ທ່ານ ທອງສິງ ທຳມະວົງ, ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ສົ່ງສານເຖິງທ່ານ ຊິນໂຊ ອາເບະ, ນາຍົກລັດຖະມົນຕີ ແຫ່ງ ຍີ່ປຸ່ນ ຕໍ່ເຫດການແຜ່ນດິນໄຫວ ຢູ່ທາງພາກຕາເວັນຕົກສຽງໃຕ້ຂອງຍີ່ປຸ່ນ.
ເນື້ອໃນສານລະບຸວ່າ: ຂ້າພະເຈົ້າ ຮູ້ສຶກເສົ້າສະຫລົດໃຈ ທີ່ໄດ້ຮັບຊາບຂ່າວ ການເກີດແຜ່ນດິນໄຫວຫລາຍຄັ້ງ ຢູ່ ທາງພາກຕາເວັນຕົກສ່ຽງໃຕ້ຂອງ ຍີ່ປຸ່ນ ນັບແຕ່ວັນທີ 14 ເມສາ 2016 ເປັນຕົ້ນມາ ອັນໄດ້ສ້າງຄວາມເສຍຫາຍໃຫ້ແກ່ຊີວິດ, ຊັບສິນ, ອາຄານ ແລະ ລະບົບພື້ນຖານໂຄງລ່າງ ຢູ່ບໍລິເວນດັ່ງກ່າວ ຢ່າງໜັກໜ່ວງ.
ຂ້າພະເຈົ້າ ໃນນາມລັດຖະບານ ແລະ ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຂໍສະແດງຄວາມເຫັນໃຈ ແລະ ແບ່ງເບົາຄວາມທຸກໂສກມາຍັງທ່ານ ແລະ ຜ່ານທ່ານ ໄປຍັງລັດຖະບານ ແລະ ປະຊາຊົນ ຍີ່ປຸ່ນ ໂດຍສະເພາະຜູ້ທີ່ໄດ້ຮັບເຄາະຮ້າຍ ແລະ ຄອບຄົວຂອງເຂົາເຈົ້າ ຈາກເຫດການໄພພິບັດທາງທຳມະຊາດໃນຄັ້ງນີ້.
ຂ້າພະເຈົ້າເຊື່ອໝັ້ນວ່າ ພາຍໃຕ້ຄວາມພະຍາຍາມເອົາໃຈໃສ່ຈາກລັດຖະບານ ຍີ່ປຸ່ນ ໂດຍມີທ່ານ ເປັນຜູ້ຊີ້ນຳ ແລະ ດ້ວຍມູນເຊື້ອແຫ່ງຄວາມສາມັກຄີ ເປັນຈິດໜຶ່ງໃຈດຽວກັນ ຂອງປະຊາຊົນຍີ່ປຸ່ນ ສະພາບການດັ່ງກ່າວຈະໄດ້ຮັບການຟື້ນຟູກັບຄືນສູ່ສະພາບປົກກະຕິໂດຍໄວ.
ຂ່າວຈາກ: ປະເທດລາວ