ຊາວສວນຢາງພາລາ ຢູ່ແຂວງຈໍາປາສັກດີໃຈ ພາຍຫລັງນັກທຸລະກິດອີລານ ຕົກລົງຈະຊື້ຢາງພາລາປະລິມານ 10.000 ໂຕນຕໍ່ປີ ໃນໄລະຍະ 5 ປີ, ໂດຍບໍລິສັດ ບຸນຖັນສົ່ງເສີມການກະເສດຂາອອກ-ຂາເຂົ້າ ຄົບວົງຈອນຈຳກັດເປັນຜູ້ສະໜອງໃຫ້ນັກທຸລະກິດດັ່ງກ່າວ ຄາດວ່າຈະໄດ້ເລີ່ມສົ່ງຂາຍໃຫ້ອີລານໃນງວດທຳອິດຈຳນວນ 100 ໂຕນໃນທ້າຍເດືອນພຶດສະພາທີ່ຈະມາເຖິງນີ້ ເຊິ່ງຖືວ່າເປັນການສົ່ງອອກຢາງ ໄປປະເທດຕາເວັນອອກກາງ ທາມກາງລາ ຄາຢາງພາລາຕົກຕໍ່າໃນຕະຫລາດໂລກ.
ພິທີລົງນາມສັນຍາຊື້ຂາຍຢາງດັ່ງກ່າວ, ມີຂຶ້ນເມື່ອບໍ່ດົນນີ້ລະຫວ່າງ ທ່ານ ບຸນລົ້ນ ສີລາວົງ ຮອງປະທານບໍລິສັດ ບຸນຖັນສົ່ງເສີມການກະເສດ ຂາອອກ-ຂາເຂົ້າ ຄົບວົງຈອນຈຳກັດ, ຕັ້ງຢູ່ບ້ານໜອງກອກ
ເມືອງບາຈຽງຈະເລີນສຸກ ແຂວງຈຳປາສັກ ແລະ ທ່ານ ຮາເມດເມີໂລຮິ (Hamed Mirlohi) ຮອງປະທານບໍລິສັດ Rahnama Trading ການຄ້າຈໍາກັດແຫ່ງປະເທດອີລານ.
ທ່ານ ບຸນລົ້ນ ສີລາວົງ ກ່າວວ່າ: ການທີ່ອີລານສົນໃຈຮ່ວມທຸລະກິດ ກັບບໍລິສັດພວກເຮົາເພາະເຫັນວ່າຢາງພວກເຮົາ ເປັນຢາງທີ່ມີຄຸນນະພາບ ສາມາດນຳໄປຜະລິດເປັນສິນຄ້າໄດ້ຫລາຍຊະນິດ.ສ່ວນດ້ານລາຄາກໍຖືວ່າມີຄວາມເຫມາະສົມຕາມລາຄາມາດຕະຖານໃນຕະຫລາດໂລກ. ປັດຈຸ ບັນບໍລິສັດພວກເຮົາ ມີເງື່ອນໄຂຮອງຮັບໃຫ້ແກ່ການສົ່ງອອກ ຄືມີໂຮງງານປຸງແຕ່ງສາມາດຜະ ລິດຢາງເປັນແຜ່ນໄດ້ 25 ໂຕນຕໍ່ວັນ ເປັນປະເພດຢາງເຄຣບ ເອີ້ນວ່າເປັນສິນຄ້າເຄິ່ງສຳເລັດຮູບ ເຊິ່ງມີຈຸດດີ ສາມາດນຳໄປຜະລິດເປັນຢາງແທ່ງ, ຢາງຕີນລົດ, ຖົງຢາງອະນາໄມ, ຖົງມືການແພດ ແລະ ອື່ນໆ. ປັດຈຸບັນ ທາງບໍລິສັດພວກເຮົາມີສວນຢາງໃນເນື້ອທີ່ທັງໝົດ 570 ເຮັກຕາ, ໃນອະນາຄົດຕໍ່ໜ້າຖ້າຫາກວ່າການສົ່ງອອກໄປໄດ້ດີ ທາງບໍລິສັດຍັງມີແຜນເກັບຊື້ຈາກພາກສ່ວນຕ່າງໆໃນທົ່ວປະເທດ ເພື່ອການສົ່ງອອກໃນປະລິມານທີ່ເພີ່ມຂຶ້ນ.
ຂ່າວຈາກ: ລາວພັດທະນາ