ຂປລ. ຊາວສວນຢາງພາລາຢູ່ແຂວງຈໍາປາສັກດີໃຈ ພາຍຫລັງນັກທຸລະກິດອີຣ່ານ ຕົກລົງຈະຊື້ຢາງພາລາ ປະລິມານ 10.000 ໂຕນຕໍ່ປີ ໃນໄລະຍະ 5 ປີ, ໂດຍ ບໍລິສັດ ບຸນຖັນສົ່ງເສີມການກະເສດ ຂາອອກ-ຂາເຂົ້າ ຄົບວົງຈອນ ຈຳກັດ ເປັນຜູ້ສະໜອງໃຫ້ນັກທຸລະກິດດັ່ງກ່າວ ຄາດວ່າຈະໄດ້ເລີ່ມສົ່ງຂາຍໃຫ້ອີຣ່ານໃນງວດທຳອິດ ຈຳນວນ 100 ໂຕນ ໃນທ້າຍເດືອນພຶດສະພາທີ່ຈະມາເຖິງນີ້ ເຊິ່ງຖືວ່າຄັ້ງປະຫວັດສາດ ທີ່ ສປປ ລາວ ໄດ້ຮ່ວມມືດໍາເນີນທຸລະກິດ ການສົ່ງອອກຢາງ ໄປຍັງປະເທດຕາເວັນອອກກາງ ທາມກາງລາຄາຢາງພາລາຕົກຕໍ່າໃນຕະຫລາດໂລກ.
ພິທີເຊັນສັນຍາຊື້ຂາຍຢາງດັ່ງກ່າວ, ມີຂຶ້ນໃນອາທິດຜ່ານມາໂດຍ ທ່ານ ບຸນລົ້ນ ສີລາວົງ ຮອງປະທານບໍລິສັດ ບຸນຖັນສົ່ງເສີມການກະເສດ ຂາອອກ-ຂາເຂົ້າ ຄົບວົງຈອນຈຳກັດ, ຕັ້ງຢູ່ບ້ານ ໜອງກອກ ເມືອງ ບາຈຽງຈະເລີນສຸກ ແຂວງຈຳປາສັກ ໄດ້ລົງນາມຮ່ວມກັບ ນັກທຸລະກິດອີລານ ໂດຍທ່ານ ຮາເມດເມີໂລຮິ (HamedMirlohi) ຮອງປະທານບໍລິສັດ Rahnama Trading ການຄ້າຈໍາກັດແຫ່ງ ປະເທດອີລານ.
ທ່ານ ບຸນລົ້ນ ສີລາວົງ ກ່າວວ່າ: ການທີ່ອີລານສົນໃຈ ມາເຊັນສັນຍາຊື້-ຂາຍ ກັບບໍລິສັດພວກເຮົາ ເພາະເຫັນວ່າຢາງພວກເຮົາ ເປັນຢາງທີ່ມີຄຸນນະພາບ ສາມາດນຳໄປຜະລິດເປັນສິນຄ້າ ໄດ້ຫລາຍຊະນິດ. ສ່ວນດ້ານລາຄາຖືວ່າ ແມ່ນລາຄາດີພໍສົມຄວນ ແລະ ກໍເປັນລາຄາມາດຕະຖານ ໃນຕະຫລາດໂລກ. ປັດຈຸບັນ ບໍລິສັດພວກເຮົາ ມີເງື່ອນໄຂຮອງຮັບ ໃຫ້ແກ່ການສົ່ງອອກຄືພວກເຮົາ ມີໂຮງງານປຸງແຕ່ງ ສາມາດຜະລິດຢາງເປັນແຜ່ນໄດ້ 25 ໂຕນຕໍ່ວັນ ເປັນປະເພດຢາງເຄຣບ ເອີ້ນວ່າເປັນສິນຄ້າເຄິ່ງສຳເລັດຮູບ ເຊິ່ງມີຈຸດດີສາມາດ ນຳໄປຜະລິດເປັນຢາງແທ່ງ, ຢາງຕີນລົດ, ຖົງຢາງອະນາໄມ, ຖົງມືການແພດ ແລະ ອື່ນໆ. ປັດຈຸບັນ ທາງບໍລິສັດພວກເຮົາ ມີສວນຢາງໃນເນື້ອທີ່ ທັງໝົດ 570 ເຮັກຕາ, ໃນອະນາຄົດ ຖ້າຫາກວ່າການສົ່ງອອກໄປໄດ້ດີ ທາງບໍລິສັດ ຍັງມີແຜນເກັບຊື້ຈາກພາກສ່ວນຕ່າງໆ ໃນທົ່ວປະເທດ ເພື່ອການສົ່ງອອກ ໃນປະລິມານທີ່ເພີ່ມຂຶ້ນ.
ແຫລ່ງຂ່າວ:
