ຕາມ​ຂ່າວ​ສານ​ຫວຽດ​ນາມລາຍ​ງານ​ວ່າ ​ໃນວັນ​ທີ 18 ເມ​ສາ 2016 ທີ່​ຜ່ານ​ມາ ກອງ​ປະ​ຊຸມ​ຄັ້ງ​ທີ 4 ກ່ຽວກັບ ສັນ​ຍາ​ ການຮ່ວມມື ດ້ານ​ການ​ຄ້າ​ ໃນ​ພາກ​ພື້ນ​ ສາມ​ຫລ່ຽ​ມ ​ພັດ​ທະ​ນາ ກຳ​ປູ​ເຈຍ-ລາວ ແລະ ຫວຽດ​ນາມ (ສັນ​ຍາ CLV-DTA) ໄດ້​ຈັດຂຶ້ນ​ຢູ່ ແຂວງ ດັກ​ລັກ ຂ​ອງຫ​ວຽດ​ນາມ ເປັນ​ເວ​ລາ 3 ວັນ. ໂດຍ​ມີ ​ຜູ້​ຕາງ​ໜ້າ​ອົງ​ການ ຈັດ​ຕັ້ງ​ທີ່ ກ່ຽວ​ຂ້ອງ​ຂອງ 3 ປະ​ເທດ​ເຂົ້າ​ຮ່ວ​ມ ເພື່ອ​​ປຶກ​ ສາ​ຫາ​ລື ກ່ຽວກັບການຫລຸດ​ຜ່ອນ ​ມາດຕະການ ດ້ານການຄ້າ ໃຫ້ມີຄວາມ ເປັນເອກະພາບ ກັນຕາມທິດ ຊີ້ນຳຂອງ ທັງສາມປະເທດ. ນອກນີ້ ສັນຍາດັ່ງກ່າວ ຈະຊ່ວຍຊຸກຍູ້ ການແລກປ່ຽນ ດ້ານການຄ້າ, ການຄົມມະນາຄົມ ລະຫວ່າງ ບັນດາແຂວງ ທີ່ຕິດຊາຍແດນ ຮ່ວມກັນ ໃຫ້ກາຍເປັນ ທ່າແຮງໃນການຜະລິດກະສິກຳ ແລະ ເປັນອຸດສາຫະກຳທີ່ເຂັ້ມແຂງຍິ່ງຂຶ້ນ.

ຫຼັງ​ຈາກ​ທີ່​ໄດ້​ຮັບ​ການ​ລົງ​ນາມ ​ແລະ ມີ​ຜົນ​ບັງຄັບ​ໃຊ້​ຂໍ້​ຕົກລົງ​ສະບັບ​ນີ້​ຈະ​ເອື້ອ​ປະ​ໂຫຍ​ດ​ໃຫ້​ແກ່​ການ​ຄ້າຂາຍ​ລະຫວ່າງ​ແຂວງ​ຕ່າງໆ​ຂອງ​ສາມ​ປະ​ເທດ ສ່ວນ​ການ​ເຈລະຈາ​ຄັ້ງ​ນີ້​ຈະ​ຈັດ​ໄປ​ຈົນ​ເຖິງ​ວັນ​ທີ 20 ​ເມສາ​ທີ່​ຈະ​ມາ​ເຖິງ​ນີ້.