັນນີ້.
ແຫລ່ງຂ່າວ:
